കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിലെ പുതിയ ടെര്മിനൽ 2022 ആഗസ്റ്റിൽ പ്രവർത്തന സജ്ജമാകും. ടെർമിനൽ സൈറ്റിൽ നടത്തിയ സന്ദർശനത്തിന് ശേഷം ആസൂത്രണകാര്യ മന്ത്രി മര്യം അഖീലാണ് ഇക്കാര്യം അറിയിച്ചത്. 36 ശതമാനം ടെർമിനലിന്റെ നിർമ്മാണ ജോലികൾ പൂര്ത്തീകരിച്ചതായും മന്ത്രി പറഞ്ഞു.
ബ്രിട്ടൻ കമ്പനിയായ ഫോസ്റ്റർ ആൻഡ് പാർട്ണേഴ്സ് ആണ് പദ്ധതിയുടെ രൂപരേഖ തയറാക്കിയത്. ചിറകുകളുടെ രൂപത്തിൽ 1.2 കിലോ മീറ്റർ ദൈർഘ്യമുള്ള മൂന്നു ടെർമിനലുകളാണ് നവീകരണ ഭാഗമായി നിർമിക്കുന്നത്. 4,500 കാറുകൾക്ക് നിർത്തിയിടാൻ കഴിയുന്ന ബഹുനില പാർക്കിങ് സമുച്ചയം, ട്രാൻസിറ്റ് യാത്രക്കാർക്കുള്ള ബജറ്റ് ഹോട്ടൽ, വിശാലമായ അറൈവൽ-ഡിപ്പാർച്ചർ ഹാളുകൾ, അനുബന്ധ സൗകര്യങ്ങളോടുകൂടിയുള്ളതാകും പുതിയ ടെര്മിനല്.
1.3 ശതകോടി ദീനാർ ചെലവിലാണ് ലിമാക് രണ്ടാം ടെർമിനലിന്റെ നിർമാണം ഏറ്റെടുത്ത് നടത്തുന്നത്. പദ്ധതി പൂർത്തിയാവുന്നതോടെ കുവൈത്ത് അന്താരാഷ്ട്ര വിമാനത്താവളത്തിന് പ്രതിവർഷം രണ്ടര കോടി യാത്രക്കാരെ സ്വീകരിക്കാനാവും. നിലവിൽ 50 ലക്ഷം യാത്രക്കാരാണ് പ്രതിവർഷം വിമാനത്താവളം വഴി യാത്ര നടത്തിക്കൊണ്ടിരിക്കുന്നത്.
