ന്യൂദല്ഹി: പ്രതിപക്ഷം അവരുടെ എണ്ണത്തെപ്പറ്റി ആകുലപ്പെടേണ്ടതില്ലെന്ന് പ്രധാനമന്ത്രി നരേന്ദ്രമോദി. അവര് സഭാ നടപടികളില് സജീവമായി ഇടപെടുകയും പങ്കെടുക്കുകയും ചെയ്യുമെന്നാണ് തന്റെ പ്രതീക്ഷയെന്നും മോദി പറഞ്ഞു. ലോക്സഭ ചേരുന്നതിനു മുന്നോടിയായി മാധ്യമങ്ങളെ കണ്ടാണ് മോദിയുടെ പ്രതികരണം.
പാര്ലമെന്റ് സെഷന് ഫലപ്രദമായിരിക്കുമെന്ന് പ്രതീക്ഷിക്കുന്നുവെന്നും മോദി പറഞ്ഞു. സഭയിലായിരിക്കുമ്പോള് എല്ലാ എം.പിമാരും രാജ്യത്തെക്കുറിച്ച് ചിന്തിക്കണമെന്നും രാജ്യതാല്പര്യവുമായി ബന്ധപ്പെട്ട പ്രശ്നങ്ങളെ സംബോധന ചെയ്യണമെന്നും അദ്ദേഹം അഭ്യര്ഥിച്ചു. പാര്ലമെന്റിലെത്തുമ്പോള് നമ്മള് പക്ഷവും പ്രതിപക്ഷവും മറക്കണമെന്നും രാജ്യതാല്പര്യത്തിനു വേണ്ടി നിഷ്പക്ഷമായി നില്ക്കണമെന്നും മോദി പറഞ്ഞു.
പാര്ലമെന്റ് ജനാധിപത്യത്തിന്റെ പ്രതിപക്ഷ അഭിപ്രായത്തിന് സുപ്രധാന പങ്കുണ്ടെന്ന് നരേന്ദ്ര മോദി പറഞ്ഞു. പുതിയ പ്രതീക്ഷകളും സ്വപ്നങ്ങളും പാര്ലമെന്റിന്റെ പ്രഥമ സമ്മേളനത്തിനൊപ്പം തുടങ്ങുകയാണ്. സ്വാതന്ത്ര്യത്തിന് ശേഷം ഇതാദ്യമായാണ് ഇത്രയധികം വനിതകള് പാര്ലമെന്റ് അംഗങ്ങളാകുന്നതെന്നും അദ്ദേഹം ചൂണ്ടിക്കാട്ടി.
പ്രധാനമന്ത്രി നരേന്ദ്ര മോദി അടക്കമുള്ള അംഗങ്ങള് സത്യപ്രതിജ്ഞ ചെയ്തു.
