കോഴിക്കോട്: രാഷ്‌ട്രീയ കോളിളക്കമുണ്ടാക്കിയ കാഫിര്‍ സ്‌ക്രീന്‍ ഷോട്ട് കേസില്‍ മുന്‍കൂര്‍ ജാമ്യാപേക്ഷ നല്‍കി ഡിവൈഎഫ്ഐ നേതാവ് റിബേഷ് രാമകൃഷ്ണന്‍. കേസില്‍ പ്രതി ചേര്‍ക്കപ്പെടുമെന്ന വിലയിരുത്തലിലാണ് ഇത്. മുന്‍കൂര്‍ ജാമ്യഹര്‍ജി ജൂലായ് മൂന്നിന് കോഴിക്കോട് ജില്ലാ സെഷന്‍സ് കോടതി പരിഗണിക്കും.
സ്‌ക്രീന്‍ഷോട്ട് ആര് നല്‍കിയതാണെന്ന കാര്യത്തില്‍ ഇപ്പോഴും വ്യക്തത വന്നിട്ടില്ല. കഴിഞ്ഞ ദിവസങ്ങളില്‍ പുതുതായി ചോദ്യം ചെയ്ത നാല് പേരും സ്‌ക്രീന്‍ഷോട്ട് എവിടെ നിന്നും ലഭിച്ചെന്ന് പറഞ്ഞിട്ടില്ല. ഡിവൈഎഫ്ഐ പ്രവര്‍ത്തകനായ റിബേഷ് രാമകൃഷ്ണന്‍, മനീഷ്, അതുല്‍ എന്നിവരെ കഴിഞ്ഞ ദിവസം പ്രത്യേക അന്വേഷണ സംഘം ചോദ്യം ചെയ്യാനായി വിളിച്ച് വരുത്തി.ഗ്രൂപ്പുകളില്‍ നിന്ന് ഫോര്‍വേഡ് ചെയ്ത് കിട്ടിയതാണെന്ന പഴയ നിലപാടില്‍ തന്നെയാണ് ഇവര്‍ .ഈ സാഹചര്യത്തില്‍ ഡിജിറ്റല്‍ തെളിവുകള്‍ മാത്രമാണ് അന്വേഷണസംഘത്തിന് മുന്നിലുള്ള പ്രധാന മാര്‍ഗം. കേസില്‍ പിടിച്ചെടുത്ത മൊബൈല്‍ ഫോണുകളുടെ ഫോറന്‍സിക് പരിശോധനാ ഫലം ഉടന്‍ ലഭ്യമാകുമെന്നാണ് വിവരം.
അതേസയമം കേസില്‍ നേരത്തേ അറസ്റ്റിലായ ഡി വൈ എഫ് ഐ നേതാവ് ജിതിന്‍ ഭാസ്‌കറിന്റെ ജാമ്യപേക്ഷ ചൊവ്വാഴ്ച പരിഗണിക്കും.
