തിരുവനന്തപുരം: മഴക്കെടുതി നേരിടുന്ന കേരളത്തിന് ആവശ്യമായ എല്ലാ സഹായങ്ങളും നല്‍കുമെന്ന് കേന്ദ്ര ആഭ്യന്തര മന്ത്രി അമിത് ഷാ. ഗവര്‍ണര്‍ ജസ്റ്റിസ് പി സദാശിവത്തെയാണ് അദേഹം ഇക്കാര്യം അറിയിച്ചത്. സംസ്ഥാനത്തെ വെള്ളപ്പൊക്ക കെടുതികളെയും രക്ഷാ പ്രവര്‍ത്തനങ്ങളെയും നിലവിലെ പ്രളയ സ്ഥിതിയെയും കുറിച്ച് ഗവര്‍ണര്‍ കേന്ദ്ര ആഭ്യന്തര മന്ത്രിയ്‌ക്ക് റിപ്പോര്‍ട്ട് നല്‍കിയിരുന്നു.
തുടര്‍ന്ന് ഇക്കാര്യങ്ങളെക്കുറിച്ച് അദ്ദേഹം അമിത് ഷായുമായി ഫോണില്‍ സംസാരിക്കുകയും ഉരുള്‍ പൊട്ടല്‍ ബാധിത ജില്ലകളില്‍ കൂടുതല്‍ സഹായം തേടുകയും ചെയ്തപ്പോഴാണ് ഈ ഉറപ്പു നല്‍കിയത്. വര്‍ദ്ധിച്ചുവരുന്ന മരണസംഖ്യ, പ്രളയവും ഉരുള്‍ പൊട്ടലും മൂലം മാറിത്താമസിക്കേണ്ടി വരുന്നവരുടെ അവസ്ഥ, രക്ഷാപ്രവര്‍ത്തനത്തില്‍ നേരിടുന്ന പ്രയാസങ്ങള്‍, മഴ തുടര്‍ന്നാലുള്ള അപകടസാദ്ധ്യത, സേനയും കോസ്റ്റ് ഗാര്‍ഡും മറ്റ് ഏജന്‍സികളും സര്‍ക്കാര്‍ സംവിധാനത്തിനു നല്‍കുന്ന പൂര്‍ണ പിന്തുണ തുടങ്ങിയ കാര്യങ്ങള്‍ ഗവര്‍ണര്‍ കേന്ദ്ര ആഭ്യന്തരമന്ത്രിയെ ധരിപ്പിച്ചു.
രക്ഷാപ്രവര്‍ത്തനങ്ങളില്‍ മുഖ്യമന്ത്രിക്ക് എല്ലാ പിന്തുണയും വാഗ്ദാനം ചെയ്തതായും ഗവര്‍ണര്‍ ആഭ്യന്തരമന്ത്രാലയത്തിന് നല്‍കിയ റിപ്പോര്‍ട്ടില്‍ പറഞ്ഞു. മഴക്കെടുതി നേരിടാന്‍ കേന്ദ്രം സംസ്ഥാന സര്‍ക്കാരിന് 52.27കോടി രൂപ ധനസഹായം നല്‍കുമെന്ന് കേന്ദ്രമന്ത്രി വി മുരളീധരന്‍ മാധ്യമങ്ങളോട് വ്യക്തമാക്കി.
