തിരുവനന്തപുരം: സംസ്ഥാനം നേരിടുന്ന വൈദ്യുതി പ്രതിസന്ധിയുടെ സാഹചര്യത്തില് ഉയര്ന്ന വിലയ്ക്ക് പുറത്തുനിന്ന് വൈദ്യുതി വാങ്ങാന് കേരള സ്റ്റേറ്റ് ഇലക്ട്രിസിറ്റി ബോര്ഡിന് സംസ്ഥാന വൈദ്യുതി റെഗുലേറ്ററി കമ്മീഷന്റെ അനുമതി . സെപ്തംബര് ഒഴികെ ജൂലായ് മുതല് ഡിസംബര് വരെയുള്ള മാസങ്ങളിലാണ് ഉയര്ന്ന നിരക്കില് വൈദ്യുതി വാങ്ങാന് അനുമതി.
നിലവില് സംസ്ഥാനത്ത് അപ്രഖ്യാപിത ലോഡ്ഷെഡിംഗുളളതില് വ്യാപക വിമര്ശനങ്ങള് ഉയര്ന്നിട്ടുണ്ട്.
അതേസമയം, കെഎസ്ഇബിയുടെ വീഴ്ചകള് ചൂണ്ടിക്കാട്ടി ഉത്തരവില് കമ്മീഷന് കടുത്ത വിമര്ശനം ഉന്നയിച്ചിട്ടുണ്ട്. പവര് എക്സ്ചേഞ്ചില് നിന്നടക്കം വിവിധ സ്രോതസുകളില് നിന്ന് വാങ്ങിയ വൈദ്യുതിയുടെ കൃത്യമായ വിവരങ്ങള് ആവര്ത്തിച്ച് ആവശ്യപ്പെട്ടിട്ടും ബോര്ഡ് സമര്പ്പിച്ചില്ലെന്ന് കമ്മീഷന് പറഞ്ഞു. കൂടാതെ, അപ്രഖ്യാപിത ലോഡ്ഷെഡിംഗ് ഒഴിവാക്കണം ,നിയന്ത്രണങ്ങള് ഉണ്ടാകുന്ന പക്ഷം ഒരു മണിക്കൂര് മുമ്പെങ്കിലും ഉപഭോക്താക്കളെ വിവരമറിയിക്കണമെന്നും കര്ശന നിര്ദ്ദേശം നല്കി. കാലവര്ഷം ശക്തിപ്പെടുന്ന മുറയ്ക്ക് ഉയര്ന്ന വിലയ്ക്കുള്ള വൈദ്യുതി വാങ്ങല് കുറയ്ക്കാനും ബോര്ഡ് ശ്രമിക്കണം.
നിലവില് ജൂണ് 30 വരെയാണ് സംസ്ഥാനത്ത് ഔദ്യോഗികമായി വൈദ്യുതി നിയന്ത്രണം ഏര്പ്പെടുത്തിയിട്ടുള്ളത്. കാലവര്ഷം പ്രതീക്ഷിച്ച രീതിയില് ശക്തി പ്രാപിക്കാത്തതാണ് നിലവിലെ പ്രതിസന്ധിക്ക് കാരണം.
