ആലപ്പുഴ: ശബരിമലയില് ആചാരം ലംഘിച്ചതിലൂടെ വിവാദത്തിലായ തിരുവിതാംകൂര് ദേവസ്വം ബോര്ഡംഗം കെ.പി. ശങ്കരദാസിനെതിരെ സിപിഐയിലും പ്രതിഷേധം ഉയരുന്നു. ദേവസ്വം ബോര്ഡംഗം എന്ന പദവിക്കൊപ്പം അദ്ദേഹത്തിന് കെഎസ്ആര്ടിസി ഡയറക്ടര് പദവിയും വഹിക്കുന്നതാണ് സിപിഐയിലെ ഭിന്നതയ്ക്ക് കാരണം.
പാര്ട്ടി സംസ്ഥാന സെക്രട്ടറി കാനം രാജേന്ദ്രനെ അനുകൂലിക്കുന്നവര്ക്ക് മാത്രമായി സര്ക്കാര് പദവികള് സിപിഐയില് സംവരണം ചെയ്തിരിക്കുകയാണെന്ന് എതിര്പക്ഷം വിമര്ശനം ഉന്നയിക്കുന്നത്. നിരവധി മുതിര്ന്ന നേതാക്കള് യാതൊരു സ്ഥാനവും കാലങ്ങളായി ലഭിക്കാതെ പാര്ട്ടിക്കായി പ്രവര്ത്തിക്കുന്ന സാഹചര്യത്തിലാണ് തന്റെ അടുപ്പക്കാരനെന്ന പരിഗണനയില് ശങ്കരദാസിന് സര്ക്കാരിന്റെ രണ്ട് പദവികള് നല്കിയതെന്നാണ് വിമര്ശനം.
ശബരിമല യുവതീപ്രവേശന വിഷയത്തില് സിപിഎമ്മുകാരനായ ദേവസ്വം ബോര്ഡ് പ്രസിഡന്റ് എ. പത്മകുമാറിനെ പോലും മറികടന്ന് മുഖ്യമന്ത്രിയുടെ അടിച്ചേല്പ്പിക്കാല് നയം നടപ്പാക്കാന് ശ്രമിക്കുന്നത് സിപിഐ നേതാവായ ശങ്കരദാസാണ്. കഴിഞ്ഞ ചിത്തിര ആട്ടവിശേഷത്തിന് പതിനെട്ടാം പടിയില് ഇരുമുടിക്കെട്ടില്ലാതെ കയറുകയും, ഇറങ്ങുകയും ചെയ്ത് ആചാരങ്ങളെ അവഹേളിച്ച ശങ്കരദാസ് പിന്നീട് തന്റെ നടപടിയെ ന്യായീകരിക്കുകയാണ് ഉണ്ടായത്.
ശബരിമല യുവതീപ്രവേശനത്തില് പിണറായി വിജയന്റെ നിലപാടുകള് നടപ്പിലാക്കുന്ന വെറും കാര്യസ്ഥനായി പാര്ട്ടി നേതാവായ ശങ്കരദാസ് തരംതാഴ്ന്നെന്നും പാര്ട്ടിയെ നയിക്കുന്ന കാനം പക്ഷക്കാര് അടുത്തിടെയായ പിണറായി വിജയന് കീഴടങ്ങിയതായും മറുപക്ഷം വിമര്ശിക്കുന്നു, സിപിഐ എന്നും പൊതുസമൂഹത്തില് ശ്രദ്ധ നേടിയിട്ടുള്ളത് സിപിഎമ്മിന്റെ ഏകാധിപത്യനയങ്ങള്ക്കെതിരെ പ്രതികരിച്ച കാലഘട്ടങ്ങളിലാണ്. എന്നാല് ഇപ്പോള് സ്ഥിതി മറിച്ചാണെന്നുമാണ് വിമര്ശനം.
അതിനിടെ ശങ്കരദാസിന്റെ ഇരട്ടപ്പദവി ചട്ടവിരുദ്ധമാണെന്നും ചൂണ്ടിക്കാണിക്കപ്പെടുന്നു. നേരത്തെ ഇരട്ടപ്പദവി വഹിച്ച എന്സിപി നേതാവ് സുള്ഫിക്കര് മയൂരിയുടെ കായംകുളം നഗരസഭാ കൗണ്സിലര് സ്ഥാനം തെരഞ്ഞെടുപ്പ് കമ്മീഷന് റദ്ദാക്കിയിരുന്നു. ഹൈക്കോടതി പിന്നീട് ഇത് ശരിവെക്കുകയും ചെയ്തു. സുള്ഫിക്കര് മയൂരി കൗണ്സിലര് സ്ഥാനത്തിനൊപ്പം അഗ്രോ ഇന്ഡസ്ട്രീസ് കോര്പ്പറേഷന് ചെയര്മാന് പദവിയും വഹിച്ചതാണ് തിരിച്ചടിയായത്.
