ന്യൂദല്ഹി: കോണ്ഗ്രസ് നേതാവും എംപിയുമായ ശശി തരൂരിന്റെ ഭാര്യ സുനന്ദ പുഷ്ക്കറിന്റെ മരണത്തില് കൂടുതല് തെളിവ് നിരത്തി പ്രോസിക്യൂഷന്. 2013 ജൂണില് തരൂറും പാകിസ്ഥാന് മാധ്യമപ്രവര്ത്തക മെഹര് തരാറും മൂന്ന് രാത്രി ഒരുമിച്ച് ദുബായില് ചെലവഴിച്ചതായി സുനന്ദ പുഷ്കറുടെ സുഹൃത്തും മാധ്യമപ്രവര്ത്തകയുമായ നളിനി സിങ്ങ്.സുനന്ദയുടെ സുഹൃത്തായിരുന്ന നളിനി സിങ്ങിന്റെ പ്രസ്താവന പബ്ലിക് പ്രോസിക്യൂട്ടര് അതുല് ശ്രീവാസ്തവ വായിച്ചു. തനിക്ക് മൂന്നു നാലു വര്ഷമായി സുനന്ദയെ അറിയാം. കഴിഞ്ഞ ഒരു വര്ഷമായി അവരുടെ കുടുംബജീവിതത്തെക്കുറിച്ച് പങ്കിടാന് തുടങ്ങി. തരൂറുമായുള്ള ബന്ധം പങ്കുവെക്കുകയും തരൂറും തരാറും മൂന്ന് രാത്രികള് ഒരുമിച്ച് ചെലവഴിച്ചുവെന്ന് എന്നോട് സുനന്ദ പറഞ്ഞിട്ടുണ്ടെന്നും പ്രസ്താവനയില് നളിനി പറയുന്നു.
മരിക്കുന്നതിന് ഒരു ദിവസം മുമ്പ് സുനന്ദ തന്നെ വിളിച്ചിരുന്നു എന്നും തരൂറും താരറും തമ്മിലുള്ള സന്ദേശങ്ങളെ ചൊല്ലി അവര് കരഞ്ഞുവെന്നും നളിനി പറയുന്നു. പൊതുതെരഞ്ഞെടുപ്പിന് ശേഷം തരൂര് സുനന്ദയെ വിവാഹമോചനം ചെയ്യുമെന്നും അദ്ദേഹത്തിന്റെ കുടുംബവും ഈ തീരുമാനത്തെ പിന്തുണയ്ക്കുന്നുവെന്നും സന്ദേശത്തില് സൂചിപ്പിച്ചിരുന്നു. കുറ്റപത്രത്തില് ഒക്ടോബര് 17ന് വാദം തുടരും.
ഇത് ഇരുവരുടെയും മൂന്നാമത്തെ വിവാഹമായിരുന്നു. മാനസിക പീഡനം അവരെ ആത്മഹത്യയിലേക്ക് നയിച്ചു. മാനസിക പീഡനം പോലും ക്രൂരതയായി കാണക്കാകുമെന്ന് സുപ്രീംകോടതിയുടെ തരുണ് തേജ്പാല് വിധിയെ ഉദ്ധരിച്ചു അതുല് ശ്രീവാസ്തവ പറഞ്ഞു.തന്റെ അമ്മ ശക്തയായ സ്ത്രീയായിരുന്നുവെന്നും അവര്ക്ക് ആത്മഹത്യ ചെയ്യാന് കഴിയില്ലെന്നും സുനന്ദയുടെ മകന് ശിവ് മേനോന് മൊഴി നല്കി. ഇതിനു സമാനമായ മൊഴിയാണ് സുനന്ദയുടെ സഹോദരന് ആശിഷും നല്കിയത്. എന്നാല്, ശശി തരൂരിനെതിരെ ആത്മഹത്യാ പ്രേരണക്കുറ്റവും ചുമത്തണമെന്ന് ദല്ഹി പോലീസ് പ്രത്യേക കോടതിയെ ബോധിപ്പിച്ചു. തരൂരിന്റെ വിവാഹേതര ബന്ധങ്ങളും മാനസിക പീഡനങ്ങളുമാണ് സുനന്ദ ജീവനൊടുക്കാന് കാരണമെന്ന് പോലീസ് പറഞ്ഞു. പോസ്റ്റ്മോര്ട്ടം റിപ്പോര്ട്ട് അനുസരിച്ച്, തരൂരിനെതിരെ കൊലക്കുറ്റമാണ് ചുമത്തേണ്ടതെന്ന് പ്രോസിക്യൂട്ടര് അതുല് ശ്രീവാസ്തവ സിബിഐ ജഡ്ജി അജയ് കുമാര് കുഹാര് മുന്പാകെ ബോധിപ്പിച്ചു. സുനന്ദ അയച്ച മെയില് ഞങ്ങള് കണ്ടിരുന്നു. ജീവിക്കാന് ഒരു താത്പര്യവും ഇല്ലെന്നും മരണത്തിനായി പ്രാര്ഥിക്കുന്നുവെന്നുമാണ് അവര് കുറിച്ചത്.
ഒരു വര്ഷമായി തരൂരും സുനന്ദയും തമ്മില് നിരന്തരം വഴക്കായിരുന്നുവെന്ന് വീട്ടുവേലക്കാരന് മൊഴി നല്കിയതും ശ്രീവാസ്തവ പറഞ്ഞു. കാറ്റിയെന്ന പേരുള്ള ഒരു യുവതിയുടെയും ഇന്ത്യന് പ്രീമിയര് ലീഗിന്റെ പേരിലുമായിരുന്നു വഴക്ക്. 2014 ജനുവരി 17നാണ് സുനന്ദയെ ദല്ഹിയിലെ ഹോട്ടല് മുറിയില് മരിച്ച നിലയില് കണ്ടെത്തിയത്.
