കാസര്കോട് (നീലേശ്വരം): നരേന്ദ്ര മോദി സര്ക്കാരിന്റെ തുടര്ച്ച ഉറപ്പിച്ച് സംസ്ഥാന ആരോഗ്യമന്ത്രി കെ.കെ. ശൈലജ. രാജ്യത്തെ ആദ്യ കേന്ദ്ര-യോഗ പ്രകൃതി ചികിത്സാ ഗവേഷണ കേന്ദ്രത്തിന് കാസര്കോട് കരിന്തളത്ത് തറക്കല്ലിട്ട ചടങ്ങിലെ അധ്യക്ഷ പ്രസംഗത്തിലാണ് മന്ത്രിയുടെ പരാമര്ശം.
രണ്ട് വര്ഷം കൊണ്ട് പണി പൂര്ത്തിയാകുന്ന ഗവേഷണ കേന്ദ്രം, തറക്കല്ലിട്ട കേന്ദ്ര ആയുഷ് വകുപ്പ് മന്ത്രി തന്നെ ഉദ്ഘാടനവും ചെയ്യുമെന്ന് പറഞ്ഞാണ് മന്ത്രി കേന്ദ്രത്തില് ബിജെപിക്ക് ഭരണത്തുടര്ച്ച ഉറപ്പിച്ചത്. മന്ത്രിയുടെ പ്രസംഗം വേദിയിലും സദസിലും കൂട്ടച്ചിരിക്കും കൈയടിക്കും വഴിയൊരുക്കി. വേദിയിലുണ്ടായിരുന്ന പി. കരുണാകരന് എംപിയും, മന്ത്രി ഇ. ചന്ദ്രശേഖരനും ഇത് കേട്ട് അന്ധാളിച്ചപ്പോള് കേന്ദ്ര ആയുഷ് മന്ത്രി ശ്രീപദ് നായിക്ക് പൊട്ടിച്ചിരിച്ചു. കേന്ദ്രമന്ത്രി ശ്രീപദ് നായിക്കാണ് ഇന്നലെ യോഗ പ്രകൃതി ചികിത്സാ ഗവേഷണ കേന്ദ്രത്തിന് തറക്കല്ലിട്ടത്.
