പഴയങ്ങാടി: കേരളത്തിലെ ഒമ്പത് ജില്ലകളെ കോര്ത്തിണക്കി തീരദേശങ്ങളെ ബന്ധിപ്പിക്കുന്ന തീരദേശ ഹൈവേയുടെ നിര്മാണവുമായി ബന്ധപ്പെട്ട് നടത്തുന്ന സ്ഥലമെടുപ്പ് മാടായി, മാട്ടൂല് പഞ്ചായത്തുകളിലെ തീരദേശവാസികളെ ആശങ്കയിലാക്കുന്നു.
മാടായി, മാട്ടൂല് പഞ്ചയത്തിലെ ജനവാസ കേന്ദ്രങ്ങളിലൂടെയും പ്രധാനമത്സ്യമ്പന്ധന കേന്ദ്രത്തിലൂടെയും കടന്നുപോകുന്ന ഈ ഹൈവേക്ക് ആവശ്യമായ വീതി 14 മിറ്ററാണ്. തുടക്കത്തില് തയ്യാറാക്കിയ രൂപരേഖ ജനവാസകേന്ദ്രങ്ങളെ ഒഴിവാക്കി കടലിനോട് ചേര്ന്നാണ് തയ്യാറാക്കിയതെന്നും ഇതില് ആശങ്കയക്ക് വഴിയില്ലെന്നും നാട്ടുകാര് പറയുന്നു. എന്നാല് മാടായി, മാട്ടൂല് പഞ്ചായത്തുകളില് പുതുതായി തയ്യാറാക്കിയ രൂപരേഖയിലാണ് ചില ഭരണകക്ഷി നേതാക്കളുടെ താല്പര്യത്തിനായി ഉദ്യോഗസ്ഥര് വ്യാപകമായി മാറ്റം വരുത്തിയിരിക്കുന്നത് എന്നാണ് നാട്ടുകാര് പറയുന്നത്.
മാട്ടൂല് പഞ്ചായത്തിലെ കക്കാടന്ചാല് മുതല് ബിരിയാണി റോഡ് വരെയുള്ള സ്ഥലങ്ങളും മാടായി പഞ്ചായത്തിലെ നീരൊഴുംക്കുംചാല്, ബീച്ച് റോഡ്, പുതിയങ്ങാടി മത്സ്യബന്ധന കേന്ദ്രം, പുതിയവളപ്പ്, ചൂട്ടാട് തുടങ്ങിയ തീരദേശ മേഖലയും ജനവാസകേന്ദ്രങ്ങളും ഉള്പ്പെടുത്തിയാണ് പുതിയ നിര്മ്മാണ രൂപരേഖ തയ്യാറാക്കിയിട്ടൂള്ളത്. ഇതോടുകൂടി നൂറുകണക്കിന് കുടുംബങ്ങളാണ് വഴിയാധാരമാവുന്നത്. നിരവധി ആരാധനാലയങ്ങളും പൊളിച്ചു മാറ്റേണ്ടതായി വരും.
കിഫ്ബിയില് ഉള്പെടുത്തി 630 കിലോ മിറ്റര് ദൈര്ഘ്യമുള്ള റോഡിന് 14 മിറ്റര് വീതിയും അയ്യായിരം കോടി രൂപ ചെലവുമാണ് സര്ക്കാര് കണക്ക്. വീടും കിടപ്പാടങ്ങളും നഷ്ടപെടുന്നവര്ക്ക് മതിയായ നഷ്ടപരിഹാരം നല്കുമെന്ന് പറയുന്നുണ്ടെങ്കിലും ഇത് എത്രത്തോളം പ്രയോഗികമാണ് എന്ന ആശങ്കയും തിരദേശവാസികള്ക്കുണ്ട്. നൂറ് കണക്കിന് മത്സ്യത്തൊഴിലാളികളെ എവിടെയ്ക്കാണ് മാറ്റി സ്ഥാപിക്കുക തുടര്ന്നുള്ള ഇവരുടെ ഉപജീവനമാര്ഗം എന്ന് എന്ന ചോദ്യവും ഉയരുന്നു. ജനവാസകേന്ദ്രങ്ങളെ ഒഴിവാക്കിക്കൊണ്ട് മാത്രമേ തീരദേശ ഹൈവേയുടെ നിര്മാണം നടക്കൂ എന്ന് പറയുന്ന വകുപ്പ് മന്ത്രിയുടെ നിലപാടുകള് കാറ്റില് പറത്തിയാണ് ഭരണകക്ഷിയിലെ ചില രാഷ്ട്രീയ മേലാളന്മാരുടെ സ്വാര്ത്ഥതാല്പര്യം സംരക്ഷിക്കാനും അതിലുപരി സാമ്പത്തിക ലാഭത്തിനും വേണ്ടിയാണ് ആദ്യത്തെ അലൈന്മെന്റില് മാറ്റം വരുത്തിയത് എന്ന ആക്ഷേപവും നിലനില്ക്കുന്നു. ആദ്യം തയ്യാറാക്കിയ രൂപരേഖയില് എറിയ പങ്കും പുറംപോക്ക് ഭൂമിയാണെന്നിരിക്കേ ജനവാസകേന്ദ്രങ്ങളെ ഉള്പെടുത്തി ഹൈവേ നിര്മാണം നടത്തുന്നത് ആര്ക്ക് വേണ്ടിയാണ് എന്ന ചോദ്യവും ഉയരുന്നു.
