കണ്ണൂര് : ടി.പി ചന്ദ്രശേഖരന് വധക്കേസില് ജീവപര്യന്തം തടവുശിക്ഷ അനുഭവിച്ചുകൊണ്ടിരിക്കുന്ന കൊടി സുനി നഗരസഭാ കൗണ്സിലറെ മൊബൈൽ ഫോണിൽ വിളിച്ച് ഭീഷണിപ്പെടുത്തിയതായി പരാതി. കൊടുവള്ളി നഗരസഭാ കൗണ്സിലറും ഖത്തറില് സ്വര്ണ വ്യാപാരിയുമായ കോയിശേരി മജീദിനെ ഫോണ് വിളിച്ചാണ് കൊടി സുനി ഭീഷണിപ്പെടുത്തിയത്.
സംഭവവുമായി ബന്ധപ്പെട്ട് മജീദ് ഇന്ന് ഖത്തറിലെ ഇന്ത്യന് എംബസിയില് പരാതി നല്കും. മജീദിന്റെ ഭാര്യ താമരശേരി ഡിവൈഎസ്പിക്കും ഇതുസംബന്ധിച്ച് ഇന്ന് പരാതി നല്കുന്നുണ്ട്. കഴിഞ്ഞ മാസം 23നായിരുന്നു പരാതിക്കാസ്പദമായ സംഭവം. ഖത്തറില് തന്റെ ഏജന്റ് കൊണ്ടുവരുന്ന സ്വര്ണം രേഖകളില്ലാതെ വാങ്ങണമെന്ന സുനിയുടെ ആവശ്യം അംഗീകരിക്കാത്തതിനെ തുടര്ന്നാണ് ഭീഷണിപ്പെടുത്തിയതെന്ന് മജീദ് പറയുന്നു.
സെന്ട്രല് ജയിലില് നിന്നാണ് വിളിക്കുന്നതെന്നും തന്റെ ആവശ്യം അംഗീകരിച്ചില്ലെങ്കില് വീട്ടില് കയറി ആക്രമിക്കുമെന്നും സുനി ഭീഷണിപ്പെടുത്തിയതായി മജീദ് പറഞ്ഞു. ഉടന് നാട്ടിലെത്തുമെന്നും സംഭവത്തെക്കുറിച്ച് ഡിജിപിക്ക് നേരിട്ട് പരാതി നല്കുമെന്നും മജീദ് അറിയിച്ചു.
