തിരുവനന്തപുരം:കേരളത്തിലെ സിപിഎമ്മും കോണ്ഗ്രസും കശ്മീര് വിഷയത്തെ രാഷ്ട്രീയ മുതലെടുപ്പിനായി ഉപയോഗിക്കുന്നത് രാജ്യദ്രോഹമാണെന്ന് കേന്ദ്രമന്ത്രി വി.മുരളീധരന്. ജമ്മുകശ്മീരിന്റെ പ്രത്യേകാവകാശം എടുത്തുകളഞ്ഞതില് മറ്റു സംസ്ഥാനങ്ങളില്നിന്നു വിഭിന്നമായ പ്രചാരണമാണ് കേരളത്തില് സിപിഎമ്മും കോണ്ഗ്രസും കൂടി നടത്തുന്നതെന്നും ഇതു അപലനീയമായ നിലപാടാണെന്നുമാണ് ബി.ജെ.പി. ജില്ലാക്കമ്മിറ്റി സംഘടിപ്പിച്ച ‘പുതിയ കശ്മീര്, പുതിയ ഇന്ത്യ’ എന്ന ചര്ച്ച ഉദ്ഘാടനം ചെയ്യവേ അദ്ദേഹം പറഞ്ഞത്.
ജമ്മുകശ്മീരിന്റെ സ്വയംഭരണാധികാരം ഇല്ലാതാക്കിയെന്നത് വിഡ്ഢിത്തമായ പ്രചാരണമാണ്. ഒരു രാജ്യത്തിനകത്തുള്ള സംസ്ഥാനത്ത് സ്വയംഭരണാധികാരം എന്ന വാദംതന്നെ തെറ്റാണ്.പാര്ലമെന്റിനകത്ത് ചില എം.പി.മാര് നടത്തിയ പ്രസംഗം പുറത്തായിരുന്നെങ്കില് കേസാകുകയും അവരുടെ തനി നിറം ജനങ്ങള് മനസിലാക്കുകയും ചെയ്യുമായിരുന്നെന്ന് അദ്ദേഹം പറഞ്ഞു.
ജമ്മുകശ്മീരിലേത് രാഷ്ട്രീയത്തെക്കാള് വികസനപ്രശ്നമണ്. ജനങ്ങള് അനുഭവിക്കേണ്ട അധികാര, അവകാശങ്ങള് ഇല്ലാതാക്കുകയാണ് പ്രത്യേകാധികാരത്തിന്റെ മറവില് ഇതുവരെ അവിടത്തെ കുടുംബാധിപത്യത്തിലുള്ള ഭരണാധികാരികള് ചെയ്തത്. സംവരണമില്ല, വിദ്യാഭ്യാസാവകാശമില്ല. മറ്റു സംസ്ഥാനങ്ങളിലെ ജനങ്ങളനുഭവിക്കുന്ന ഒരവകാശവും കശ്മീരിലുള്ളവര്ക്കില്ല. അടിസ്ഥാന സൗകര്യം പോലുമില്ല. നിലവില് അവിടെ നിയന്ത്രണങ്ങള് വരുത്തിയിട്ടുണ്ട്. കശ്മീരിലാരും തടവിലല്ല. അവിടെ കലാപമുണ്ടാകുമെന്ന് പ്രചരിപ്പിച്ചവര്ക്കുമുന്പില് കശ്മീര് ശാന്തമായി നിലകൊള്ളുന്നു-അദ്ദേഹം പറഞ്ഞു.
