തൃശൂര്:ക്ഷേത്രങ്ങളുമായി ബന്ധപ്പെട്ട കാര്യങ്ങളില് കോടതി അമിതമായി ഇടപെടുന്നെന്ന് വിമര്ശിച്ച് ദേവസ്വം മന്ത്രി കെ. മുരളീധരന്. എല്ലാ കാര്യങ്ങളിലും കോടതി ഇടപെട്ടാല് പിന്നെ ഭക്തജനങ്ങള്ക്ക് എന്ത് പങ്കാണുള്ളതെന്ന് മന്ത്രി ചോദിച്ചു. ശബരിമലയില് ദേവസ്വത്തിനോ സര്ക്കാരിനോ റോളില്ലാത്ത സ്ഥിതിയാണ്.ക്ഷേത്രത്തില് ഏത് പൂവ് ഉപയോഗിക്കണം എന്ന് പോലും തീരുമാനിക്കുന്നത് ഹൈക്കോടതിയാണെന്നും അദ്ദേഹം കുറ്റപ്പെടുത്തി.
ക്ഷേത്രകാര്യങ്ങളില് ഭക്തര്ക്ക് എന്തെങ്കിലും റോള് ഉണ്ടോ എന്ന് സംശയിക്കേണ്ട സാഹചര്യമാണ്. ഓരോ കാര്യത്തിലും അനാവശ്യ വിവാദങ്ങള് ഉണ്ടാക്കേണ്ടതില്ല. ക്ഷേത്രങ്ങളുടെ കാര്യത്തില് ഇത്തരം അമിത ഇടപെടലുകള് ആവശ്യമാണോ എന്ന് ഗൗരവമായി ചിന്തിക്കേണ്ട സമയമാണിത്. ഈ വിഷയം താന് നിയമസഭയില് ഇതിനകം ഉന്നയിച്ചിട്ടുണ്ട്. അവിടെ സംസാരിക്കുമ്പോള് കോടതിയലക്ഷ്യം പോലുള്ള ഭയമില്ലാതെ കാര്യങ്ങള് അവതരിപ്പിക്കാമെന്നും കെ മുരളീധരന് പറഞ്ഞു.
