ശബരിമല വിശ്വാസി സമൂഹത്തിന്റെ ആത്മീയ കേന്ദ്രമാണ്. എന്നാല് ശബരിമലയില് സ്ത്രീകള്ക്ക് പ്രവേശിക്കാം എന്ന വിധി വന്നശേഷം വളരെ തരംതാണ രീതിയിലുള്ള വീഡിയോകളും കമന്റുകളും ചിത്രങ്ങളുമാണ് സമൂഹമാധ്യങ്ങളില് പ്രചരിക്കുന്നത്. അറപ്പുളവാക്കുന്ന ഇത്തരം വാക്കുകളിലൂടെ നമ്മുടെ മഹാക്ഷേത്രത്തെ താറടിച്ച് കാട്ടാന് ശ്രമിക്കുന്നവരെ ചെറുത്ത് തോല്പ്പിക്കേണ്ടത് ഓരോ വിശ്വാസിയുടെയും കടമയാണ്. അല്ലെങ്കില് നാളെ മറ്റു ക്ഷേത്രങ്ങളിലേക്കും ഇക്കൂട്ടര് കടന്ന് കയറും. മറ്റുള്ളവരുടെ വിശ്വാസങ്ങളെ ബഹുമാനിക്കുന്നതൊടൊപ്പം നമ്മുടെ വിശ്വാസങ്ങളെ മുറുകെ പിടിക്കുക, കാരണം നമ്മുടെ നിലനില്പ്പ് തന്നെ ആ വിശ്വാസവുമായി ബന്ധപ്പെട്ടിരിക്കുന്നു എന്ന കാര്യം വിസ്മരിക്കരുത്.
രജിത് മുതുവിള, തിരുവനന്തപുരം
സ്മാര്ത്തവിചാരം ന്യൂ എഡിഷന്
കേരളത്തിലെ നമ്പൂതിരി സമുദായത്തില് നിലനിന്ന ഒരു കുറ്റപരിശോധനാ രീതിയാണ് സ്മാര്ത്തവിചാരം. നമ്പൂതിരിസ്ത്രീകള്ക്ക് ചാരിത്ര്യദോഷം അഥവാ പരപുരുഷ ബന്ധം ആരോപിക്കപ്പെട്ടാല് അവരെ വിചാരണ ചെയ്യുകയും തീര്പ്പ് കല്പിക്കുകയും ചെയ്യുന്നതാണ് ഈ രീതി. കുറ്റം ആരോപിക്കപ്പെട്ട സ്ത്രീയെ ഒറ്റയ്ക്കു പാര്പ്പിക്കുകയും ശേഷം രാജാവിന്റെ സാന്നിദ്ധ്യത്തില് വിചാരണ നടത്തുകയുമായിരുന്നു ആദ്യകാല സമ്പ്രദായം. കുറ്റം ആരോപിക്കപ്പെട്ട സ്ത്രീക്കും അതില് പങ്കുള്ള പുരുഷന് (പുരുഷന്മാര്) എന്നിവര്ക്കും ചേര്ന്ന് ഭ്രഷ്ട് കല്പിക്കപ്പെടുന്നതാണ് ഈ വിചാരണയുടെ അവസാനം.
ഇത്തരം കുറ്റവിചാരണ നടന്നതില് ഏറ്റവും പ്രസിദ്ധമായത് കുറിയേടത്ത് താത്രിയുടെ വിചാരണയാണ് (1905). അത് അന്തര്ജ്ജന സമൂഹത്തിന്റെ ഉള്ളിലെ സംഘര്ഷങ്ങളുടെ ബഹിര്ഗമനമായി. ഈ അടുത്തകാലത്ത് സരിതാ നായര് എന്ന സ്ത്രീ ഇത്തരമൊരു സ്മാര്ത്തവിചാരത്തിന് തയ്യാറായെങ്കിലും ഏറ്റെടുക്കാന് പുതിയ രാജാക്കന്മാര് താല്പര്യം കാണിച്ചില്ല. അഥവാ ഏറ്റെടുത്താല് തങ്ങളുടെ സാമന്തന്മാരും പെട്ടു പോകുമോ എന്നതായിരുന്നു പിന്മാറ്റത്തിനു കാരണം. അതുകൊണ്ട് ഇത്തരം ആചാരങ്ങള് ഇല്ലാതായി എന്നാണ് കരുതിയിരുന്നത്.
എന്നാല് മീ ടൂ കാമ്പയിനിലൂടെ പഴയകാല ആചാരങ്ങള് ആവര്ത്തിക്കപ്പെടാനുള്ള എല്ലാ സാഹചര്യവും സംജാതമായിരിക്കുന്നു. കുറിയേടത്ത് താത്രിക്ക് ചൂണ്ടിക്കാണിക്കാന് 65 നമ്പൂതിരിമാര് ഉണ്ടായിരുന്നെങ്കില് പുതിയ സാവിത്രിമാര്ക്ക് എത്ര പേരുണ്ട് എന്നത് വെളിപ്പെടുത്തലിലൂടെ മാത്രമേ അറിയാന് കഴിയൂ. ഇവിടെ സ്മാര്ത്തന് ആരെന്നതും അദ്ദേഹത്തെ നിയമിക്കുന്നത് ആരാണെന്നും കണ്ടെത്തേണ്ടിയിരിക്കുന്നു.
– കെ.എ സോളമന്, എസ്.എല് പുരം
