തിരുവനന്തപുരം: സംസ്ഥാനത്തെ എന്‍എസ്എസ് കരയോഗ മന്ദിരങ്ങള്‍ക്കും സ്ഥാപനങ്ങള്‍ക്കും നേരെ നടക്കുന്ന സിപിഎം ആക്രമണങ്ങളില്‍ ഹിന്ദുഐക്യവേദി സംസ്ഥാന സമിതി പ്രതിഷേധിച്ചു. കരയോഗ മന്ദിരങ്ങള്‍ക്ക് നേരെ നടക്കുന്ന അതിക്രമങ്ങള്‍ക്കുള്ള നിര്‍ദേശം സിപിഎം സംഘടനാ കേന്ദ്രങ്ങളില്‍ നിന്നാണ് നല്‍കുന്നത്. ശബരിമല ആചാരലംഘനത്തിനെതിരെ വ്യക്തമായ നിലപാടെടുത്ത് എന്‍എസ്എസ് രംഗത്ത് വന്നതാണ് സിപിഎം നേതൃത്വത്തെ ചൊടിപ്പിക്കുന്നത്.
ആചാര സംരക്ഷണത്തിന് പൊതുസമൂഹം ഒന്നാകെ രംഗത്തുവന്നതും, ജാതി സ്പര്‍ധ വളര്‍ത്തി ഹിന്ദുക്കളെ ഭിന്നിപ്പിക്കാനുള്ള ശ്രമങ്ങള്‍ പരാജയപ്പെട്ടതിലുമുള്ള വൈരാഗ്യമാണ് കരയോഗമന്ദിരങ്ങള്‍ക്കും സ്ഥാപനങ്ങള്‍ക്കും നേരെ സിപിഎം തീര്‍ക്കുന്നത്. ശബരിമല ആചാരങ്ങള്‍ക്കെതിരെ അടിക്കടി നടത്തിയ ശ്രമങ്ങള്‍ പരാജയപ്പെട്ടതിന്റെ ജാള്യതയും ഈ ആക്രമണത്തിന് പിന്നിലുണ്ടെന്ന് സംസ്ഥാന അധ്യക്ഷ കെ.പി. ശശികല പറഞ്ഞു. സിപിഎം നേതാക്കളുടെ പ്രസ്താവനകളും, വ്യാപകമായി നടത്തുന്ന ആക്രമണങ്ങളും അസഹിഷ്ണുതയുടെ തെളിവാണെന്നും അവര്‍ പറഞ്ഞു.
