ന്യൂദല്‍ഹി : പാര്‍ലമെന്റില്‍ പ്രധാനമന്ത്രിയേയും കേന്ദ്ര മന്ത്രിമാരേയും പ്രതിരോധിക്കുന്നതിനായി എംപിമാര്‍ക്ക് ക്ലാസ്സെടുക്കാനൊരുങ്ങി കോണ്‍ഗ്രസ് നേതൃത്വം. ലോക്സഭയില്‍ കോണ്‍ഗ്രസ് എംപിമാര്‍ എങ്ങനെയിടപെടണമെന്ന് കോണ്‍ഗ്രസ് പാര്‍ലമെന്ററി പാര്‍ട്ടി യോഗം ചേര്‍ന്ന് പഠിപ്പിച്ചു തരും. പാര്‍ലമെന്റില്‍ ഉന്നയിക്കുന്ന വിവിധ വിഷയങ്ങളില്‍ മന്ത്രിമാരേയും ഭരണകക്ഷി നേതാക്കളേയും നിരന്തരം പ്രതിരോധിക്കണമെന്ന് രാഹുല്‍ ഗാന്ധി നിര്‍ദ്ദേശ പ്രകാരമാണ് ഈ പുതിയ തീരുമാനം.
ഇതിനായി സോണിയ ഗാന്ധിയുടെയും രാഹുല്‍ ഗാന്ധിയുടെയും നേതൃത്വത്തില്‍ പാര്‍ലമെന്റ് മന്ദിരത്തില്‍ ചൊവ്വാഴ്ച എംപിമാരുടെ യോഗം ചേര്‍ന്നിരുന്നു. ഇതിലാണ് സഭയില്‍ അവതരിപ്പിക്കുന്ന വിഷയങ്ങളില്‍ പാര്‍ട്ടി നിലപാട് എന്താണെന്നും, എന്ത് നിലപാട് സ്വീകരിക്കണമെന്നും എംപിമാരെ മുന്‍ കൂട്ടി പഠിപ്പിക്കാന്‍ തീരുമാനിച്ചത്.
സഭ സമ്മേളിക്കുന്ന ദിവസങ്ങളിലെല്ലാം ഇനി കോണ്‍ഗ്രസ് പാര്‍ലമെന്ററി പാര്‍ട്ടി (സിപിപി) യോഗം ചേരും. ലോക്സഭയിലെ കക്ഷിനേതാവ് അധീര്‍ രഞ്ജന്‍ ചൗധരിയുടെ നേതൃത്വത്തില്‍ ദിവസവും 10.30 നാണ് സിപിപി യോഗം. ആഴ്ചയിലൊരിക്കല്‍ വീതം സോണിയയും രാഹുലും പങ്കെടുക്കും.
എംപിമാര്‍ സ്വന്തം മണ്ഡലങ്ങളിലെ വിഷയങ്ങള്‍ മാത്രം ഉന്നയിച്ചാല്‍ പോരാ. ദേശീയ പ്രാധാന്യമുള്ള വിഷയങ്ങളും അവതരിപ്പിച്ച് മങ്ങിയ ജന വിശ്വാസം നേടിയെടുക്കാനും, കേന്ദ്ര മന്ത്രിസഭയ്‌ക്കു നേരെ നിരന്തരം പ്രതിരോധങ്ങള്‍ ഉയര്‍ത്താന്‍ ശ്രമിക്കണമെന്നും രാഹുല്‍ കോണ്‍ഗ്രസ് നേതാക്കള്‍ക്ക് കര്‍ശ്ശന നിര്‍ദ്ദേശം നല്‍കിയിട്ടുണ്ട്.
സഭയില്‍ സര്‍ക്കാരിനെ കടന്നാക്രമിക്കാന്‍ മറ്റു പ്രതിപക്ഷ കക്ഷികളുമായുള്ള സഹകരണം കാര്യക്ഷമമാക്കണമെന്നും സോണിയ ചൂണ്ടിക്കാട്ടി. വിവിധ കക്ഷി നേതാക്കളുമായി നിരന്തര ആശയവിനിമയം നടത്തണം. സഭയിലെ കോണ്‍ഗ്രസ് കക്ഷി നേതാവ് അധീര്‍ രഞ്ജന്‍ ചൗധരിക്കായിരിക്കും ഇതിന്റെ ചുമതല. ഡിഎംകെ, ഇടതു കക്ഷികള്‍, തൃണമൂല്‍ എന്നിവയുമായി പരമാവധി സഹകരണം ഉറപ്പാക്കണം. തന്ത്രങ്ങളും നിലപാടുകളും രൂപീകരിക്കാന്‍ ദിവസേന രാവിലെ എംപിമാര്‍ യോഗം ചേരണമെന്നും സോണിയ നിര്‍ദേശിച്ചു.
പ്രധാനമന്ത്രി നരേന്ദ്രമോദിക്കു നേരെ കടുത്ത വിമര്‍ശനങ്ങള്‍ ഉന്നയിക്കുകയും വ്യാജ ആരോപണങ്ങള്‍ പ്രചരിപ്പിച്ചും ലോക്‌സഭാ തെരഞ്ഞെടുപ്പില്‍ ദയനീയ പരാജയം അല്ലാതെ കോണ്‍ഗ്രസ്സിന് ഒന്നും നേടാനായില്ല. പകരം രാഹുലിന് സ്വന്തം മണ്ഡലമായ അമേത്തി നഷ്ടപ്പെടുകയും വ്യാജ പ്രചാരണങ്ങള്‍ നടത്തിയതിന് രാജ്യത്തെ വിവിധ കോടതികളിലായി അഞ്ചോളം അപകീര്‍ത്തിക്കേസുകളില്‍ ഉള്‍പ്പെടുകയുമാണ് ഉണ്ടായത്. ഇതോടെയാണ് രാഹുല്‍ പുതിയ അടവുമായി എംപിമാര്‍ക്ക് ക്ലാസ് നല്‍കി അവരെ പറഞ്ഞു പഠിപ്പിച്ച് പാര്‍ലമെന്റിലെങ്കിലും പ്രതിരോധിക്കാന്‍ തീരുമാനിച്ചിരിക്കുന്നത്.
