കൊച്ചി: ശരണനാമ ജപത്തെ ‘തെറിജപ’മെന്ന് പരിഹസിച്ച് മത-ഈശ്വര വിശ്വാസത്തെ വ്രണപ്പെടുത്തിയ മന്ത്രി തോമസ് ഐസക് ആലപ്പുഴ കലവൂരിലെ ധ്യാനകേന്ദ്രമായ കൃപാസനത്തിലെ വിശ്വാസി.
അത്ഭുത രോഗശാന്തി പ്രചരിപ്പിക്കുന്ന ക്രിസ്തീയ കേന്ദ്രമാണ് കലവൂരിലെ കൃപാസനം. ഇവിടം മതപരിവര്ത്തന കേന്ദ്രമാണെന്ന ആക്ഷേപങ്ങളും പരാതികളുമുണ്ട്. പ്രാര്ഥനാ കേന്ദ്രത്തിന്റെ പ്രചാരണത്തിലെല്ലാം അത്ഭുത രോഗശാന്തിയുടെ സാക്ഷ്യം പറച്ചിലുകളുണ്ട്.
ഫാ. വി.പി. ജോസഫ് വലിയവീട്ടില് നടത്തുന്ന, ആത്മീയപരിവേഷമുള്ള കേന്ദ്രത്തിന് കൈയയച്ചു സഹായം നല്കുന്നുണ്ട് മന്ത്രി. എന്നാല്, ഇതെല്ലാം മണ്ഡലത്തിലെ എംഎല്എ എന്ന നിലയില് സാധൂകരിക്കാനും ന്യായീകരിക്കാനുമാണ് മന്ത്രി ശ്രമിക്കാറ്.
സാമൂഹ്യ സേവനത്തിനെന്ന പേരില് നടത്തുന്ന പ്രവര്ത്തനങ്ങളിലാണ് മന്ത്രിയുടെ ഇടപെടലുകള്. എന്നാല്, ഇതിനപ്പുറം കൃപാസനത്തിലെ ധ്യാനത്തിലും പ്രാര്ഥനകളിലും മന്ത്രി പങ്കെടുക്കാറുണ്ടെന്ന് സന്ദര്ശകര് പറയുന്നു. കൃപാസനത്തിന്റെ ഫേസ്ബുക് പേജില് മന്ത്രി കൈ ഉയര്ത്തി കൂട്ട പ്രാര്ഥനയില്നില്ക്കുന്ന ചിത്രം ഇടയ്ക്ക് വന്നിരുന്നു. പിന്നീട് അത് നീക്കിയ സംഭവവുമുണ്ടായി.
വി.എം. സുധീരനെതിരേ ആലപ്പുഴ പാര്ലമെന്റ് മണ്ഡലത്തില് ഡോ. കെ.എസ്. മനോജിനെ സിപിഎം സ്ഥാനാര്ഥിയാക്കി ക്രിസ്ത്യന് വോട്ടില് വിജയിപ്പിച്ചതില് കൃപാസനം മേധാവിക്ക് പങ്കുണ്ട്. മനോജ്, ഇപ്പോള് കടുത്ത സിപിഎം വിരുദ്ധനാണെങ്കിലും തോമസ് ഐസക്കും ഫാ. വലിയവീട്ടിലും ദൃഢബന്ധത്തിലാണ്.
വിദേശ രാജ്യങ്ങളില് നിന്നുള്ള സന്ദര്ശകര് കൃപാസനത്തില് അടിയ്ക്കടി വരാറുണ്ട്. അത്തരം വേളകളില് മന്ത്രി ഐസക്കിന്റെ സാന്നിധ്യവുമുണ്ടാകും. അത്ഭുത രോഗശാന്തിശുശ്രൂഷയുടെ പേരില് ക്രിസ്തീയ സഭകള് കൃപാസനത്തിനും മേധാവിക്കും എതിരാണ്. ചവിട്ടുനാടക കലാരൂപത്തിന്റെ ചരിത്രവും സംസ്കാരവും തെറ്റായി വ്യാഖ്യാനിക്കുന്നതിന്റെ പേരില് ചവിട്ടുനാടക പൈതൃകസ്ഥലമായ ഗോതുരുത്തുകാര് വലിയവീട്ടിലിന്റെ കടുത്ത വിമര്ശകരാണ്.
നാമജപത്തെ പരിഹസിച്ചതിന്റെ പേരില്, മതസ്പര്ദധ ഉണ്ടാക്കിയ കുറ്റത്തിന് മന്ത്രിക്കെതിരേ വിശ്വഹിന്ദു പരിഷത്ത് നിയമനടപടി തുടങ്ങിയിട്ടുണ്ട്.
