ഇടുക്കി: പ്രളയക്കെടുതിയില്‍ വലയുന്ന വനവാസികള്‍ക്ക് ആവശ്യസാധനങ്ങളുമായെത്തിയ സേവാഭാരതിയുടെ വാഹനങ്ങള്‍ വനംവകുപ്പ് ചെക്ക് പോസറ്റില്‍ തടഞ്ഞിട്ടു. ഇന്നു രാവിലെ പതിനൊന്നിന് വള്ളക്കടവ് ചെക്ക് പോസ്റ്റിലായിരുന്നു സംഭവം. തൊടുപുഴ സേവാഭാരതിയാണ് പ്രളയത്തില്‍ ഒറ്റപ്പെട്ടുപോയ വഞ്ചിവയലിലെ വനവാസികള്‍ക്ക് അരി അടക്കമുള്ള സാധനങ്ങളുമായെത്തിയത്.
എന്നാല്‍, സേവാഭാരതിയുടെ വാഹനം വനംവകുപ്പ് ഉദ്യോഗസ്ഥര്‍ തടഞ്ഞിടുകയായിരുന്നു. വനവാസികള്‍ക്കുള്ള ഭക്ഷണം സര്‍ക്കാര്‍ കൊടുക്കുമെന്നായിരുന്നു ഇവര്‍ പറഞ്ഞത്. സേവാഭാരതി പ്രവര്‍ത്തകര്‍ ഊരുമൂപ്പനുമായി ബന്ധപ്പെട്ടപ്പോള്‍ തങ്ങള്‍ക്ക് ഇങ്ങനെയാതൊരുവിധ സഹായവും കിട്ടിയില്ലെന്ന് അറിയിച്ചു. ഇതേ തുടര്‍ന്ന് സേവാഭാരതി പ്രവര്‍ത്തകര്‍ ചെക്ക് പോസ്റ്റ് ഉപരോധിക്കുകയായിരുന്നു. സംഭവത്തില്‍ കലക്ടറുടെ നേരിട്ട് ഇടപെട്ടതോടെയാണ് വനംവകുപ്പ് ഉദ്യേഗസ്ഥര്‍ അയയുകയും ചെക്ക് പോസ്റ്റ് തുറന്നു നല്‍കുകയും ചെയ്തത്. വഞ്ചിവയല്‍ ഊരിലെത്തിയ സേവാഭാരതി പ്രവര്‍ത്തകര്‍ എല്ലാ വനവാസികള്‍ക്കും ആവശ്യമുള്ള സാധനങ്ങള്‍ നല്‍കി.
