തിരുവനന്തപുരം: പ്രളയ, ബ്രൂവറി തുടങ്ങി നിരവധി ചോദ്യങ്ങള്‍ക്ക് മറുപടിയുമായി സംസ്ഥാന മുഖ്യമന്ത്രി പിണറായി വിജയന്‍. പ്രളയത്തില്‍ ലോകബാങ്ക് കണക്കുപ്രകാരം 25,050 കോടി രൂപയുടെ നഷ്ടമെന്ന് മുഖ്യമന്ത്രി പിണറായി വിജയന്‍. ഭവനമേഖലയില്‍ ഉണ്ടായ നഷ്ടം 2534 കോടി രൂപയാണ്. 8554 കോടി രൂപയുടെ നഷ്ടമാണ് ഗതാഗതമേഖലയിലുണ്ടായത്. വ്യവസായ-കച്ചവട മേഖലിയുണ്ടായ നഷ്ടത്തിന്റെ കണക്ക് വന്നിട്ടില്ലെന്നും മുഖ്യമന്ത്രി പറഞ്ഞു.
വലിയൊരു വിഭാഗം ജനങ്ങളെ മാറ്റിപ്പാര്‍പ്പിക്കേണ്ടിവരും. അതിന് 400 കോടി രൂപ ചെലവ് വരും. കേന്ദ്രസഹായവും വായ്‌പകളും കൊണ്ട് നഷ്ടം പൂര്‍ണമായും നികത്താനാവില്ല. പ്രത്യേക പാക്കേജ് ആവശ്യപ്പെട്ട് കേന്ദ്രത്തിന് നിവേദനം നല്‍കുമെന്നും മുഖ്യമന്ത്രി അറിയിച്ചു.
നവകേരള നിര്‍മ്മാണം വലിയ സാമ്പത്തിക പ്രക്രിയയാണ്. നാടിന്റെ വികസനത്തിനാണ് ധനസമാഹരണം എന്ന് എതിര്‍ക്കുന്നവര്‍ തിരിച്ചറിയണം.
അതുകൂടാതെ, സംസ്ഥാനത്ത് ബ്രൂവറികള്‍ക്ക് അനുമതി നല്‍കിയത് ഇടതു സര്‍ക്കാരിന്റെ നയം അനുസരിച്ചെന്നും മുഖ്യമന്ത്രി പിണറായി വിജയന്‍ പറഞ്ഞു. ഇക്കാര്യത്തില്‍ അഴിമതി ആരോപിക്കുന്ന പ്രതിപക്ഷ നേതാവ് സര്‍ക്കാരിനെതിരെ ജനങ്ങളെ തിരിച്ചുവിടാന്‍ ശ്രമിയ്‌ക്കുകയാണെന്നും മുഖ്യമന്ത്രി പറഞ്ഞു. ബ്രൂവറികള്‍ അനുവദിക്കുന്നത് മദ്യത്തിന്റെ ഇറക്കുമതി കുറയ്‌ക്കും. അതുവഴി അന്യസംസ്ഥാന മദ്യലോബിയ്‌ക്ക് നഷ്ടമുണ്ടാകും. ഇതില്‍ അസ്വസ്ഥരായിട്ടാണോ പ്രതിപക്ഷം ആരോപണമുന്നയിക്കുന്നതെന്നാണ് മുഖ്യമന്ത്രിയുടെ ചോദ്യം. പത്രപരസ്യം നല്‍കിയല്ല ബ്രൂവറികള്‍ അനുവദിയ്‌ക്കുന്നത്. ഇത് ചെന്നിത്തലയ്‌ക്കും അറിയാമെന്നും പിണറായി പറഞ്ഞു.
മണിക്കൂറുകളോളം നീണ്ട വാര്‍ത്താ സമ്മേളനത്തില്‍ ചെന്നിത്തലയുടെ ആരോപണങ്ങള്‍ക്ക് എണ്ണിയെണ്ണി മറുപടി നല്‍കുകയായിരുന്നു മുഖ്യമന്ത്രി പിണറായി വിജയന്‍. ഇടത് സര്‍ക്കാരിന്റെ മദ്യനയത്തില്‍ ആശങ്ക വേണ്ടെന്നും അര്‍ഹരല്ലാത്ത ആര്‍ക്കും ബ്രൂവറി ലൈസന്‍സ് നല്‍കില്ലെന്നും വ്യക്തമാക്കിയ മുഖ്യമന്ത്രി ബ്രൂവറികള്‍ പുതുതായി തുടങ്ങുന്നത് തൊഴിലവസരം കൂട്ടുമെന്നും കൂടാതെ, നികുതി വരുമാനത്തിലും വര്‍ധനയുണ്ടാകുമെന്നും പറഞ്ഞു.
1999 -ലെ ഉത്തരവ് ഇനി ഡിസ്റ്റിലറികള്‍ തന്നെ വേണ്ട എന്നല്ല. പ്രതിപക്ഷനേതാവ് പുകമറ സൃഷ്ടിയ്‌ക്കാന്‍ ശ്രമിയ്‌ക്കുകയാണെന്നും മുഖ്യമന്ത്രി ആരോപിച്ചു. ബ്രൂവറികള്‍ അനുവദിയ്‌ക്കുന്ന കാര്യം മന്ത്രിസഭാ യോഗത്തില്‍ കൊണ്ടുവരേണ്ട കാര്യമില്ല. ബ്രൂവറി റൂള്‍സ് അനുസരിച്ച് ഒരു വകുപ്പിന് മന്ത്രിസഭാ യോഗത്തില്‍ അനുമതി തേടേണ്ടതില്ലെന്നും മുഖ്യമന്ത്രി വ്യക്തമാക്കി.
