ബെംഗളൂരു: കര്‍ണ്ണാടകയില്‍ ഭൂരിപക്ഷം നഷ്ടപ്പെട്ട എച്ച്.ഡി. കുമാരസ്വാമി എത്രയും പെട്ടന്ന് രാജിവെയ്‌ക്കണമെന്ന് ബിജെപി നേതാവ് ശോഭ കരന്തലജെ. കോണ്‍ഗ്രസ്- ജെഡിഎസ് സഖ്യത്തില്‍ ഉള്‍പ്പെട്ട 15 എംഎല്‍എമാര്‍ കഴിഞ്ഞ ദിവസം രാജി വെച്ചതോടെ സര്‍ക്കാരിന് കേവല ഭൂരിപക്ഷം നഷ്ടപ്പെടുകയും സംസ്ഥാന ഭരണം തന്നെ കുറച്ച് ദിവസങ്ങളായി പ്രതിസന്ധിയിലാണ്.
ഭൂരിപക്ഷം തെളിയിക്കാന്‍ പറ്റാത്ത സാഹചര്യത്തില്‍ മുഖ്യന്ത്രി രാജി വെയ്‌ക്കുകയാണ് വേണ്ടതെന്നും കുമാരസ്വാമി അവര്‍ അറിയിച്ചു. ഒരു എംഎല്‍എ കൂടി രാജിവച്ചതോടെ ഭരണം നിലനിര്‍ത്താമെന്ന കോണ്‍ഗ്രസ്- ജെഡിഎസ് സഖ്യത്തിന്റെ ആഗ്രഹം അവസാനമായി.
അതേസമയം വിമത എംഎല്‍എമാരുടെ രാജിക്ക് പിന്നില്‍ ബിജെപിയാണെന്ന ആരോപണം തെറ്റാണെന്ന് ശോഭ അറിയിച്ചു. കോണ്‍ഗ്രസ്- ജെഡിഎസ് വിമത എംഎല്‍എമാരുമായി ഇതുവരെ സംസ്ഥാന നേതൃത്വം ബന്ധപ്പെട്ടിട്ടില്ല. എന്നാല്‍ ഇവരില്‍ ആരെങ്കിലും ബിജെപിയില്‍ ചേരാനായി സന്നദ്ധത അറിയിച്ചാല്‍ പാര്‍ട്ടി അവരെ സ്വീകരിക്കുമെന്നും ശോഭ വ്യക്തമാക്കി. രാജിവെച്ച മന്ത്രിയും സ്വതന്ത്ര അംഗവുമായ നാഗേഷിനെയും സ്വാഗതം ചെയ്യുന്നതായും അവര്‍ അറിയിച്ചു.
അതിനിടെ കര്‍ണാടകത്തില്‍ ഏതുവിധേനയും ഭരണം നിലനിര്‍ത്തുന്നതിനായി കോണ്‍ഗ്രസ്സും തന്ത്രങ്ങള്‍ മെനയാന്‍ ആരംഭിച്ചു. കര്‍ണാടകത്തിന്റെ ചുമതലയുള്ള എഐസിസി ജനറല്‍ സെക്രട്ടറി കെ.സി. വേണുഗോപാലിന്റെയും ഡി.കെ. ശിവകുമാറിന്റെയും നേതൃത്വത്തിലാണ് സര്‍ക്കാരിനെ രക്ഷിച്ചെടുക്കാനുള്ള ഗൂഢാലോചനകള്‍ നടന്നുവരുന്നത്. ഇതിനായി വിമതര്‍ക്ക് മന്ത്രി പദവി വരെ എഐസിസി വാഗ്ദാനം ചെയ്തിട്ടുണ്ട്.
എന്നാല്‍ അവര്‍ ഇതുവരെ അതിന് അനുകൂലമായി പ്രതികരിച്ചിട്ടില്ല. മന്ത്രിസഭ പുനസംഘടിപ്പിക്കുമെന്ന് ഡി.കെ ശിവകുമാറിന്റെ സഹോദരന്‍ ഡി.കെ. സുരേഷും അറിയിച്ചു.
വിമത നീക്കത്തിന് നേതൃത്വം കൊടുക്കുന്ന മുന്‍ ആഭ്യന്തരമന്ത്രി രാമലിംഗ റെഡ്ഡിക്ക് ഉപമുഖ്യമന്ത്രി സ്ഥാനം നല്‍കുന്നതിനുള്ള നിര്‍ദ്ദേശവും ഭരണം നിലനിര്‍ത്താനായി ഇരുമുന്നണികളും മുന്നോട്ടുവെച്ചിട്ടുണ്ട്. ഇതിനായി പാര്‍ട്ടി ആവശ്യപ്പെട്ടാല്‍ രാജിവെക്കാന്‍ തയ്യാറാണെന്ന് ഉപമുഖ്യമന്ത്രി ജി.പരമേശ്വരയും അറിയിച്ചു. മുഖ്യമന്ത്രി പദത്തിലേക്ക് ഇരു മുന്നണികളും കുമാര സ്വാമിയെത്തന്നെയാണ് പരിഗണിക്കുന്നത്.
