ന്യൂദല്ഹി : ജമ്മു കശ്മീരിനു പിന്നാലെ നാഗാലാന്ഡിലും കലാപം ഉണ്ടാക്കാന് പാക്കിസ്ഥാന് ശ്രമം നടത്തുന്നതായി റിപ്പോര്ട്ട്. ഇതിനായി പാക് അധിനിവേശ കശ്മീരില് ഷൂട്ട് ചെയ്ത വിഡിയോകള് ജമ്മുവിലും നാഗാലാന്ഡിലും നടക്കുന്ന മനുഷ്യാവകാശ ലംഘനങ്ങളെന്ന പേരില് സമൂഹമാധ്യമങ്ങളിലൂടെ പ്രചരിപ്പിക്കുകയാണെന്ന് ഇന്ത്യന് ആഭ്യന്തര മന്ത്രാലയത്തെ ഉദ്ധരിച്ച് ദേശീയ മാധ്യമങ്ങളാണ് റിപ്പോര്ട്ട് ചെയ്തിരിക്കുന്നത്.
കശ്മീര് കേന്ദ്ര ഭരണ പ്രദേശമാക്കിയതില് ഇന്ത്യയ്ക്കെതിരെ ലോക രാഷ്ട്രങ്ങളുടെ സഹായം തേടിയെങ്കിലും ആരും അനുകൂലിച്ചില്ല. ഇതിനെ തുടര്ന്ന് ജമ്മുവിലും നാഗാലാന്ഡിലും മനുഷ്യാവകാശ പ്രവര്ത്തനങ്ങളാണ് നടക്കുന്നതെന്ന് ചൂണ്ടിക്കാട്ടി അന്താരാഷ്ട്ര ശ്രദ്ധ നേടാനാണ് പാക്കിസ്ഥാന് ശ്രമിക്കുന്നതെന്നും റിപ്പോര്ട്ടില് പറയുന്നുണ്ട്. കശ്മീര് വിഷയം എല്ലാ രാജ്യാന്തര വേദികളിലും ഉയര്ത്തുമെന്ന് കഴിഞ്ഞ ദിവസം പാക് പ്രധാനമന്ത്രി ഇമ്രാന്ഖാന് പറഞ്ഞിരുന്നു.
ഇന്ത്യന് സുരക്ഷാ സേനയുടെ യൂണിഫോമിലുള്ള ആളുകള് ഇന്ത്യന് പൗരന്മാരെ ഉപദ്രവിക്കുന്ന വിധത്തിലാണ് വീഡിയോ ചിത്രീകരിച്ചിരിക്കുന്നത്. ഇതില് ജമ്മുവിന് പുറമേ ഇന്ത്യയില്നിന്നു നാഗാലാന്ഡ് സ്വാതന്ത്രമാകണമെന്ന് ശക്തമായി വാദിക്കുന്നതാണ് വീഡിയോ. വിമത സായുധ സംഘങ്ങളുടെ സമൂഹമാധ്യമ ഗ്രൂപ്പുകളിലും ഈ വിഡിയോ ദൃശ്യങ്ങള് പാക് അധികൃതര് എത്തിച്ചു നല്കിയിട്ടുണ്ട്.
എന്നാല് കശ്മീരില് മരുന്നുക്ഷാമമുണ്ടെന്ന പ്രചാരണം തെറ്റാണെന്നും മരുന്നുകിട്ടാതെ ആരും മരിച്ചിട്ടില്ലെന്നും അധികൃതര് വ്യക്തമാക്കി. കശ്മീരിന്റെ പ്രത്യേക പദവി കേന്ദ്ര സര്ക്കാര് റദ്ദാക്കിയപ്പോഴും നാഗാലാന്ഡ് ഉള്പ്പെടെയുള്ള സംസ്ഥാനങ്ങള്ക്കു സമാനപദവി തുടരുന്നതു ലക്ഷ്യമാക്കിയാണ് പാക്കിസ്ഥാന് സമൂഹമാധ്യമങ്ങളിലൂടെ വ്യാജ പ്രചാരണം നടത്തുന്നത്.
അതേസമയം ആര്ട്ടിക്കിള് 370 റദ്ദാക്കിയതുമായി ബന്ധപ്പെട്ട് പാക് മനുഷ്യാവകാശ മന്ത്രി ഷിരീന് എം. മസാരി യുഎന്നിന് നല്കിയ കത്തിന് ഒരു കടലാസിന്റെ വില പോലുമില്ല. ഇക്കാര്യത്തില് പ്രതികരണം നടത്തി അതിന് വിശ്വാസ്യത നല്കേണ്ട ആവശ്യമില്ലെന്നും വിദേശകാര്യ വക്താവ് രവീഷ് കുമാര് അറിയിച്ചു. ഭീകരതയെ രാഷ്ട്രത്തിന്റെ നയമാക്കിയ രാജ്യമാണ് പാക്കിസ്ഥാന്. ഈ ഭീകരത ഇന്ത്യയിലേക്ക് കയറ്റി അയയ്ക്കാനാണ് ്പാക്കിസ്ഥാന് ശ്രമിച്ചു വരുന്നതെന്നും രവീഷ് കുമാര് വാര്ത്താ സമ്മേളനത്തില് കുറ്റപ്പെടുത്തി.
ജമ്മു കശ്മീരില് സാധാരണനില കൈവരിക്കാന് ആവശ്യമായ നടപടികള് സ്വീകരിച്ചു കഴിഞ്ഞതായി ഗവര്ണര് സത്യപാല് മാലിക് പറഞ്ഞു. 10 ജില്ലകളില് മൊബൈല് ഫോണ് സര്വീസ് സാധാരണ നിലയിലായിട്ടുണ്ട്. ബാങ്കുകളും എടിഎമ്മുകളും സാധാരണ നിലയില് പ്രവര്ത്തിക്കുന്നുണ്ട്. ലാന്ഡ് ലൈനുകള് ഘട്ടംഘട്ടമായാണ് പുനഃസ്ഥാപിക്കുമെന്നും അദ്ദേഹം കൂട്ടിച്ചേര്ത്തു.
