ജയ്‌പ്പൂര്‍: ഐപിഎല്ലില്‍ രാജസ്ഥാന്‍ റോയല്‍സിനെതിരായ വിജയത്തില്‍ ദല്‍ഹി ക്യാപിറ്റല്‍സിന് നിര്‍ണായകമായത് യുവതാരം ഋഷഭ് പന്തിന്റെ ഇന്നിങ്ങ്‌സ്. മധ്യനിരയില്‍ ഋഷഭ് പന്ത് ആഞ്ഞടിച്ചതോടെയാണ് രാജസ്ഥാനെതിരായ മത്സരത്തില്‍ ദല്‍ഹി ആറ് വിക്കറ്റിന്റെ വിജയം സ്വന്തമാക്കിയത്. പന്ത് 36 പന്തില്‍ നാല് സിക്‌സും ആരു ഫോറും അടക്കം 78 റണ്‍സ് നേടി പുറത്താകാതെനിന്നു.
നായകന്‍ ശ്രേയസ് അയ്യര്‍ പുറത്തായതോടെ ക്രീസിലെത്തിയ പന്ത്, ഓപ്പണര്‍ പൃഥ്വി ഷായ്‌ക്കൊപ്പം മൂന്നാം വിക്കറ്റില്‍ 84 റണ്‍സ് കൂട്ടിച്ചേര്‍ത്തു. ഇരുവരുടെയും ബാറ്റിങ്ങ് മികവാണ് ദല്‍ഹിയെ ലീഗിലെ ഏഴാം വിജയത്തിലേക്ക് നയിച്ചത്.
നേരത്തെ ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ രാജസ്ഥാന്‍ ഓപ്പണര്‍ അജിങ്ക്യ രഹാനെയുടെ സെഞ്ചുറി കരുത്തില്‍ ഇരുപതോവറില്‍ ആറു വിക്കറ്റിന് 191 റണ്‍സ് നേടി. രഹാനെ 63 പന്തില്‍ മൂന്ന് സിക്‌സും പതിനൊന്ന് ഫോറും അടക്കം 105 റണ്‍സ് നേടി പുറത്താകാതെ നിന്നു. മലയാളിതാരം സഞ്ജു സാംസണ്‍ പൂജ്യത്തിനു പുറത്തായി. ഒരു പന്ത് പോലും നേരിടാഞ്ഞ സാംസണ്‍ റബഡയുടെ ത്രോയില്‍ റണ്ണൗട്ടാവുകയായിരുന്നു. നായകന്‍ സ്റ്റീവ് സ്മിത്ത് തുടര്‍ച്ചയായ രണ്ടാം മത്സരത്തിലും അര്‍ധസെഞ്ചുറി തികച്ച് മികച്ച പിന്തുണ നല്‍കി. സ്മിത്ത് 32 പന്തില്‍ എട്ടു ഫോറോടെ 50 റണ്‍സ് എടുത്തു. മധ്യനിരയില്‍ ബെന്‍ സ്‌റ്റോക്‌സും (എട്ട്), ആഷ്ടണ്‍ ടേര്‍ണറും (പൂജ്യം) രണ്ടക്കം കാണാതെ പുറത്തായി. അവസാന ഓവറുകളില്‍ ആഞ്ഞടിച്ച സ്റ്റുവേര്‍ട്ട് ബിന്നി പതിമൂന്ന് പന്തില്‍ രണ്ട് ഫോറോടെ 19 റണ്‍സ് നേടി. ദല്‍ഹിക്കായി ഫാസ്റ്റ് ബൗളര്‍ കഗീസോ റബഡ രണ്ട് വിക്കറ്റ് വീഴ്‌ത്തി.
മറുപടി ബാറ്റിങ്ങിനിറങ്ങിയ ദല്‍ഹി ഇന്ത്യന്‍ താരങ്ങളുടെ കരുത്തില്‍ 19.2 ഓവറില്‍ നാല് വിക്കറ്റ് നഷ്ടത്തില്‍ 193 റണ്‍സ് നേടി. ദല്‍ഹിക്കായി ഓപ്പണര്‍മാരായ പൃഥ്വി ഷാ, ശിഖര്‍ ധവാന്‍ എന്നിവര്‍ മികച്ച തുടക്കം നല്‍കി. പൃഥ്വി ഷാ 39 പന്തില്‍ ഒരു സിക്‌സും നാല് ഫോറും സഹിതം 42 റണ്‍സ് എടുത്തു. ധവാന്‍ 27 പന്തില്‍ രണ്ട് സിക്‌സും എട്ടു ഫോറും അടക്കം 54 റണ്‍സ് നേടി. മധ്യനിരയില്‍ യുവതാരം ഋഷഭ് പന്തും കരുത്തുകാട്ടിയതോടെ ദല്‍ഹി അനായാസ വിജയത്തിലേക്കെത്തി.
