വെല്ലിങ്ടണ്: വറ്റാത്ത വിജയപരമ്പരകളുടെ കൂടാരത്തില് പുതിയ പൊന്തൂവല് ചാര്ത്താന് ഇന്ത്യ ഇന്ന് ന്യൂസിലന്ഡിനെതിരെ ആദ്യ ട്വന്റി 20ക്ക് ഇറങ്ങുന്നു. ഏകദിന പരമ്പര 4-1ന് സ്വന്തമാക്കിയ ഇന്ത്യക്ക് തന്നെയാണ് ട്വന്റി 20യിലും മുന്തൂക്കം. വിരാട് കോഹ്ലിയുടെ അഭാത്തില് രോഹിത് ശര്മയാണ് ഇന്ത്യയെ നയിക്കുക.
ചുരുങ്ങിയ ഫോര്മാറ്റുകളില് മികച്ച പ്രകടനം നടത്തുന്ന ന്യൂസിലന്ഡിനെ അവരുടെ നാട്ടില് പരാജയപ്പെടുത്തുകയെന്ന വലിയ ദൗത്യമാണ് രോഹിതിന് മുന്നിലുള്ളത്. കോഹ്ലിയുടെ അഭാവത്തിലും സര്വശക്തമാണ് ടീം ഇന്ത്യ. അവസാന രണ്ട് ഏകദിനങ്ങളില് ഇന്ത്യന് മുന്നിര തകര്ന്നടിഞ്ഞപ്പോള് മധ്യനിര കാട്ടിയ ചെറുത്തുനില്പ്പ് അടുത്ത ലോകകപ്പിലേക്കുള്ള ഇന്ത്യന് പ്രതീക്ഷകളുടെ ആക്കം കൂട്ടുന്നതായി. രോഹിതും, ധവാനും, ധോണിയും, പാണ്ഡ്യയും അടങ്ങുന്ന ഇന്ത്യന് ബാറ്റ്സ്മാന്മാര് ഫോമിലേക്കുയര്ന്നാല് ന്യൂസിലന്ഡിലെ ചെറിയ ഗ്രൗണ്ടുകളില് വിസ്മയം തീര്ക്കുമെന്നുറപ്പ്. വിക്കറ്റ് കീപ്പര്മാരായ ധോണിയും കാര്ത്തികും ടീമിലുള്ളപ്പോള് യുവതാരം ഋഷഭ് പന്തിന് എത്രത്തോളം ടീമില് സ്ഥാനം ലഭിക്കുമെന്നത് സംശയം. ഏത് ടീമിനെയും കറക്കിവീഴ്ത്താന് കെല്പ്പുള്ള സ്പിന്നര്മാരും വരിവരിയായി നില്ക്കുന്ന ഫാസ്റ്റ്ബൗളര്മാരും ചേരുമ്പോള് ടീം ശക്തം.
മറുവശത്ത് സൂപ്പര് താരങ്ങളായ മാര്ട്ടിന് ഗുപ്റ്റില്, ട്രന്റ് ബൗള്ട്ട് എന്നിവരില്ലാതെയാകും കിവികള് ആദ്യ മത്സരത്തിനിറങ്ങുക. ആഭ്യന്തര ക്രിക്കറ്റില് മികച്ച പ്രകടനം നടത്തിയ ഓള് റൗണ്ടര് ഡാരില് മിച്ചലിനും ഫാസ്റ്റ് ബൗളര് ബ്ലെയിര് ടിക്നറിനും അരങ്ങേറ്റം കുറിക്കാന് സാധ്യതയുണ്ട്. ഏകദിനത്തില് മികച്ച പ്രകടനം നടത്തിയ റോസ് ടെയ്ലറിലാകും ട്വന്റി 20യിലും ന്യൂസിലന്ഡിന്റെ പ്രതീക്ഷ.
ഇന്ത്യന് ടീം: രോഹിത് ശര്മ (നായകന്), ശിഖര് ധവാന്, ഋഷഭ് പന്ത്, ദിനേശ് കാര്ത്തിക്, കേദാര് ജാദവ്, എം.എസ്. ധോണി, ക്രുണാല് പാണ്ഡ്യ, കുല്ദീപ് യാദവ്, യുസ്വേന്ദ്ര ചാഹല്, ഭുവനേശ്വര് കുമാര്, സിദ്ധാര്ഥ് കൗള്, ഖലീല് അഹ്മദ്, ശുഭ്മാന് ഗില്, വിജയ് ശങ്കര്, ഹാര്ദിക് പാണ്ഡ്യ, മുഹമ്മദ് സിറാജ്.
ന്യൂസിലന്ഡ് ടീം: കെയ്ന് വില്യംസണ് (നായകന്), ഡഗ് ബ്രെയിസ്വെല്, കോളിന് ഡി ഗ്രാന്ഡ്ഹോം, ലോക്കി ഫെര്ഗുസണ്, സ്കോട്ട് കജ്ലീന്, കോളിന് മണ്റോ, ഡാരില് മിച്ചല്, മിച്ചല് സാന്റനര്, ടിം സീഫേര്ട്ട്, ഇഷ് സോധി, ടിം സൗത്തി, റോസ് ടെയ്ലര്, ബ്ലെയ്ര് ടിക്നര്, ജെയിംസ് നീഷം.
