മൂലമറ്റം: കാല് നൂറ്റാണ്ട് മുമ്പ് നടന്ന പാര്ട്ടി കല്യാണം നവോത്ഥാന കാലഘട്ടത്തില് മതാചാരപ്രകാരം അപ്ഡേറ്റ് ചെയ്ത് സഖാവ.് സിപിഎം ഇടുക്കി ജില്ലാ കമ്മിറ്റി അംഗവും മൂലമറ്റം ഏരിയാ സെക്രട്ടറിയുമായ കെ.എല്. ജോസഫാണ് ഭാര്യയെയും മക്കളെയും മാമ്മോദീസ മുക്കി ആചാരപ്രകാരം പുനര്വിവാഹം നടത്തി പാര്ട്ടിക്ക് മുട്ടന് പണി കൊടുത്തത്.
കുളമാവ് സെ. മേരീസ് പള്ളിയില് ശനിയാഴ്ച രാവിലെയായിരുന്നു മതാചാരപ്രകാരമുള്ള വിവാഹം. ഫാ. തോമസ് പരുത്തിപ്പാറയാണ് വിവാഹ കൂദാശ നടത്തിയത്. വിവാഹത്തിന് മുന്പ് ഭാര്യ ജയശ്രീ, മക്കളായ നിബിന്, നിഥിന് എന്നിവരും മാമ്മോദീസ മുങ്ങി ക്രൈസ്തവ മതം സ്വീകരിച്ചു. പാലാ രൂപതയില് നിന്ന് ലഭിച്ച പ്രത്യേക അനുമതി പ്രകാരമായിരുന്നു വിവാഹം. മന്ത്രി എം.എം. മണിയുടെ അടുത്ത ആളാണ് ജോസഫ്.
അങ്കണവാടി അധ്യാപികയാണ് ജയശ്രീ. ഹിന്ദുമത വിശ്വാസികളായിട്ടാണ് ജയശ്രീയും കുട്ടികളും ജീവിച്ചിരുന്നത്. മൂലമറ്റം ഭാഗത്തുള്ള ക്ഷേത്രങ്ങളില് ഇവര് ദര്ശനവും നടത്താറുണ്ടായിരുന്നു. മതാതീതമായി ജീവിക്കാന് അണികളെ പ്രേരിപ്പിക്കുന്ന നേതാവാണ് കുടുംബാംഗങ്ങളുടെ മതവിശ്വാസം പോലും പരിഗണിക്കാതെ ക്രൈസ്തവ മതത്തിലേക്ക് പരിവര്ത്തനം ചെയ്തത്.
27 വര്ഷം മുമ്പാണ് ജോസഫ് ജയശ്രീയെ വിവാഹം കഴിച്ചത്. ജോസഫിന്റെ നടപടി ഗൗരവമായി കാണണമെന്നാവശ്യപ്പെട്ട് ഒരു വിഭാഗം പാര്ട്ടിക്കാര് ജില്ലാ കമ്മറ്റിക്ക് കത്ത് കൊടുത്തിട്ടുണ്ട്. മതാതീതമായി നവോത്ഥാന സന്ദേശം പ്രചരിപ്പിക്കാന് സിപിഎം പെടാപ്പാട് പെടുമ്പോഴാണ് അറിയപ്പെടുന്ന പാര്ട്ടി നേതാവ് തന്നെ മതാചാരത്തില് അഭയം തേടി നവോത്ഥാനം എന്നൊക്കെ പറഞ്ഞ് വനിതാ മതില് കെട്ടിയതെല്ലാം വെറും പൊള്ളയാണെന്ന് തെളിയിച്ചു കൊടുത്തത്.
നവോത്ഥാനം എന്നത് പാര്ട്ടി അണികളെ പറ്റിക്കാനുള്ള വെറും മുദ്രാവാക്യം മാത്രമാണെന്നും ശബരിമല വിഷയത്തില് പാര്ട്ടിയെടുത്ത നിലപാട് വോട്ട് രാഷ്ട്രീയത്തിന്റെ പേരില് ഹൈന്ദവരെ ഭിന്നിപ്പിക്കാന് മാത്രമാണെന്നും ഇതിലൂടെ വ്യക്തമാകുന്നു.
ജന്മഭൂമി ഓണ്ലൈന്