കണ്ണൂര്: ‘ക്ഷേത്രം-ആചാരാനുഷ്ഠാനങ്ങളുടെ പ്രസക്തി’ എന്ന വിഷയത്തില് വിശ്വാസികള്ക്കുള്ള സംശയങ്ങള് ദുരീകരിക്കുന്നതിന് അഖില കേരള തന്ത്രി സമാജത്തിന്റെ ആഭിമുഖ്യത്തില് 8ന് കണ്ണൂരില് ആചാര്യ സദസ്സ് സംഘടിപ്പിക്കും. കേരളീയ സമൂഹം ആചാരാനുഷ്ഠാനങ്ങളെക്കുറിച്ച് ചര്ച്ച ചെയ്യുന്ന നിലവിലെ സാമൂഹിക പശ്ചാത്തലത്തിലാണ് പ്രസ്തുത വിഷയത്തിലെ ശാസ്ത്രീയ ചിന്താധാരകള് ചര്ച്ച ചെയ്യാന് തന്ത്രി സമാജം വേദിയൊരുക്കുന്നത്. കക്കാട് അഖിലകേരള തന്ത്രിസമാജം ഉത്തര മേഖലാ ആസ്ഥാനത്തോട് ചേര്ന്ന് ചേനോളി ശ്രീ ഗുരുഭഗവതി ക്ഷേത്രത്തില്വെച്ച് വൈകിട്ട് 5നാണ് സദസ് നടക്കുക. ക്ഷേത്രാചാരം സംബന്ധിച്ച് വിശ്വാസികളുടെ സംശയങ്ങള്ക്ക് കേരളത്തിലങ്ങോളമിങ്ങോളമുള്ള മഹാക്ഷേത്രങ്ങളിലെ തന്ത്രിമുഖ്യന്മാര് മറുപടി നല്കും.
കൊല്ലൂര് മൂകാംബികാ ക്ഷേത്രം മുഖ്യ അര്ച്ചകന് നരസിംഹ അഡിക സദസ് ഉദ്ഘാടനം ചെയ്യും. തന്ത്രസമുച്ഛയത്തെ ആസ്പദമാക്കി നടത്തുന്ന വിശകലന സത്രമായ ക്രിയാവിചാര സത്രത്തിന്റെ ഔപചാരിക ഉദ്ഘാടനം ബദരീനാഥ് റാവല്ജി ഈശ്വരപ്രസാദ് നമ്പൂതിരി നിര്വ്വഹിക്കും. രാവിലെ 6ന് സൂര്യകാലടി സൂര്യന് ജയസൂര്യന് ഭട്ടതിരിപ്പാടിന്റെ കാര്മ്മികത്വത്തില് മഹാഗണപതിഹോമം, മഹാമൃത്യുഞ്ജയ ഹോമം, നവഗ്രഹപൂജ എന്നിവയും വൈകിട്ട് സര്പ്പബലിയും ഉണ്ടായിരിക്കും.
