ചങ്ങനാശ്ശേരി: ശബരിമല ദര്ശനത്തിന് ആചാരങ്ങള് പാലിച്ചുവരുന്ന ഭക്തരെ അകാരണമായി തടയുകയും അവരെ അറസ്റ്റുചെയ്ത് ലോക്കപ്പിലാക്കുകയും ചെയ്യുന്ന നടപടിക്കെതിരെ എന്എസ്എസ്. ഇത്തരം നടപടികള് പ്രശ്നങ്ങള്ക്ക് പരിഹാരമല്ല. നടപടി കൂടുതല് സങ്കീര്ണ്ണതയ്ക്ക് വഴിവെക്കുമെന്ന് ബന്ധപ്പെട്ടവര് മനസിലാക്കുന്നത് നന്നായിരിക്കുമെന്നും എന്എസ്എസ് ജനറല് സെക്രട്ടറി വാര്ത്താക്കുറിപ്പില് പറഞ്ഞു.
വിശ്വാസികളുടെ വികാരം കണക്കിലെടുക്കാതെ, ഒരു യുദ്ധസമാനമായ രീതിയില് പോലീസിനെ വിന്യസിച്ച്, അവരുടെ നിയന്ത്രണത്തിലൂടെ കാര്യങ്ങള് നടത്തിയെടുക്കാനുള്ള സംസ്ഥാനസര്ക്കാരിന്റെ അന്യായമായ നീക്കമാണ് കാര്യങ്ങള് കൂടുതല് വഷളാക്കിയിരിക്കുന്നത്.ആണ്ടുതോറും കോടിക്കണക്കിന് ഭക്തജനങ്ങളെത്തി ആചാരങ്ങള് പാലിച്ചുകൊണ്ട് സമാധാനപരമായി ദര്ശനം നടത്തിപ്പോരുന്ന പതിവായിരുന്നു നിലനിന്നിരുന്നത്. എന്നാല് ഇത്തവണ ഭക്തജനങ്ങള് ശബരിമലയിലേക്ക് എത്താന് തന്നെ മടിക്കുന്നു. എത്തുന്നവര്ക്ക് അനുഭവിക്കേണ്ടിവരുന്ന യാതനകള് പലതാണ്.
മുമ്പൊരിക്കലും ഉണ്ടായിട്ടില്ലാത്ത നിയന്ത്രണങ്ങളാണ് സുരക്ഷയുടെ പേരില് ഏര്പ്പെടുത്തിയിരിക്കുന്നത്. യഥാര്ത്ഥത്തില് പോലീസ് ഭരണമാണ് അവിടെ നടക്കുന്നത്. ഭക്തര്ക്ക് പകല് സമയത്തുപോലും പമ്പയിലോ സന്നിധാനത്തോ എത്താന് അനുവാദം നിഷേധിക്കുന്നു. ഭക്തര്ക്ക് പ്രാഥമിക ആവശ്യങ്ങള്ക്കോ കുടിവെള്ളം, ഭക്ഷണം എന്നിവയ്ക്കോ വിരിവെച്ച് വിശ്രമിക്കുന്നതിനോ പോലുമുള്ള സൗകര്യങ്ങളില്ലെന്നും സുകുമാരന് നായര് പറയുന്നു.
