ന്യൂദല്ഹി : യോഗദിനത്തില് സൈന്യത്തെ അപമാനിച്ച രാഹുല് ഗാന്ധിയുടെ ട്വീറ്റിനെ രൂക്ഷമായി വിമര്ശിച്ച് കേന്ദ്ര ആഭ്യന്തരമന്ത്രി അമിത് ഷാ.
നെഗറ്റീവ് ചിന്തകളാണ് കോണ്ഗ്രസും അതിന്റെ അദ്ധ്യക്ഷനും പരത്തുന്നതെന്ന് അദ്ദേഹം ചൂണ്ടിക്കാട്ടി. മുത്തലാഖിനെ പിന്തുണച്ചപ്പോഴും കോണ്ഗ്രസിന്റെ ഈ നെഗറ്റിവിറ്റി കണ്ടതാണ്. ഇപ്പോള് യോഗാ ദിനത്തേയും സൈന്യത്തേയും അവര് വിമര്ശിക്കുയാണെന്ന് അദ്ദേഹം വിമര്ശിച്ചു.
നേരത്തെ ഇന്ത്യന് സൈന്യത്തിന്റെ ഡോഗ് സ്ക്വാഡ് വ്യായാമം ചെയ്യുന്ന ചിത്രത്തെ പരിഹസിച്ചു കൊണ്ടാണ് രാഹുല് ട്വീറ്റ് ചെയ്തിരുന്നു.
സമൂഹമാധ്യമങ്ങളില് സൈന്യം പോസ്റ്റ് ചെയ്ത ഡോഗ് സ്ക്വാഡും അവരുടെ പരിശീലകരും യോഗ ചെയ്യുന്ന ചിത്രത്തെ ന്യൂ ഇന്ത്യ (പുതിയ ഇന്ത്യ) എന്ന പരാമര്ശത്തോടെ പരിഹാസരൂപേണ രാഹുല് ട്വീറ്റ് ചെയ്യുകയായിരുന്നു.
പുതിയ ഇന്ത്യ എന്നത് രണ്ടാം മോദി സര്ക്കാരിന്റെ നയമാണ്. പ്രധാനമന്ത്രി പ്രസംഗങ്ങളില് ഈ വാക്ക് ആവര്ത്തിച്ച് പറയാറുമുണ്ട്. ഇതിനെ കളിയാക്കുകയായിരുന്നു രാഹുല്.
ഇന്ത്യയുടെ ശ്രമഫലമായി ലോകം മുഴുവന് യോഗാ ദിനം ആചരിക്കുമ്പോഴാണ് പ്രധാന പ്രതിപക്ഷ പാര്ട്ടിയുടെ നേതാവ് പരിഹാസവുമായി രംഗത്തെത്തിയത്. ഇന്ത്യന് സംസ്കാരത്തെ അപമാനിക്കുകയാണ് രാഹുല് ചെയ്തതെന്നും വിമര്ശനമുയര്ന്നു.
രാഹുല് ഇപ്പോഴും പാഠം പഠിച്ചിട്ടില്ലെന്ന് ബിജെപി എംപി തേജസ്വി സൂര്യ വ്യക്തമാക്കി. നമ്മുടെ സൈന്യത്തേയും ശ്വാന വിഭാഗത്തേയും യോഗാ പാരമ്പര്യത്തേയും രാജ്യത്തിനേയുമെല്ലാം രാഹുല് അപമാനിക്കുയാണ്. ഇത്തരമൊരു നേതാവാണല്ലോ അവരെ നയിക്കുന്നതെന്ന കാര്യമോര്ത്ത് യുവ കോണ്ഗ്രസ് പ്രവര്ത്തകരോട് തനിക്ക് സഹതാപം തോന്നുന്നെന്നും തേജസ്വി സൂര്യ വിമര്ശിച്ചിരുന്നു.
