ബെംഗളൂരു : രാജിക്കത്ത് നല്കിയിട്ടും അത് സ്വീകരിക്കാത്ത കര്ണാടക നിയമസഭാ സ്പീക്കറുടെ നടപടിക്കെതിരെ വിമത എംഎല്എമാര് സുപ്രീം കോടതിയെ ഹര്ജി നല്കി. രാഷ്ട്രീയ ലാഭത്തിന് വേണ്ടി സ്പീക്കര് തന്റെ ഭരണഘടനാപരമായ ബാധ്യതകള് മറക്കുന്നുവെന്ന് ആരോപിച്ചാണ് ഇവര് കോടതിയിലെത്തിയിരിക്കുന്നത്. അതേസമയം ഭൂരിപക്ഷം നഷ്ടപ്പെട്ട സഖ്യസര്ക്കാരിനെ രക്ഷിക്കാന് സ്പീക്കര് ബോധപൂര്വം തങ്ങളുടെ രാജി വൈകിപ്പിക്കുകയാണെന്നും ഇവര് ആരോപിക്കുന്നുക്കുന്നുണ്ട്.
ആറുദിവസത്തിനുള്ളില് എം.എല്.എമാരുടെ രാജിക്കത്തില് തീരുമാനമെടുക്കുമെന്നാണ് സ്പീക്കര് കെ.ആര്.രമേശിന്റെ നിലപാട്. അവര് സ്വമേധയാ രാജിവച്ചതാണെന്ന് ബോദ്ധ്യപ്പെട്ടാലേ താന് രാജി സ്വീകരിക്കൂ എന്ന് അദ്ദേഹം പറഞ്ഞു. കേസ് അടിയന്തരമായി പരിഗണിക്കണമെന്ന് ആവശ്യപ്പെട്ട് ഇവര് ചീഫ് ജസ്റ്റിസ് രഞ്ജന് ഗോഗോയിയെ സമീപിച്ചെങ്കിലും ഹര്ജി നാളെ മാത്രമേ പരിഗണിക്കൂ എന്നാണ് അറിയുന്നത്.
അതിനിടെ രാജിവച്ച എംഎല്എ മാരെ കാണാന് മുംബയിലെത്തിയ കര്ണാടകയിലെ കോണ്ഗ്രസ് നേതാവും ജലസേചന വകുപ്പുമന്ത്രിയുമായിരുന്ന ഡി.കെ. ശിവകുമാറിനെ പോലീസ് തടഞ്ഞു. കര്ണ്ണാടക മുഖ്യമന്ത്രി കുമാര സ്വാമിയും, കോണ്ഗ്രസ് നേതാവ്ശിവകുമാറും തങ്ങളെ ഭീഷണിപ്പെടുത്താനാണ് അവര് വരുന്നതെന്നും ഹോട്ടലിലേക്ക് വരാന് അവരെ അനുവദിക്കരുതെന്നും ആവശ്യപ്പെട്ട് എംഎല്എമാര് മുംബൈ പോലീസ് കമ്മിഷണര്ക്ക് നല്കിയ കത്തിന്റെ അടിസ്ഥാനത്തിലാണ് ശിവകുമാറിനെ തടഞ്ഞത്.
അടിയന്തര സാഹചര്യങ്ങള് കണക്കിലെടുത്ത് ഹോട്ടല് അധികൃതരും ശിവകുമാറിന്റെ ബുക്കിങ് റദ്ദാക്കി. തങ്ങള് ഒരുമിച്ച് രാഷ്ട്രീയത്തില് പ്രവേശിച്ചവരാണെന്നും ചില അഭിപ്രായ വ്യത്യാസങ്ങളുണ്ടായെന്നും അതുപറഞ്ഞ് തീര്ക്കാനാണ് തങ്ങള് വരുന്നതെന്നും ശിവകുമാര് അറിയിച്ചെങ്കിലും പോലീസ് അത് മുഖവിലയ്ക്കെടുത്തില്ല.
എന്നാല് തന്റെ ഭരണഘടനാപരമായ അവകാശങ്ങളെ മഹാരാഷ്ട്ര പോലീസ് തടയുകയാണ്. എംഎല്എമാരെ കാണാതെ താന് പിന്നോട്ട് പോകില്ലെന്നും അദ്ദേഹം അറിയിച്ചു. കര്ണാടക മുഖ്യമന്ത്രി കുമാരസ്വാമിയും ശിവകുമാറും എംഎല്എ മാരെ കാണുന്നതിനായി മുംബൈയിലേക്ക് പുറപ്പെട്ടിട്ടുണ്ട്.
ഏഴ് കോണ്ഗ്രസ് എംഎല്എമാരും മൂന്ന് ജെഡിഎസ് എംഎല്എമാരുമാണ് മുംബൈയിലെ ഹോട്ടലില് കഴിയുന്നത്. ശിവറാം ഹെബ്ബാര്, പ്രതാപ് ഗൗഡപാട്ടില്, ബി.സി. പാട്ടീല് , ഖൈരിബസവരാജ്, എസ്.ടി. സോമശേഖര്, രമേശ് ജാര്ഖിഹോള, ഗോപാലയ്യ, എച്ച്. വിശ്വനാഥ്, നാരായണഗൗഡ, മഹേഷ് കുമുതാലി എന്നീ എംഎല്എമാരാണ് സിറ്റി പോലീസ് കമ്മിഷണര്ക്ക് കത്ത് നല്കിയത്.
സംസ്ഥാനത്തെ ഭരണ പ്രതിസന്ധിയെ തുടര്ന്ന് ബെംഗളൂരു വിധാന്സൗദയ്ക്ക് മുന്നില് ഇന്ന് ബിജെപി നേതാവ് ബി.എസ്. യെദ്ദ്യൂരപ്പയുടെ നേതൃത്വത്തില് പ്രതിഷേധ ധര്ണ ആരംഭിച്ചു. തങ്ങള് ഗവര്ണറെയും സ്പീക്കറെയും കാണുമെന്നും യെദ്യൂരപ്പ അറിയിച്ചു. മുന് മന്ത്രി റോഷന് ബെയ്ഗ് കൂടി രാജിവച്ചതോടെ ജെഡിഎസ് – കോണ്ഗ്രസ് സഖ്യത്തിന്റെ അംഗസംഖ്യ 102 ആയി കുറഞ്ഞു. എന്നാല് ബിജെപിക്ക് 108 അംഗങ്ങളുടെ പിന്തുണയുണ്ട്.
