കുര്ദ്: സിറിയയിലെ ബഗൂസില് ഇസ്ലാമിക് സ്റ്റേറ്റ് ഭീകരവാദികള് കൂട്ടത്തോടെ കീഴടങ്ങുന്നു. 500ഓളം ഭീകരര് ഇതിനോടകം അറസ്റ്റിലായതായി അമേരിക്കന് നേതൃത്വത്തിലുള്ള കുര്ദ് സഖ്യസേന അറിയിച്ചു. ഭീകരര്ക്ക് സ്വാധീനമുള്ള അവസാന മേഖലയായ ബഗൂസില് സഖ്യസേന വന് മുന്നേറ്റം നടത്തുകയാണ്.
ഭീകരരുടെ കുടുംബാംഗങ്ങളുള്പ്പടെയുള്ള സാധാരണക്കാരെ ബഗൂസില്നിന്ന് ഒഴിപ്പിച്ചിരുന്നു. അഭയാര്ത്ഥി ക്യാന്പുകളില് ഇവര്ക്കുവേണ്ട അടിസ്ഥാനസൗകര്യങ്ങള് ഒരുക്കാന് സന്നദ്ധസംഘടനകള് ബുദ്ധിമുട്ടുകയാണെന്നാണ് റിപ്പോര്ട്ട്.അവസാന കേന്ദ്രത്തില് അഭയം പ്രാപിച്ചിരിക്കുന്ന ഐഎസ് ഭീകരര് പിടിച്ചു നില്ക്കാന് ശ്രമിക്കുന്നുണ്ടെങ്കിലും സഖ്യസൈന്യത്തിന്റെ ആക്രമണത്തില് നില്ക്കക്കള്ളിയില്ലാതെ പിന്വാങ്ങുകയാണ് . ബാക്കിയായ ഭീകരരില് നല്ലൊരു പങ്കും വിദേശികളെന്നാണ് സൂചന.
കുര്ദ് വിഭാഗങ്ങളുടെ സേനയായ സിറിയന് ഡെമോക്രാറ്റിക്ക് ഫോഴ്സാണ് ഐഎസിന് കനത്ത നാശനഷ്ടം വിതയ്ക്കുന്നത്. ഇറാഖ് അതിര്ത്തിയോട് ചേര്ന്ന് കിടക്കുന്ന രണ്ട് ഗ്രാമങ്ങളിലേക്ക് ഐഎസിനെ ഒതുക്കിയിരിക്കുകയാണിവര്.ഒരുകാലത്ത് ലോകത്തെ അടക്കി ഭരിക്കുമെന്ന് പ്രഖ്യാപിച്ച് എണ്ണമറ്റ ക്രൂരതകള് ചെയ്തു കൂട്ടിയ ഐഎസിന്റെ അവസാന ശ്വാസവും നിലക്കുകയാണ്. താമസിയാതെ ഐഎസ് വിമുക്ത രാജ്യമായി സിറിയ മാറുമെന്നാണ് സഖ്യസേനയുടെ മുന്നേറ്റം നല്കുന്ന സൂചന.
