കോഴിക്കോട്: കനത്തമഴയെ തുടര്‍ന്ന പുഴകളിലെ ജലനിരപ്പ് ക്രമാതീതമായി ഉയരുന്ന സാഹചര്യത്തില്‍ തീരത്തുള്ള ജനങ്ങളെ മാറ്റി പാര്‍പ്പിക്കാന്‍ ജില്ലാകളക്ടര്‍ നിര്‍ദ്ദേശം നല്‍കി. ചാലിയാറിലും കുറ്റ്യാടി പുഴയിലും ജലനിരപ്പ് ഉയര്‍ന്നതിനാലാണ് തീരത്തുള്ളവരെ മാറ്റി താമസിപ്പിക്കാന്‍ നിര്‍ദ്ദേശം നല്‍കിയത്.
ചാലിയാറില്‍ ജലനിരപ്പ് ഉയരുന്ന സാഹചര്യത്തില്‍ കൊടിയത്തൂര്‍, കാരശ്ശേരി, ചാത്തമംഗലം പഞ്ചായത്തുകളിലെയും മുക്കം നഗരസഭയിലെയും കൈ വരികളുടെയും തീരത്തുള്ളവരാണ് മാറി താമസിക്കേണ്ടത്. പൊതു ജനങ്ങള്‍ സഹകരിക്കണമെന്ന് ജില്ലാ കലക്ടര്‍ അഭ്യര്‍ത്ഥിച്ചു. മാവൂര്‍, പെരുവയല്‍, തിരുവമ്പാടി, കൂടരഞ്ഞി, ഓമശ്ശേരി പഞ്ചായത്തുകളിലെ ചാലിയാറിന്റെ തീരത്ത് താമസിക്കുന്നവര്‍ അതീവ ജാഗ്രത പുലര്‍ത്തണം
കുറ്റ്യാടി പുഴയില്‍ ജലനിരപ്പ് ഉയര്‍ന്നതിനാല്‍ തീരത്ത് താമസിക്കുന്നവര്‍ മാറി താമസിക്കണമെന്ന് ജില്ലാകളക്ടര്‍ അറിയിച്ചു. തിരുവള്ളൂര്‍ പഞ്ചായത്തിലെ തുരുത്തി, മാങ്ങാമുഴി, ചെറുവണ്ണൂര്‍ പഞ്ചായത്തിലെ ചാനിയംകടവ് എന്നിവിടങ്ങളിലെ താഴ്ന്ന പ്രദേശങ്ങളിലെ മുഴുവന്‍ ആളുകളും മാറി താമസിക്കണം. പഞ്ചായത്ത് അധികൃതര്‍ക്ക് നിര്‍ദ്ദേശം നല്‍കിയിട്ടുണ്ട്. ആളുകളെ ഒഴിപ്പിക്കല്‍ തുടരുന്നു.
കുറ്റ്യാടി പുഴയില്‍ ജലനിരപ്പ് ഉയര്‍ന്നതിനെ തുടര്‍ന്ന് വിവിധ സ്ഥലങ്ങളിലേക്ക് കലക്ട്രേറ്റില്‍ നിന്നും രക്ഷാപ്രവര്‍ത്തനത്തിനായി ബോട്ടുകള്‍ കൊണ്ടുപോകുന്നുണ്ട്.
പ്രകൃതി ദുരന്തം അഭിമുഖീകരിക്കുന്നതില്‍ ജില്ലാ ഭരണകൂടം മികച്ച പ്രവര്‍ത്തനമാണ് നടത്തുന്ന തെന്നും അതിനാവശ്യമായ സംവിധാനങ്ങള്‍ ഉപകരണങ്ങള്‍ ലഭ്യമാക്കുന്നതിന് നടപടി സ്വീകരിക്കുമെന്നും വിദ്യാഭ്യാസ മന്ത്രി പ്രൊഫ സി.രവീന്ദ്രനാഥ് അറിയിച്ചു. കട്ടപ്പന സെന്റ് ജോര്‍ജ് ഹയര്‍ സെക്കന്ററി സ്‌കൂളിലെ ദുരിതാശ്വാസ ക്യാമ്പ് സന്ദര്‍ശിച്ച് മന്ത്രി പറഞ്ഞു. മന്ത്രിയോടൊപ്പം ഡീന്‍ കുര്യാക്കോസ് എംപി, റോഷി അഗസ്റ്റിന്‍ എം എല്‍ എ, ജില്ലാ കളക്ടര്‍ എച്ച്. ദിനേശന്‍, എസ് പി ടി. നാരായണന്‍, ആര്‍ഡിഒ അതുല്‍ സ്വാമിനാഥന്‍ തുടങ്ങിയവരും ഉണ്ട്.
കട്ടപ്പനയിലെ ക്യാമ്പ് സന്ദര്‍ശനത്തിനുശേഷം ഇപ്പോള്‍ കാഞ്ചിയാര്‍ സാംസ്‌കാരിക കേന്ദ്രത്തില്‍ തുറന്ന ക്യാമ്പില്‍ ദുരിതബാധിതരെ കാണുകയാണ്.
