മഞ്ചേശ്വരം : അധികൃതരില് നിന്നുള്ള പീഡനം മൂലം സ്വയം വിരമിക്കല് അപേക്ഷ നല്കിയ സ്റ്റേഷന് മാസ്റ്ററെ റെയില്വേ സര്വീസില് നിന്നും പിരിച്ചുവിട്ടു. റെയില്വേ സ്റ്റേഷന് മാസ്റ്റര്മാരുടെ സംഘടനയായ ഓള് ഇന്ത്യ സ്റ്റേഷന് മാസ്റ്റേഴ്സ് അസോസിയേഷന് (എഐഎസ്എംഎ) മുന് ദേശീയ പ്രസിഡന്റും മഞ്ചേശ്വരം സ്റ്റേഷന്മാസ്റ്ററുമായ ആര്.കെ. ഉണ്ണികൃഷ്ണനെയാണ് റെയില്വേ ജോലിയില് നിന്നും പിരിച്ചുവിട്ടത്. ഇയാള് സ്വമേധയാ വിരമിക്കാന് അപേക്ഷ നല്കിയിരുന്നെങ്കിലും 30 വര്ഷം സര്വീസും 55 വയസ്സും പൂര്ത്തിയായ, കാര്യക്ഷമതയില്ലാത്ത ജീവനക്കാരെ നിര്ബന്ധിതമായി വിരമിപ്പിക്കാമെന്ന വ്യവസ്ഥ ബാധകമാക്കിയാണ് നടപടി സ്വീകരിച്ചിരിക്കുന്നത്.
പാലക്കാട് സീനിയര് ഡിവിഷണല് ഓപ്പറേഷന്സ് മാനേജര് പി.സി. അശോക്കുമാറിന്റേതാണ് ഉത്തരവ്. ഇതില് അഡീഷണല് റെയില്വേ ഡിവിഷണല് മാനേജര് അധ്യക്ഷനായ പുനഃപരിശോധനാ സമിതിയുടെ ശുപാര്ശപ്രകാരമാണ് ഈ നടപടിയെന്നും വ്യക്തമാക്കുന്നുണ്ട്. രാജ്യത്ത് ഈ നടപടിക്ക് വിധേയനാകുന്ന ആദ്യ സ്റ്റേഷന് മാസ്റ്ററാണ് ഉണ്ണികൃഷ്ണന്.
അതേസമയം ഉത്തരവ് നേരിട്ടുനല്കാന് റെയില്വേ ഇന്സ്പെക്ടര് രാവിലെ സ്റ്റേഷനിലെത്തിയെങ്കിലും മൂന്നുമാസത്തെ ശമ്പളം നല്കണമെന്ന വ്യവസ്ഥ പാലിക്കാത്തതിനാല് നോട്ടീസ് കൈപ്പറ്റില്ലെന്ന് ഉണ്ണികൃഷ്ണന് വ്യക്തമാക്കി.
മുപ്പത്തിയാറരവര്ഷം സര്വീസുള്ള ഉണ്ണികൃഷ്ണന് രണ്ടരവര്ഷമായി മഞ്ചേശ്വരത്താണ്. അധികൃതരുടെ പീഡനം അസഹനീയമായപ്പോഴാണ് കഴിഞ്ഞ മേയ് ഒന്നിന് സ്വയം വിരമിക്കാന് അപേക്ഷ നല്കിയത്. ഇതുപ്രകാരം ഈ ജൂലായ് 31-ന് വിരമിക്കാന് അനുവദിക്കേണ്ടതാണ്. 30 ആയിട്ടും ഉത്തരവ് ലഭിക്കാത്തതിനാല് ഡിവിഷണല് ഓഫീസില് ബന്ധപ്പെട്ടപ്പോള് സ്വയം വിരമിക്കാനുള്ള അപേക്ഷ തള്ളിയതായി അറിയിച്ചു. ഒരാഴ്ച പിന്നിടുമ്പോഴാണ് ഈ ഉത്തരവ് വന്നതെന്ന് ഉണ്ണികൃഷ്ണന് പറഞ്ഞു.
നടപടിയില് പ്രതിഷേധിച്ച് കോഴിക്കോട്, മംഗളൂരു, പാലക്കാട്, കണ്ണൂര് സ്റ്റേഷനുകളില് ജീവനക്കാര് പ്രകടനം നടത്തി. വ്യാഴാഴ്ച ഷൊര്ണൂരില് വിപുലമായ പ്രകടനം നടത്തുമെന്നും എഐഎസ്എംഎ. രാജ്യത്തെ സ്റ്റേഷന് മാസ്റ്റര്മാരുടെ ഏക സംഘടനയാണ് എഐഎസ്എംഎ.
