കൊച്ചി: കനത്തമഴയെ തുടര്ന്ന് പെരിയാറില് വെള്ളം കരകവിഞ്ഞ് ഒഴുകിയതോടെ ആലുവ വെള്ളത്തിനടിയിലായി. ആലുവയില് മാത്രം ആയിരത്തോളം കുടുംബംങ്ങളാണ് വിവിധ ഇടങ്ങളിലായി കുടുങ്ങി കിടക്കുന്നത്. പെരിയാര് വഴിതിരിഞ്ഞ് താഴ്ന്ന പ്രദേശങ്ങളിലേക്ക് ഒഴുകാന് ആരംഭിച്ചതോടെ കൊച്ചി നഗരത്തിലേക്കും വെള്ളപ്പൊക്ക ഭീഷണി പടരുകയാണ്.
കൊച്ചി നഗരത്തില് ഉള്പ്പെടെ വെള്ളം ഒഴുകി പോകുന്നില്ല. ഇതോടെ സ്ഥിതി അതിരൂക്ഷമായിരിക്കുകയാണ്. കാലടിയില് ദുരിതാശ്വാസ ക്യാമ്പ് പ്രവര്ത്തിക്കുന്ന പള്ളിയില് ഉള്പ്പെടെ വെള്ളം കയറിയെന്നാണ് റിപ്പോര്ട്ട്. പെരിയാറിലെ ജലനിരപ്പ് ക്രമാതീതമായി ഉയരുകയാണ്. പെരിയാറിന്റെ കൈവഴികളിലൂടെ കൂടുതല് മേഖലകളിലേക്ക് ജലം ഇരച്ചെത്തുകയാണ്. ദേശീയപാതയില് വെള്ളം കയറി ഗതാഗതം സ്തംഭിച്ചു. ട്രെയിന് ഗതാഗതവും നിര്ത്തിവച്ചു. ആലുവ മണപ്പുറത്തോട് ചേര്ന്നിട്ടുള്ള ഭാഗങ്ങള് ഉള്പ്പെടെയുള്ള സ്ഥലങ്ങളില് നിരവധി പേര് പെട്ടിട്ടുണ്ടെന്നാണ് റിപ്പോര്ട്ട്. നിരവധി പേര് ടെറസിന് മുകളില് കഴിയുകയാണെങ്കിലും വെള്ളം ക്രമാധീതമായി ഉയരുന്നതിനാല് പ്രദേശത്തേക്ക് എത്തിപ്പെടാന് രക്ഷാസംഘത്തിന് സാധിക്കുന്നില്ല.
മുതിരപ്പുഴ കമ്പനിപാടം എന്നിവിടങ്ങളിലെല്ലാം വീടുകള് വെള്ളത്തിനടയിലാണ്. സേനാ വിഭാഗങ്ങള് എല്ലാം രക്ഷാപ്രവര്ത്തനത്തിന് ഉണ്ടെങ്കിലും ബോട്ടുകളുടെ കുറവ് രക്ഷാപ്രവര്ത്തനത്തെ ബാധിക്കുന്നുണ്ട്. അതുകൊണ്ട് തന്നെ ഒറ്റപ്പെട്ട ഇടങ്ങളിലും ഉള്പ്രദേശങ്ങളിലും രക്ഷാസംഘത്തിന് എത്താന് സാധിച്ചിട്ടില്ല. നാട്ടുകാര് സ്വന്തം നിലയില് രക്ഷാപ്രവര്ത്തനം നടത്തുന്നുണ്ടെങ്കിലും ഇതൊന്നും പോരാത്ത അവസ്ഥയാണ്.
ആലുവ ബസ്റ്റാന്റ്, എരൂര്, കപ്പട്ടിക്കാവ്, കൊപ്പപറമ്പ്, വൈമിതി, കുന്നറ, പെരിയ കാട്, തെക്കുംഭാഗം, ഇരുമ്പനം, പാമ്പാടിത്താഴം, എന്നിവിടങ്ങളില് നിരവധി കുടുംബങ്ങള് വെള്ളക്കെട്ടില് പെട്ട് കഷ്ടപ്പെടുകയാണ്. ഭാസ്കരന് കോളനി കമ്മ്യൂണിറ്റി ഹാള്, എരൂര് കെഎന്യുപി സ്കൂള്, ചൂരക്കാട് യുപി സ്കൂള്. എന്നിവിടങ്ങളില് ദുരിതാശ്വാസ ക്യാമ്പുകള് തുറന്നിട്ടുണ്ട്. അതേസമയം ദുരിതാശ്വാസ ക്യാമ്പുകളില് അടക്കം വെള്ളം കയറുന്ന അവസ്ഥയാണ് നിലവിലുള്ളത്.
