ഒസാക്ക: ജി 20 ഉച്ചകോടിക്ക് മുന്നോടിയായി പ്രാധാനമന്ത്രി നരേന്ദ്രമോദിയും യു.എസ് പ്രസിഡന്റ് ഡൊണാള്ഡ് ട്രംപും ജപ്പാനിലെ ഒസാക്കയില് കൂടിക്കാഴ്ച നടത്തി. ഇരുരാജ്യങ്ങള്ക്കുമിടയിലുള്ള വ്യാപാര തടസ്സങ്ങള് നീക്കാനുള്ള മാര്ഗങ്ങള് ചര്ച്ചയായി. പ്രതിരോധ മേഖലയിലെ സഹകരണവും ചര്ച്ചചെയ്തു.
തിരഞ്ഞെടുപ്പ് വിജയത്തില് മോദിയെ ഡൊണാള്ഡ് ട്രംപ് അഭിനന്ദിച്ചു. ബ്രിക്സ് രാഷ്ട്രത്തലവന്മാരുമായും പ്രധാനമന്ത്രി കൂടിക്കാഴ്ച നടത്തി. ലോകവ്യാപാര സംഘടനയുടെ നയങ്ങളില് പരിഷ്ക്കരണം വേണമെന്ന് മോദി ആവശ്യമുന്നയിച്ചു. ഏകപക്ഷീയ നയങ്ങളാണ് ആഗോള സമ്പദ്വ്യവസ്ഥയെ നയിക്കുന്നത്. എല്ലാവര്ക്കും തുല്യപരിഗണന ലഭിക്കണമെന്നും മോദി പറഞ്ഞു.
വ്യാപാര മുന്ഗണനാ പട്ടികയില് നിന്ന് അമേരിക്ക ഇന്ത്യയെ ഒഴിവാക്കിയത് ചര്ച്ചയില് ഇന്ത്യ ഉന്നയിച്ചു എന്നാണ് സൂചന. അമേരിക്കന് ഉല്പ്പന്നങ്ങള്ക്ക് ഏര്പ്പെടുത്തിയ അധിക ഇറക്കുമതി തീരുവ ഇന്ത്യ പിന്വലിക്കണമെന്ന് ഇന്നലെ ട്രംപ് നിലപാട് കടുപ്പിച്ചിരുന്നു. അമേരിക്കന് ഉല്പ്പന്നങ്ങളുടെ അധിക ഇറക്കുമതി തീരുവ അംഗീകരിക്കാനാവില്ലെന്നും മോദിയുമായുള്ള ചര്ച്ചയില് ഇക്കാര്യമുന്നയിക്കുമെന്നും ട്രംപ് ഇന്നലെ ട്വീറ്റ് ചെയ്തിരുന്നു.
വര്ഷങ്ങളായി തുടരുന്ന വ്യാപാര മുന്ഗണനാപ്പട്ടികയില് നിന്ന് ഇന്ത്യയെ അമേരിക്ക ഒഴിവാക്കിയത് ഇന്ത്യക്കും തിരിച്ചടിയായിരുന്നു. ഈ പശ്ചാത്തലത്തില് ഇരു രാജ്യങ്ങളും തമ്മിലുള്ള ഇന്നത്തെ ചര്ച്ച നിര്ണ്ണായകമാണ്. ഇന്ത്യ, ചൈന, യുഎസ് വ്യാപാര ബന്ധം മെച്ചപ്പെടുത്താനുള്ള ത്രിരാഷ്ട്ര ചര്ച്ചയും ഇന്ന് നടക്കും.
അമേരിക്കന് ഉപരോധം നിലനില്ക്കവെ ഇറാനില് നിന്ന് എണ്ണ ഇറക്കുമതി ചെയ്യാനുള്ള ഇന്ത്യന് തീരുമാനത്തിലും അമേരിക്ക വിയോജിച്ചു. പിന്നാലെ അമേരിക്കന് ഉല്പ്പന്നങ്ങള്ക്ക് ഇന്ത്യ അധിക തീരുവ ചുമത്തി. ഇക്കാര്യങ്ങളില് കഴിഞ്ഞ ദിവസം ദല്ഹിയിലെത്തിയ സ്റ്റേറ്റ് സെക്രട്ടറി മൈക്ക് പോംപിയോ നടത്തിയ പ്രാഥമിക ചര്ച്ചകളുടെ തുടര്ച്ചയാണ് ഇന്ന് ജപ്പാനിലുണ്ടാവുക.
