കോട്ടയം: സിഎസ്‌ഐ മദ്ധ്യകേരള ഇടവകയിലെ ഭൂമികുംഭകോണത്തിനെതിരെ 31 ദളിതുകുടുംബാംഗങ്ങള്‍ സഭയുടെ ആസ്ഥാനത്ത് പ്രവര്‍ത്തിക്കുന്ന സെന്‍ട്രല്‍ ട്രാവന്‍കൂര്‍ ട്രസ്റ്റ്് അസോസിയേഷന്റെ ഓഫീസിലേയ്‌ക്ക് മാര്‍ച്ചും സമരപ്രഖ്യാപനവും നടത്തി.ഭൂസമരസമിതിയുടെ നേതൃത്വത്തിലാണ് സമരം. ഇടവകയുടെ കീഴിലുള്ള സോഷ്യോ ഇക്കണോമിക് ഡവലപ്‌മെന്റ് സൊസൈറ്റിയുടെ ഭൂമി കുംഭകോണത്തിനെതിരെയാണ് സമരത്തിനിറങ്ങുന്നത്.
1979ല്‍ ഇടവക നീലംപേരൂര്‍ പഞ്ചായത്തില്‍ വിദേശധനസഹായം ഉപയോഗിച്ച് സെന്‍ട്രല്‍ ട്രാവന്‍കൂര്‍ ട്രസ്റ്റ്് അസോസിയേഷന്‍ വാങ്ങിയ സ്ഥലം ഭൂരഹിതരായ 31 കുടുംബാംഗങ്ങള്‍ക്ക് 45 സെന്റ്‌നിലവും അഞ്ച് സെന്റ്ചിറയും ഉള്‍പ്പെടെ 50 സെന്റ് ഏക്കറിന് 13,000 രൂപാ വിലയ്‌ക്ക് നല്‍കി. ഭൂമിയുടെ വിലയുടെ ആദ്യഗഡുവായി 6,500 രൂപാ ഓരോകുടുംബത്തോടും സഭ വാങ്ങി. ആദ്യഗഡു അടയ്‌ക്കുമ്പോള്‍ ഭൂമി ആധാരം ചെയ്തുതരാം എന്നായിരുന്നു വ്യവസ്ഥ. എന്നാല്‍ ഈ സ്ഥലം ഇതുവരെ ഇവരുടെ പേരില്‍ ആധാരം ചെയ്തുകൊടുക്കാന്‍ സഭ തയ്യാറായിട്ടില്ല.
ഭൂമി പേരില്‍ ഇല്ലാത്തതിനാല്‍ സര്‍ക്കാരില്‍ നിന്നോ പഞ്ചായത്തില്‍ നിന്നോ യാതൊരു ആനുകൂല്യവും ലഭിക്കുന്നില്ല. കഴിഞ്ഞ പ്രളയത്തില്‍ വീട് നഷ്ടപ്പെട്ടവര്‍ക്ക് മതിയായ റവന്യൂ രേഖകള്‍ ഇല്ലാത്തതിന്റെ പേരില്‍ വീടിനുള്ള ധനസഹായം ലഭിക്കാതെ പോയി. വീട് നഷ്ടപ്പെട്ടവര്‍ സഭയുടെ ആസ്ഥാനത്ത് എത്തി ആധാരം ചെയ്തുതരണമെന്ന് ആവശ്യപ്പെട്ടതിന് ഇവര്‍ക്കെതിരെ പോലീസില്‍ കേസുകൊടുത്തു. ഇവര്‍ സഭയുടെ സ്ഥലത്ത് അനധികൃതമായി താമസിക്കുന്നു എന്നാണ് സഭ ഇപ്പോള്‍ പറയുന്നത്. കോട്ടയം ജില്ലയില്‍ വിവിധ ഭാഗങ്ങളില്‍ ദളിതരെ സഭ ഇത്തരത്തില്‍ കബളിപ്പിച്ചതായും ഇവര്‍ ആരോപിച്ചു.
