സര്‍ദാര്‍ വല്ലഭായി പട്ടേലിന്റെ പ്രതിമ ചോരുന്നെന്ന വാര്‍ത്ത തെറ്റ്; സന്ദര്‍ശകര്‍ക്ക് ആസ്വദിക്കുന്നതിനായുള്ള തുറന്ന ഗാലറിയിലൂടെയാണ് വെള്ളം അകത്തു കയറിയതെന്ന് അധികൃതര്‍, വെള്ളം പെട്ടന്നു തന്നെ കളയാനും പ്രതിമയില്‍ സംവിധാനമുണ്ട്

അഹമ്മദാബാദ് : 3000 കോടി മുതല്‍ മുടക്കില്‍ നര്‍മ്മദാ നദീ തീരത്ത് നിര്‍മിച്ച സര്‍ദാര്‍ വല്ലഭായി പട്ടേലിന്റെ പടുകൂറ്റന്‍ പ്രതിമ ചോരുന്നതായി സമൂഹ മാധ്യമങ്ങളിലെ വാര്‍ത്ത തെറ്റെന്ന് അധികൃതര്‍. സന്ദര്‍ശകര്‍ക്ക് ദൃശ്യഭംഗി ആസ്വദിക്കുന്നതിനായി ഗാലറിയുടെ മുന്‍ വശം തുറന്നു കിടക്കുന്ന വിധത്തിലാണ് നിര്‍മിച്ചിരിക്കുന്നത്. അതിനാലാണ് മഴവെള്ളം പ്രതിമയ്‌ക്ക് അകത്തു കയറിയത്. ചെറിയൊരു മഴയത്ത് തന്നെ തുറന്നു കിടക്കുന്നതിനാല്‍ അകത്തു കയറും. എന്നാല്‍ പെട്ടന്നു തന്നെ വെള്ളം പുറത്തു കളയുന്നതിവുള്ള വഴിയും ഒരുക്കിയാണ് പ്രതിമ നിര്‍മിച്ചതെന്നും ജില്ലാ കളക്ടര്‍ അറിയിച്ചു.

ട്വിറ്ററിലൂടേയും അധികൃതര്‍ ഇതിന് മറുപടി നല്‍കിയിട്ടുണ്ട്. സര്‍ദാര്‍ സരോവര്‍ അണക്കെട്ടിനോട് ചേര്‍ന്ന് 3000 കോടിയോളം രൂപ മുടക്കി നിര്‍മിച്ച സര്‍ദാര്‍ വല്ലഭായി പട്ടേലിന്റെ പ്രതിമ ചോരുന്നതായി സോഷ്യല്‍ മീഡിയയില്‍ വലിയ പ്രചാരണമാണ് നടക്കുന്നത്. ഒബ്‌സര്‍വേഷന്‍ ഗാലറിയിലെ തറയില്‍ വെള്ളം തളംകെട്ടി കിടക്കുന്നതും മുകളില്‍ നിന്നും വെള്ളം താഴേക്ക് ഒലിക്കുന്നതുമാണ് വീഡിയോയില്‍ കാണുന്നത്. അതേസമയം പ്രതിമയുടെ ഒരു ഭാഗം തുറന്നും കിടക്കുന്നതും വെള്ളം അതുവഴിയാണ് കയറുന്നതെന്നും വീഡിയോയില്‍ നിന്നു തന്നെ മനസിലാക്കാവുന്നതാണ്. 

പ്രതിമയുടെ നെഞ്ചിന്റെ ഭാഗത്തായാണ് സന്ദര്‍ശക ഗാലറി സ്ഥാപിച്ചിരിക്കുന്നത്. രൂപകല്‍പന അനുസരിച്ച് ഇതിന്റെ മുന്‍ഭാഗത്ത് ഗ്രില്ലുകള്‍ മാത്രമാണ് ഉള്ളത്. എന്നാല്‍ പിന്‍വശത്ത് ഗ്ലാസുകള്‍ ഉപയോഗിച്ചിട്ടുണ്ട്. സന്ദര്‍ശകര്‍ക്ക് കാഴ്ചകള്‍ കൂടുതല്‍ ആസ്വദിക്കുന്നതിന് വേണ്ടിയാണ് മുന്‍ഭാഗത്ത് ഗ്ലാസുകള്‍ ഒഴിവാക്കിയതെന്നും അധികൃതര്‍ പറയുന്നു.

മഴപെയ്യുമ്പോള്‍ അകത്ത് കയറുന്ന വെള്ളം പുറത്തേക്ക് കളയാന്‍ മാര്‍ഗമൊരുക്കിയിട്ടുണ്ട്. എന്നാല്‍ കാറ്റ് ശക്തമാവുകയാണെങ്കില്‍ കൂടുതല്‍ മഴവെള്ളം അകത്തേക്ക് കയറും. ഇതിന് അവിടെ നിയോഗിച്ചിട്ടുള്ള ജീവനക്കാര്‍ മതിയായ നടപടികള്‍ സ്വീകരിച്ചുകൊള്ളുമെന്നും ഇങ്ങനെ അടിച്ച് കയറുന്ന വെള്ളം ഒഴുക്കിക്കളയാന്‍ പൈപ്പുകള്‍ ഉണ്ട്. ഇതാണ് ഇപ്പോള്‍ സംഭവിക്കുന്നത്. ഇത് ആളുകള്‍ പറയുംപോലെ ചോര്‍ച്ചയല്ലെന്നും അധികൃതര്‍ അറിയിച്ചു.

33,000 ടണ്‍ ഉരുക്ക് ഉപയോഗിച്ചാണ് ഇന്ത്യയുടെ ഉരുക്കുമനുഷ്യന്റെ പ്രതിമ തീര്‍ത്തത്. ഇതോടനുബന്ധിച്ചു പട്ടേലിന്റെ ജീവിത മുഹൂര്‍ത്തങ്ങള്‍ ഉള്‍ക്കൊള്ളിച്ചുള്ള ലേസര്‍ ലൈറ്റ്, സൗണ്ട് ഷോ, 500 അടി ഉയരത്തില്‍നിന്നു സര്‍ദാര്‍ സരോവര്‍ അണക്കെട്ടു കാണാനുള്ള സൗകര്യം, മ്യൂസിയം എന്നിവയെല്ലാം ഒരുക്കിയിട്ടുണ്ട്. ലോകത്തിലെ തന്നെ ഏറ്റവും ഉയരം കൂടിയ പ്രതിമയാണ് സര്‍ദാര്‍ വല്ലഭായി പട്ടേലിന്റെ പ്രതിമ.