ന്യൂദല്ഹി: ജമ്മു കശ്മീരിനുണ്ടായിരുന്ന പ്രത്യേക പദവികളും അധികാരങ്ങളും കേന്ദ്രസര്ക്കാര് എടുത്തുമാറ്റിയത് രാഷ്ട്രപതിയുടെ പ്രത്യേക അധികാരം ഉപയോഗിച്ച്. 370ാം വകുപ്പ് റദ്ദാക്കിയ പ്രഖ്യാപനം അമിത് ഷായില് നിന്ന് ഉണ്ടായത് മിനിറ്റുകള് മാത്രം നീണ്ട പ്രകിയയിലൂടെ. രാജ്യസഭയിലെ ശൂന്യവേള റദ്ദാക്കിയെന്നും കശ്മീര് സംബന്ധിച്ച പ്രത്യേക പ്രമേയം അവതരിപ്പിക്കാന് അമിത് ഷായ്ക്കു രാജ്യസഭ അധ്യക്ഷന് വെങ്കയ്യ നായിഡു അനുമതി നല്കുകയായിരുന്നു. ഇതോടെയാണു നിര്ണായക പ്രഖ്യാപനം അമിത് ഷായില് നിന്നുണ്ടായത്. കോണ്ഗ്രസ് അടക്കം പ്രതിപക്ഷ വന്ബഹളവുമായി രംഗത്തു വന്നെങ്കിലും അമിത് ഷാ തന്റെ പ്രഖ്യാപനം പൂര്ത്തിയാക്കി.
ജമ്മു കശ്മീരില് സൈനിക നടപടികള് ആരംഭിച്ചതിന് പിന്നാലെ കേന്ദ്ര മന്ത്രിസഭയുടെ പ്രത്യേക യോഗം ഇന്നു ചേര്ന്നിരുന്നു. പ്രധാനമന്ത്രി നരേന്ദ്ര മോദിയുടെ വസതിയിലായിരുന്നു യോഗം. ഇതിനു ശേഷമാണ് അമിത് ഷാ രാജ്യസഭയില് പ്രഖ്യാപനം നടത്തിയത്. ഇന്നലെ കേന്ദ്ര ആഭ്യന്തര മന്ത്രി അമിത് ഷാ ദേശീയ സുരക്ഷ ഉപദേഷ്ടാവുമായും ആഭ്യന്തര സെക്രട്ടറിയുമായും പ്രത്യേകം ചര്ച്ചകള് നടത്തി സ്ഥിതിഗതികള് വിലയിരുത്തിയിരുന്നു. ജമ്മു കശ്മീരിലെ വിഘടനവാദി നേതാക്കളെ സൈന്യം വീട്ടുതടങ്കലിലാക്കിയതിന് പിന്നാലെ ഗവര്ണര് സത്യപാല് മാലിക് ഇന്നലെ രാത്രിയില് അടിയന്തര യോഗം വിളിച്ചിരുന്നു. അര്ദ്ധരാത്രിയില് സംസ്ഥാനത്തെ ഉന്നത ഉദ്യോഗസ്ഥരുമായി രാജ്ഭവനിലാണ് അദേഹം കൂടികാഴ്ച നടത്തിയത്. ചീഫ് സെക്രട്ടറിയും ഡി.ജി.പിയും യോഗത്തിനെത്തിയിരുന്നു. നേരത്തെ, ജമ്മു കശ്മീരില് സൈനിക നീക്കം ആരംഭിച്ചതോടെ പ്രധാന വിഘടനവാദി നേതാക്കളെ വീട്ടുതടങ്കിലാക്കിയിരുന്നു. അതേസമയം, ജമ്മു കശ്മീര് താഴ്വരയില് കേന്ദ്ര സര്ക്കാരിന്റെ നിര്ദേശത്തെ തുടര്ന്ന് നിരോധനാജ്ഞ പ്രഖ്യാപിച്ചു. വിദ്യാഭ്യാസ സ്ഥാപനങ്ങള് അടച്ചിടാന് പോലീസ് നിര്ദ്ദേശം നല്കിയിട്ടുണ്ട്.
