പത്തനംതിട്ട: അടുത്ത മണ്ഡലകാലത്തേക്കുള്ള ശബരിമല മേല്ശാന്തിയായി എ.കെ. സുധീര് നമ്പൂതിരിയെ തെരഞ്ഞെടുത്തു. മലപ്പുറം തിരൂര് സ്വദേശിയാണ് ഇദ്ദേഹം. മാളികപ്പുറം മേല്ശാന്തിയായി എം.എസ്. പരമേശ്വരന് നമ്പൂതിരിയെയും തെരഞ്ഞെടുത്തു. എറണാകുളം പുളിയനം സ്വദേശിയാണ് അദ്ദേഹം.
അരീക്കര മനയില് നിന്നുള്ളയാളാണ് സുധീര് നമ്പൂതിരി. തിരൂരിലെ തിരുനാവായയാണ് ഇദ്ദേഹത്തിന്റെ സ്വദേശം. പരമേശ്വരന് നമ്പൂതിരിയാവട്ടെ ആലുവ പുളിയനം പാറക്കടവ് മടവന മനയില് നിന്നുള്ളയാളാണ്.
9ാമത്തെ നറുക്കിലാണ് എ.കെ.സുധീര് നമ്പൂതിരിയെ ശബരിമല മേല്ശാന്തിയായി തെരഞ്ഞെടുത്തത്. തിരുന്നാവായ നാവാമുകുന്ദ ക്ഷേത്രത്തിലെയുള്പ്പടെ മേല്ശാന്തിയായിരുന്നു അദ്ദേഹം. പന്തളം കൊട്ടാരത്തിലെ കുട്ടി മാധവ് കെ. വര്മ്മയാണ് നറുക്കെടുത്തത്.
തന്ത്രി കണ്ഠര് മഹേഷ് മോഹനര്, സന്നിധാനം സ്പെഷല് കമ്മിഷണര് എം മനോജ്, ദേവസ്വം ഓംബുഡ്സ്മാന് ജസ്റ്റിസ് രാമന്, ദേവസ്വം കമ്മിഷണര് എച്ച് ഹര്ഷന്, ദേവസ്വം ബോര്ഡ് പ്രസിഡന്റ് എ പത്മകുമാര്, അംഗങ്ങളായ കെപി ശങ്കരദാസ്, ഡി വിജയകുമാര് എന്നിവരും നറുക്കെടുപ്പില് സന്നിഹിതരായിരുന്നു.
ശബരിമല-മാളികപ്പുറം മേല്ശാന്തി തെരഞ്ഞെടുപ്പിനുള്ള അഭിമുഖത്തില് 18 പേരാണ് പങ്കെടുത്തത്. ഇത്തവണ വളരെ നേരത്തെയാണ് മേല്ശാന്തി തെരഞ്ഞെടുപ്പ് നടന്നത്. ഇനി മുതല് പുതിയതായി ചുമതലയേല്ക്കുന്ന മേല്ശാന്തിമാര്ക്ക് തന്ത്രിയുടെ നേതൃത്വത്തില് ഒരു മാസത്തെ പരിശീലനം നല്കും.
ശബരിമലയിലും മാളികപ്പുറത്തുമായാണ് പരിശീലനം. കന്നി മാസം ഒന്നു മുതല് 31 വരെ മേല്ശാന്തിമാര് ഇവിടെ ഭജന ഇരിക്കും. ഇതിനു വേണ്ടിയായിരുന്നു നേരത്തെ തെരഞ്ഞെടുപ്പ് നടത്തിയത്. വൃശ്ചിക മാസത്തിലാവും ഇവരുടെ സ്ഥാനാരോഹണം.
