ഒറ്റപ്പാലം: നഗരസഭാ ഓഫിസിലെ മോഷണക്കേസ് തീര്‍പ്പാക്കാന്‍ സിപിഎം വനിതാ നേതാവും പരാതിക്കാരിയുമായ പൊതുമരാമത്ത് സ്ഥിരം സമിതി അധ്യക്ഷ ടി. ലത നല്‍കിയ അപേക്ഷ കോടതി തള്ളി. അതിക്രമിച്ചു കയറല്‍ ഉള്‍പ്പെടെയുള്ള വകുപ്പുകള്‍ നിലനില്‍ക്കാവുന്ന കേസില്‍ നടപടികള്‍ പൂര്‍ത്തിയാക്കാതെ തീര്‍പ്പു സാധ്യമല്ലെന്നു വിലയിരുത്തിയാണു തീരുമാനം.
നഗരസഭ വിദ്യാഭ്യാസ സ്ഥിരം സമിതി അധ്യക്ഷ ബി. സുജാത പ്രതിയായ കേസില്‍ തുടര്‍നടപടികള്‍ അവസാനിപ്പിക്കാന്‍ സന്നദ്ധത അറിയിച്ചു ലത തിങ്കളാഴ്ച ഒറ്റപ്പാലം ജുഡീഷ്യല്‍ ഒന്നാം ക്ലാസ് മജിസ്‌ട്രേട്ട് കോടതിയില്‍ നേരിട്ടു ഹാജരായി സത്യവാങ്മൂലം നല്‍കിയിരുന്നു. നഗരസഭാ ഓഫിസില്‍ നിന്നു കാണാതായെന്നു കരുതിയ 38,000 രൂപ വീട്ടില്‍ നിന്നു കണ്ടെത്തിയെന്നാണു കോടതിയെ അറിയിച്ചത്. കുറ്റപത്രം ഉള്‍പ്പെടെ നിയമപരമായ നടപടിക്രമങ്ങള്‍ക്കു കാക്കാതെ മുന്‍കൂട്ടി പരിഗണിച്ചു കേസ് അവസാനിപ്പിക്കണമെന്നു സുജാതയും അപേക്ഷ നല്‍കിയിരുന്നു. പ്രോസിക്യൂഷനും ഇക്കാര്യത്തില്‍ എതിര്‍പ്പു പ്രകടിപ്പിച്ചിരുന്നില്ല.
ആദ്യം റജിസ്റ്റര്‍ ചെയ്യപ്പെട്ട എഫ്‌ഐആറില്‍ അതിക്രമിച്ചു കയറല്‍ ഉള്‍പ്പെടെ ചേര്‍ത്തിട്ടുള്ളതിനാല്‍ അപേക്ഷ പരിഗണിക്കാനാകില്ലെന്നു കോടതി വ്യക്തമാക്കി. സുജാതയെ പ്രതി ചേര്‍ത്ത ശേഷം, മോഷണം മാത്രമാക്കി ഭേദഗതി വരുത്തിയ എഫ്‌ഐആര്‍ മുന്‍നിര്‍ത്തിയായിരുന്നു പ്രതിഭാഗം അഭിഭാഷകന്റെ വാദം. പരാതിക്കാരിയുടെ ഓഫിസ് മുറിയിലാണു മോഷണമെന്നിരിക്കെ അതിക്രമിച്ചു കയറല്‍ നിലനില്‍ക്കുമെന്നു കോടതി വിലയിരുത്തി. കേസ് അവസാനിപ്പിക്കാനുള്ള അപേക്ഷയുമായി ഇരുവിഭാഗവും ഇന്നു ഹൈക്കോടതിയെ സമീപിച്ചേക്കും.
ഇതിനിടെ, കേസ് ഒത്തുതീര്‍പ്പാക്കരുതെന്ന് ആവശ്യപ്പെട്ട് നേരത്തെ നഗരസഭാ ഓഫിസില്‍ വച്ചു പണം നഷ്ടപ്പെട്ട കുടുംബം കോടതിയെ സമീപിച്ചു. 2018 ഒക്ടോബര്‍ 3നു വിവാഹം റജിസ്റ്റര്‍ ചെയ്യാനെത്തിയ തോട്ടക്കര സ്വദേശിനിയുടെ 10,000 രൂപ മോഷ്ടിക്കപ്പെട്ട സംഭവത്തില്‍ പൊലീസിനു പരാതി നല്‍കിയിരുന്നെങ്കിലും അന്വേഷണം നടന്നില്ലെന്നാണ് ആക്ഷേപം. ഇന്നു റിപ്പോര്‍ട്ട് സമര്‍പ്പിക്കാന്‍ കോടതി പൊലീസിനോട് ആവശ്യപ്പെട്ടു.
