തിരുവനന്തപുരം: തുലാം ഒന്നിന് പമ്പയിലുണ്ടായ സംഘര്‍ഷം വന്‍ ഗൂഢാലോചനയുടെ ഫലമെന്നതിന് കൂടുതല്‍ തെളിവുകള്‍. ചില കടലാസ് സംഘടനകളെ കൂട്ടുപിടിച്ച് മുഖ്യമന്ത്രി പിണറായി വിജയന്‍ നേരിട്ട് ആസൂത്രണം ചെയ്തതാണിതെന്ന് വ്യക്തമായി.
രാഹുല്‍ ഈശ്വറിന്റെ ഹിന്ദു പാര്‍ലമെന്റ് എന്ന സംഘടനയാണ് ഇടനിലക്കാര്‍. ഇവരെ പ്രവീണ്‍ തൊഗാഡിയയുടെ നേതൃത്വത്തിലുള്ള സംഘടനയും പിന്തുണച്ചു. സംഘപരിവാര്‍ പ്രസ്ഥാനങ്ങളോടുള്ള കടുത്ത വിദ്വേഷമാണ് ഈ സംഘടനകളുടെ മുഖമുദ്ര. സംഘര്‍ഷത്തിന്റെ ഉത്തരവാദിത്തം സംഘപരിവാറിനുമേല്‍ കെട്ടിവയ്‌ക്കുകയായിരുന്നു ലക്ഷ്യമെന്നും വ്യക്തമായി.
ശബരിമല വിഷയത്തില്‍ സുപ്രീംകോടതി വിധി വന്ന ശേഷം മൂന്നു തവണ ഹിന്ദു പാര്‍ലമെന്റ് പ്രതിനിധികള്‍ മുഖ്യമന്ത്രിയുമായി ചര്‍ച്ച നടത്തി. തുലാമാസ പൂജയ്‌ക്ക് രണ്ടു ദിവസം മുന്‍പായിരുന്നു അവസാന കൂടിക്കാഴ്ച. മുഖ്യമന്ത്രിയുടെ ഓഫീസില്‍ നടന്ന ചര്‍ച്ചയില്‍ രാഹുല്‍ ഈശ്വറിനു പകരം അമ്മ മല്ലിക നമ്പൂതിരിയാണ് പങ്കെടുത്തത്.
വിഷയത്തില്‍ മുഖ്യമന്ത്രിയുമായി ചര്‍ച്ചയ്‌ക്കില്ലെന്ന് തന്ത്രികുടുംബം വ്യക്തമാക്കിയ ശേഷമാണ് തന്ത്രി കണ്ഠര് മഹേശ്വരരുടെ മകള്‍ മല്ലിക ചര്‍ച്ചയ്‌ക്കെത്തിയത്. ഇതോടെയാണ് രാഹുലിന്റെ നിലപാടുകള്‍ക്കും പ്രവൃത്തികള്‍ക്കും തങ്ങളുമായി ബന്ധമില്ലെന്ന പരസ്യനിലപാടെടുക്കാന്‍ തന്ത്രികുടുംബത്തെ പ്രേരിപ്പിച്ചത്.
പ്രവേശനത്തിനെത്തുന്ന യുവതികളെ തടയാനുള്ള നേതൃത്വം രാഹുല്‍ ഈശ്വര്‍ സ്വയമേറ്റെടുത്തതും പമ്പയില്‍ പോലീസുമായി പ്രശ്‌നമുണ്ടാക്കിയതും മുഖ്യമന്ത്രിയുമായി നടന്ന ചര്‍ച്ചകളുടെ ഫലമാണ്. വിഷയം മറ്റുള്ളവര്‍ ഏറ്റെടുക്കുമെന്നും സംഘര്‍ഷം സന്നിധാനത്തേക്ക് വ്യാപിപ്പിക്കുമെന്നുമായിരുന്നു കണക്കുകൂട്ടല്‍. അങ്ങനെ ഉത്തരവാദിത്തം സംഘപരിവാറിനു മേല്‍ കെട്ടിവച്ച് ഒറ്റപ്പെടുത്തി, യുവതീ പ്രവേശം സാധ്യമാക്കുകയായിരുന്നു ലക്ഷ്യം.
രാഹുല്‍ ഈശ്വറിനെ സുരക്ഷിതമായി നീക്കിയ ശേഷമേ സംഘര്‍ഷം തുടങ്ങൂയെന്നും ഉറപ്പുവരുത്തിയിരുന്നു. പദ്ധതി അനുസരിച്ച് കാര്യങ്ങള്‍ നീക്കിയെങ്കിലും പമ്പയിലെ പ്രശ്‌നം മറ്റ് അയ്യപ്പന്മാര്‍ ഏറ്റെടുക്കാതിരുന്നതിനാല്‍ പാളി. അതിനിടെ, കെ. സുരേന്ദ്രന്‍ ഉള്‍പ്പെടെയുള്ളവര്‍ പ്രതിഷേധത്തിന്റെ നേതൃത്വത്തിലെത്തി അയ്യപ്പന്മാരെ നിയന്ത്രിച്ചു.
ചിത്തിര ആട്ടവിശേഷ ദിവസം ദര്‍ശനത്തിനെത്തിയ സ്ത്രീയെ തടഞ്ഞ് വിവാദമുണ്ടാക്കിയതും ഈ സംഘമായിരുന്നു.
വത്സന്‍ തില്ലങ്കേരി ഉള്‍പ്പെടെയുള്ള നേതാക്കള്‍ ഇവരെക്കുറിച്ച് നേരത്തെ പോലീസിന് വിവരം നല്‍കി. എന്നാല്‍, നടപടിയുണ്ടായില്ല. ഇതും മുന്‍കൂട്ടി ആസൂത്രണം ചെയ്തതെന്ന് വ്യക്തമായി.
