പാലക്കാട്: മലപ്പുറത്ത് അയ്യപ്പക്ഷേത്രത്തിന് നേരെ നടന്ന ആക്രമണത്തില്‍ വര്‍ഗീയ കലാപം ഉണ്ടാക്കാനായി കൈരളിയുടെ വ്യാജ വാര്‍ത്ത ഏറ്റുപിടിച്ച് കോണ്‍ഗ്രസ് എംഎല്‍.എ. തൃത്താല എംഎല്‍എ വി.ടി. ബല്‍റാമാണ് സിപിഎം അധീനതയിലുള്ള ഓണ്‍ലൈന്‍ പടച്ചുവിട്ട വാര്‍ത്തയുടെ അടിസ്ഥാനത്തില്‍ ഫേസ്ബുക്ക് പോസ്റ്റുമായി രംഗത്തെത്തിയിരിക്കുന്നത്. ”മലപ്പുറം ജില്ലയിലെ എടയൂരില്‍ അയ്യപ്പക്ഷേത്രം ആക്രമിച്ച കേസില്‍ മൂന്ന് സംഘ് പരിവാര്‍ നേതാക്കള്‍ അറസ്റ്റിലായിരിക്കുന്നു. ഇതിലൊരാള്‍ ബിജെപി സ്ഥാനാര്‍ത്ഥിയായി മത്സരിച്ചയാളുടെ സഹോദരന്‍ കൂടിയാണ്” എന്നുള്ള വ്യാജപ്രചരണമാണ് വി.ടി. ബല്‍റാം ഫേസ്ബുക്കിലൂടെ നടത്തിയിരിക്കുന്നത്.
വടക്കുംപുറം സികെ പാറ നെയ്തലപ്പുറത്ത് ശ്രീധര്‍മശാസ്താ ക്ഷേത്രം ആക്രമിച്ചത് ശാന്തി നഗര്‍ വടക്കുംപുറം സി.കെ പാറ സ്വദേശി രാമകൃഷ്ണന്‍ (50) ആണ്. ഇയാള്‍ക്ക് ബി.ജെപിയുമായോ ആര്‍.എസ്.എസിന്റെ പോഷക സംഘടനകളുമായോ യാതൊരു ബദ്ധവുമില്ലെന്ന് പോലീസ് തന്നെ വ്യക്തമാക്കിയിരുന്നു. ഇതു മറച്ചുവെച്ചാണ് സമൂഹത്തില്‍ തെറ്റിദ്ധാരണ പരത്തി വര്‍ഗീയ കലാപം ഉണ്ടാക്കാന്‍ കോണ്‍ഗ്രസ് എംഎല്‍എയായ വി.ടി. ബല്‍റാം ശ്രമിക്കുന്നത്.
നേരത്തെ, കൈരളി പുറത്തുവിട്ട വ്യാജവാര്‍ത്തയുടെ ചുവട് പിടിച്ച് ഇടതുപക്ഷ സഹയാത്രികരായ എം.വി. നികേഷ് കുമാറിന്റെയും മുന്‍ എംപി സെബാസ്റ്റിയന്‍ പോളിന്റെയും മാധ്യമ സ്ഥാപങ്ങള്‍ സമൂഹത്തില്‍ നുണപരത്തിയിരുന്നു. മലപ്പുറത്ത് അയ്യപ്പക്ഷേത്രം ആക്രമിച്ചത് ആര്‍.എസ്.എസ്, ബി.ജെ.പി പ്രവര്‍ത്തകര്‍ എന്ന എന്ന രീതിയില്‍ ഇവര്‍ വ്യാജവാര്‍ത്ത പടച്ചുവിട്ടത്. ക്ഷേത്രം ആക്രമിച്ചത് ആര്‍.എസ്.എസ് പ്രവര്‍ത്തകര്‍ എന്ന രീതിയിലാണ് പിണറായിയുടെ സന്തത സഹചാരിയായ ജോണ്‍ ബ്രിട്ടാസ് നേതൃത്വം നല്‍കുന്ന കൈരളി ചാനലിന്റെ ഓണ്‍ലൈനാണ് ആദ്യം വ്യാജവാര്‍ത്ത നല്‍കിയത്. എത് ഏറ്റുപിടിച്ചാണ് ചുവപ്പ്-ജിഹാദി മാധ്യമങ്ങള്‍ ആര്‍.എസ്.എസിനെതിരെയും ബി.ജെ.പിക്കെതിരെ വ്യാജ വാര്‍ത്ത ചമച്ചത്. കൈരളി നല്‍കിയ വാര്‍ത്ത അതേപടി കോപ്പി ചെയ്യുകയാണ് എം.വി. നികേഷ് കുമാര്‍ നേതൃത്വം നല്‍കുന്ന റിപ്പോര്‍ട്ടര്‍ ടി.വിയുടെ ഓണ്‍ലൈനും ചെയ്തിരിക്കുന്നത്. മുന്‍ എംപി സെബാസ്റ്റിയന്‍ പോള്‍ ചെയര്‍മാനായ സൗത്ത്‌ലൈവും ക്ഷേത്രം ആക്രമിച്ചത് ബിജെപി പ്രവര്‍ത്തകനെന്ന രീതിയിലാണ് വാര്‍ത്ത നല്‍കിയത്.
എന്നാല്‍, പോലീസ് റിപ്പോര്‍ട്ട് അടക്കം പുറത്തുവന്നതോടെ കൈരളി വ്യാജവാര്‍ത്ത ഡിലീറ്റ് ചെയ്ത് മുങ്ങി. എങ്കിലും വാര്‍ത്തയുടെ ലിങ്ക് ഇപ്പോഴും ഗൂഗിളില്‍ ഉണ്ട്. വ്യാജവാര്‍ത്തക്കെതിരെ നിയമനടപടി സ്വീകരിക്കുമെന്ന് അറിയിച്ചതോടെയാണ് കൈരളി വാര്‍ത്ത ഡിലീറ്റ് ചെയ്തത്. ഈ വ്യാജവാര്‍ത്തയെകുറിച്ച് കൈരളിയില്‍ വിളിച്ച് വിശദീകരണം ചോദിച്ചപ്പോള്‍ എങ്ങനൊരു വാര്‍ത്ത തങ്ങള്‍ കൊടുത്തിട്ടില്ലെന്ന കള്ളമാണ് എഡിറ്റര്‍ പറഞ്ഞത്. സമൂഹത്തില്‍ തെറ്റിദ്ധാരണ പരത്താനാണ് സര്‍ക്കാരിന് നേതൃത്വം നല്‍കുന്ന പാര്‍ട്ടിയുടെ ഉടമസ്ഥതയിലുള്ള ചാനല്‍ വെബ്‌സൈറ്റ് ശ്രമിച്ചത്. ഇതിന്റെ പിന്നാലെയാണ് നുണപ്രചരണവുമായി വി.ടി. ബല്‍റാം രംഗത്തെത്തിയിരിക്കുന്നത്.
