ചെന്നൈ: സൂപ്പര്താരം സൂര്യയുടെ രാഷ്ട്രീയപ്രവേശനം തമിഴ്നാട്ടില് ചൂടുള്ള ചര്ച്ചയായിരിക്കുകയാണ്. സൂര്യയുടെ ആരാധക സംഘടനയുടെ യോഗത്തില് ഒരു രാഷ്ട്രീയ സംഘടന രൂപീകരിക്കുന്നതിനെക്കുറിച്ച് ചര്ച്ച നടന്നിരുന്നു. അഖിലേന്ത്യ സൂര്യ തലൈമൈ നര്പണി ഇയക്കം എന്ന സൂര്യ ഫാന്സ് അസോസിയേഷന്റെ ജില്ലാ ഭാരവാഹികളുടെ ആലോചനാ യോഗത്തിലാണ് രാഷ്ട്രീയപാര്ട്ടി ചര്ച്ചാവിഷയമായത്. ഇതോടെ സൂര്യയും രാഷ്ട്രീയത്തിലേക്കിറങ്ങുന്നുവെന്ന രീതിയില് ചര്ച്ച കൊഴുത്തു.
കാലവും ദൈവവും എല്ലാം തീരുമാനിച്ചുകഴിഞ്ഞുവെന്നും സൂര്യ ഒരു ജനനായകനായി മാറുന്നത് തടയാന് ഇനി ആര്ക്കും കഴിയില്ലെന്നുമായിരുന്നു ഒരു പ്രധാന ജില്ലാ ഭാരവാഹി പ്രഖ്യാപനം നടത്തിയത്. . കാലത്തിന്റെ കണ്ണാടിയിലൂടെ നോക്കുമ്പോള് എനിക്ക് ഇവിടെ പല എംഎല്എമാരെയും എംപിമാരെയും കാണാന് സാധിക്കുന്നുണ്ട്. നിയമസഭയ്ക്കുള്ളില് ‘മന്ത്രി’ എന്നെഴുതിയ നെയിം ബോര്ഡിന് പിന്നില് ഇരിക്കുന്ന വ്യക്തികളെ എനിക്ക് കാണാം. കാലവും ദൈവവും തീരുമാനിച്ചാല് ഇത് സംഭവിക്കും. സൂര്യ നല്പണി ഇയക്കം വെക്കുന്ന ഈ ഒരടി, രണ്ടോ മൂന്നോ വര്ഷത്തിനുള്ളില് 130 അടി ഉയരത്തിലേക്ക് എത്തും’, അദ്ദേഹം പറഞ്ഞു.
ഈ വാക്കുകളെ ഹര്ഷാരവത്തോടെയും വലിയ കൈയടികളോടെയുമാണ് യോഗത്തിനെത്തിയ ആരാധകര് സ്വീകരിച്ചത്. യോഗത്തില് പങ്കെടുത്ത ഭാരവാഹികളും ഈ പ്രസ്താവനയെ പൂര്ണ്ണമായും പിന്തുണയ്ക്കുകയുണ്ടായി. ഈ വീഡിയോ ദൃശ്യങ്ങളും വാര്ത്തകളും സാമൂഹിക മാധ്യമങ്ങളില് അതിവേഗം തരംഗമായി മാറിയിട്ടുണ്ട്. ഇതോടെ സൂര്യ സജീവ രാഷ്ട്രീയത്തിലേക്ക് ഇറങ്ങുകയാണോ എന്ന തരത്തിലുള്ള ചര്ച്ചകള് തമിഴകത്ത് ചൂടുപിടിച്ചിരിക്കുകയാണ്.
