ശാസ്താംകോട്ട: പിഡിപി നേതാവ് മദനിയുടെ അമ്മയുടെ മരണാനന്തര ചടങ്ങുകള്ക്ക് സര്ക്കാര് പ്രതിനിധിയായി മന്ത്രി കെ.ടി. ജലീല് പങ്കെടുത്തത് മദനി- സിപിഎം ബന്ധം ഊട്ടി ഉറപ്പിക്കാനെന്ന് സൂചന. മരണാനന്തര ചടങ്ങുകളില് പങ്കെടുക്കാന് കഴിഞ്ഞ ബുധനാഴ്ചയാണ് മന്ത്രി ജലീല് മദനിയുടെ വീടായ മൈനാഗപ്പള്ളി തോട്ടുവാല് മന്സിലില് എത്തിയത്.
വൈകിട്ട് നാലരയോടെ എത്തിയ ജലീല് ചടങ്ങുകളുമായി ബന്ധപ്പെട്ട് നടന്ന പ്രാര്ഥനയിലും പങ്കെടുത്ത ശേഷം മദനിയുമായി ഏറെ നേരം സ്വകാര്യ സംഭാഷണം നടത്തി സന്ധ്യയോടെയാണ് തിരുവനന്തപുരത്തേക്ക് മടങ്ങിയത്. തീവ്ര ഇസ്ലാമിക സംഘടനകളിലേക്കുള്ള പാലമായി സിപിഎം ജലീലിനെ ഉപയോഗിക്കുന്നുവെന്ന ആരോപണങ്ങള് പാര്ട്ടിക്കുള്ളില്ത്തന്നെ ശക്തമാണ്. അതുകൊണ്ടാണ് ബന്ധുനിയമനവിവാദത്തില് കുടുങ്ങിയിട്ടും പാര്ട്ടി ജലീലിനെ സംരക്ഷിക്കുന്നത്.
നിരോധിത സംഘടനയായി സിമിയുടെ ആദ്യകാല നേതാവായിരുന്ന ജലീല് ഇടതുപക്ഷ സഹയാത്രികനായി അധികം വൈകാതെ എല്ഡിഎഫ് മന്ത്രിസഭയില് ഇടവും നേടി. പാര്ട്ടിക്കുള്ളില് തന്നെ അന്ന് ഏറെ ഒച്ചപ്പാടുണ്ടാക്കിയതാണ് രാഷ്ട്രീയ പാരമ്പര്യമില്ലാത്ത ജലീലിന്റെ മന്ത്രി സ്ഥാനം. സിമിയുമായുള്ള ബന്ധം വിട്ടെന്ന് പറയുമ്പോഴും തീവ്രസ്വഭാവമുള്ള മുസ്ലിം മത നേതാക്കളുമായി ഇന്നും മന്ത്രി ജലീല് തുടര്ന്നു പോരുന്ന ബന്ധം പരസ്യമാണ്, കോയമ്പത്തൂര്, ബാംഗ്ലൂര് സ്ഫോടന കേസുകളില് തമിഴ്, കര്ണാടക ജയിലില് കഴിഞ്ഞ മദനിയെ കാണാനും ജലീല് പലതവണ പോയിട്ടുണ്ട്.
