തിരുവനന്തപുരം : കോണ്ഗ്രസ്സില് തമ്മിലടി രൂക്ഷമാകുന്നു. പി. വി. അന്വര് എംഎല്എയെ നിയമസഭ പരിസ്ഥിതി സമിതിയില് നിന്ന് മാറ്റണമെന്ന് കെപിസിസി മുന് പ്രസിഡന്റ് വി.എം. സുധീരന് സ്പീക്കര്ക്ക് കത്ത് നല്കിയതോടെയാണ് പാര്ട്ടിക്കുള്ളിലെ പോര് പുറത്തുവന്നത്. അന്വറിന്റെ ഭാര്യാ പിതാവിന്റെ ഉടമസ്ഥതയിലുള്ള ചീങ്കണ്ണിപ്പാലയിലെ തടയണ പൊളിക്കണമെന്ന ഹൈക്കോടതി ഉത്തരവിന്റെ അടിസ്ഥാനത്തിലാണ് സുധീരന്റെ ആവശ്യം.
ഏതാനും ദിവസങ്ങള്ക്ക് മുമ്പാണ് ചീങ്കണ്ണിപ്പാലയിലെ തടയണ പൊളിച്ച് മാറ്റാന് ഹൈക്കോടതി ഉത്തരവിട്ടത്. മുന് ഉത്തരവുകള് നടപ്പാക്കാതിരുന്നതിനെ തുടര്ന്ന് നേരത്തേ ഹൈക്കോടതി ചീഫ് ജസ്റ്റിസ് അധ്യക്ഷനായ ഡിവിഷന് ബെഞ്ച് തടയണ പൊളിക്കാന് കര്ശന നിര്ദ്ദേശം നല്കിയിരുന്നു. തടയണയുടെ വശംപൊളിച്ചു വെള്ളം ഒഴുക്കിവിടണമെന്നും ഉത്തരവ് നടപ്പാക്കിയില്ലെങ്കില് പ്രത്യാഘാതം അനുഭവിക്കേണ്ടി വരുമെന്നും ഡിവിഷന് ബെഞ്ച് വ്യക്തമാക്കിയിരുന്നതാണ്. എന്നിട്ടും ഉത്തരവ് നടപ്പാക്കാതിരുന്ന പശ്ചാത്തലത്തില് സര്ക്കാരിനോട് തടയണ പൊളിച്ചുനീക്കാന് കോടതി ആവശ്യപ്പെടുകയായിരുന്നു.
കക്കാടംപൊയിലില് അന്വറിന്റെ വാട്ടര് തീം പാര്ക്കിലേക്ക് വേനല്കാലത്ത് വെള്ളമെത്തിക്കാന്കൂടി ഉദ്ദേശിച്ചുള്ളതായിരുന്നു ഈ തടയണ. ചീങ്കണ്ണിപ്പാലയിലെ ബോട്ടിങ് കേന്ദ്രത്തിലേക്കും വെള്ളം ഉപയോഗിച്ചിരുന്നു. സമീപത്തെ കരിമ്പ് ആദിവാസി കോളനിയിലേക്കുള്ള നീരൊഴുക്ക് തടഞ്ഞായിരുന്നു എംഎല്എ ഈ തടയണ നിര്മിച്ചത്. പ്രതിഷേധം ശക്തമായതോടെ 2015ല് അന്നത്തെ മലപ്പുറം കളക്ടര് ടി. ഭാസ്കരന് തടയണ പൊളിക്കാന് ഉത്തരവിട്ടതോടെ പി.വി. അന്വര് ഈ സ്ഥലം ഭാര്യാപിതാവിന്റെ പേരിലേക്ക് അന്വര് മാറ്റുകയായിരുന്നു.
