തൃശൂര്‍: ശങ്കരാചാര്യരുടെ ശിഷ്യന്‍ സ്ഥാപിച്ച തൃശൂര്‍ നടുവില്‍ മഠത്തില്‍ ഇളമുറ സ്വാമിയാരായി വേദജ്ഞനും പ്രഭാഷകനുമായ പ്രൊഫ. ഒറവങ്കര അച്യുതന്‍ നമ്പൂതിരിയെ അവരോധിക്കുന്ന ചടങ്ങുകള്‍ തുടങ്ങി. ഇതിന്റെ ഭാഗമായി അദ്ദേഹം സംന്യാസ ജീവിതത്തിലേക്ക് പ്രവേശിച്ചു. ഇന്നലെ രാവിലെ ഒമ്പതോടെ ആരംഭിച്ച ചടങ്ങുകള്‍ ഇന്ന് പൂര്‍ത്തിയാകും.
നടുവില്‍ മഠം മൂപ്പില്‍ സ്വാമിയാര്‍ നീലകണ്ഠ ഭാരതിയുടെ പിന്‍മുറക്കാരനായാണ് അച്യുതന്‍ നമ്പൂതിരിയെ അവരോധിക്കുന്നത്. ഇന്ന് ഉദയത്തിനു ശേഷമുള്ള ചടങ്ങോടെ ഒറവങ്കര അച്യുതന്‍ നമ്പൂതിരി ഇളമുറ സ്വാമിയാരാകും. രണ്ടു പതിറ്റാണ്ടിനു ശേഷമാണ് മഠത്തില്‍ ഇളമുറ സ്വാമിയാരുടെ അവരോധനം.
സന്യാസ അവരോധത്തോടനുബന്ധിച്ചുള്ള ചടങ്ങുകള്‍ ഇന്നലെ മുതല്‍ ഇന്നു പുലര്‍ച്ചെ വരെ വിവിധ ഘട്ടങ്ങളിലായാണ് നടന്നത്. സ്വന്തമായതെല്ലാം ഉപേക്ഷിച്ച് സര്‍വസ്വവും ദാനം ചെയ്ത് സംന്യാസ ജീവിതത്തിലേക്ക് പൂര്‍ണമായും മാറുന്നതോടെയാണ് അവരോധ ചടങ്ങുകള്‍ പൂര്‍ത്തിയാകുക. മൂപ്പില്‍ സ്വാമിയാര്‍ പരമേശ്വര ബ്രഹ്മാനന്ദ തീര്‍ത്ഥസന്യാസ അവരോധന ചടങ്ങുകള്‍ക്ക് നേതൃത്വം നല്‍കി.
തിരുവനന്തപുരം ശ്രീപത്മനാഭ സ്വാമി ക്ഷേത്രത്തില്‍ പുഷ്പാഞ്ജലി നടത്തുന്നതിനുള്ള അവകാശം നടുവില്‍ മഠം സ്വാമിയാര്‍ക്കാണ്. സംന്യാസ അവരോധ ചടങ്ങുകള്‍ പൂര്‍ത്തിയാക്കിയ ശേഷം പുതിയ സ്വാമിയാര്‍ ഇന്ന് തിരുവനന്തപുരത്തേക്ക് പോകും. ഇവിടെ നീലകണ്ഠ ഭാരതി സ്വാമിയാരുടെ സാന്നിധ്യത്തില്‍ ചില ചടങ്ങുകള്‍ പൂര്‍ത്തിയാക്കണം. തുടര്‍ന്ന് പത്മനാഭസ്വാമി ക്ഷേത്രത്തില്‍ പുഷ്പാഞ്ജലി സ്വാമിയാരായി അവരോധിക്കുന്ന ചടങ്ങ് നടക്കും.
