ഹൂസ്റ്റണ്‍: ആദ്യ ഇലവനില്‍ നെയ്മര് ജൂനിയറുടെ പേര് കോച്ച് ഒഴിവാക്കിയതോടെ കളിയുടെ ആരംഭത്തില്‍ നെയ്മര് ജൂനിയര്‍ കളിക്കില്ലെന്നുറപ്പായി. കഴിഞ്ഞ കളിയില്‍ സ്വിറ്റ്സര്‍ലാന്‍റിനെ മൂന്ന് ഗോളുകള്‍ക്ക് തോല‍്പിച്ച ബ്രസീല്‍ ടീമിനെ അതേ പടി നിലനിര്ത്തിയിരിക്കുകയാണ് കോച്ച് കാര്‍ലോ ആന്‍സലോട്ടി.
വെനീഷ്യസും കുന്യയും തന്നെയായിരിക്കും ബ്രസീലിന്റെ ആക്രമണ കുന്തമുനകള്‍. തോറ്റാല്‍ കളിയില്‍ പുറത്താകുമെന്നതിനാല്‍ ജപ്പാനും ബ്രസീലിനെതിരെ അങ്ങേയറ്റം കരുത്തോടെ പോരാടും. ഹൂസ്റ്റണ്‍ സ്റ്റേഡിയത്തില്‍ ഇന്ത്യന്‍ സമയം രാത്രി 10.30ന് തുടങ്ങുന്ന പോരാട്ടം ബ്രസീലിന് ശരിക്കും അഗ്നിപരീക്ഷ തന്നെയായിരിക്കും. കാരണം വളരെ ചടുലമായ, ഹൈ പ്രസിങ് ഗെയിമിന്റെ വക്താക്കളാണ് ജപ്പാനീസ് സാമുറായികള്‍.
ചെറിയൊരു പിഴവ് സംഭവിച്ചാല്‍ അതു കാനറികളുടെ പ്രതിക്ഷകള്‍ തന്നെ തകിടം മറിക്കുകയും ചെയ്യും. അതുകൊണ്ടു തന്നെ വ്യക്തമായ ഗെയിം പ്ലാനോടെയാവും ബ്രസീല്‍ കോച്ച് കാര്‍ലോ ആന്‍സലോട്ടി ടീമിനെ അണിനിരത്തുക.
അതിനിടെ നെയ്‌മറിനെ കളിപ്പിച്ചാല്‍ ബ്രസീല്‍ ഈ മല്‍സരം തോല്‍ക്കുമെന്നു പ്രവചിച്ചിരിക്കുകയാണ് ഫുട്‌ബോള്‍ പണ്ഡിതനും മുന്‍ ജപ്പാനീസ് താരവുമായ മാര്‍ക്കസ് ടുലിയോ തനാക്ക പറഞ്ഞത് വൈറലായി. തന്റെ പ്രവചനത്തിന് കാരണവും മാര്‍ക്കസ് ടുലിയോ നിരത്തുന്നു. “നെയ്‌മാര്‍ ഇപ്പോഴും ഏറ്റവും മികച്ച ഫോം വീണ്ടെടുത്തിട്ടില്ല. ഇപ്പോഴുള്ള നെയ്‌മറാണ് ബ്രസീസിലിനായി ഈ കളിയില്‍ ഇറങ്ങുന്നതെങ്കില്‍ ജപ്പാന് അതിന്റെ ആനുകൂല്യം മുതലെടുക്കാന്‍ കഴിയും. ചിലപ്പോള്‍ അദ്ദേഹം ഗോള്‍ നേടിയേക്കാം. പക്ഷെ ടീമെന്ന നിലയില്‍ ബ്രസീലിനെ ആകെ നോക്കിയാല്‍ നെയ്മര് കളിക്കുന്നതാണ് ജപ്പാന് നല്ലത്. പക്ഷെ ബ്രസീലിനെ സംബന്ധിച്ച്‌ അതു നല്ലതുമായിരിക്കില്ല. നെയ്മര് ടീമിലുണ്ടെങ്കില്‍ അതു ജപ്പാന് നല്ലതാണ്.”.
