ചെന്നൈ: മുന്നിലുള്ള എല്ലാ പ്രതിബന്ധങ്ങളും മറികടന്ന് മുന്നോട്ട് പോകുമെന്ന് ഡിഎംകെ വര്ക്കിംഗ് പ്രസിഡന്റ് എം.കെ സ്റ്റാലിന്. കരുണാനിധിയുടെ കാലടികള് പിന്തുടരുമെന്നും എം.കെ സ്റ്റാലിന് പറഞ്ഞു. ചെന്നൈയില് കരുണാനിധിയെ അനുസ്മരിക്കുന്നതിനായി ചേര്ന്ന യോഗത്തില് സംസാരിക്കുകയായിരുന്നു അദ്ദേഹം.
കരുണാനിധിയുടെ ആഗ്രഹങ്ങള്ക്ക് അനുസരിച്ച് അദ്ദേഹം തെളിച്ച പാതയിലൂടെ പാര്ട്ടിയെ മുന്നോട്ട് നയിക്കുമെന്നും സ്റ്റാലിന് പറഞ്ഞു.കരുണാനിധി ഇല്ലാതെ ഒരു എക്സിക്യുട്ടീവ് കമ്മിറ്റി ചേരേണ്ടി വന്നുവെന്ന് വിശ്വസിക്കാന് കഴിയുന്നില്ല. പ്രവര്ത്തകര്ക്ക് നേതാവിനെ നഷ്ടപ്പെട്ടപ്പോള് തനിക്ക് നഷ്ടമായത് മാര്ഗദര്ശിയേയും അച്ഛനേയുമാണെന്നും സ്റ്റാലിന് പറഞ്ഞു.
അതേസമയം പാര്ട്ടിയില് ഭൂരിപക്ഷം നേതാക്കളുടേയും പിന്തുണ സ്റ്റാലിനാണ്. സ്റ്റാലിന് പാര്ട്ടിയെ നയിക്കാനുള്ള ശേഷിയുണ്ടെന്ന് ഡി.എം.കെയുടെ മുതിര്ന്ന നേതാവ് ദുരൈ മുരുഗന് പറഞ്ഞു. കരുണാനിധിയുടെ നിര്യാണത്തില് അനുശോചിച്ച് ഡി.എം.കെ എക്സിക്യൂട്ടീവ് പ്രമേയം പാസാക്കി.
കരുണാനിധിയുടെ യഥാര്ത്ഥ അണികള് തനിക്കൊപ്പമാണെന്ന് സ്റ്റാലിന്റെ മൂത്ത സഹോദരന് എം.കെ അഴഗിരി അവകാശപ്പെട്ടിരുന്നു. നിലവില് പാര്ട്ടിക്ക് പുറത്താണ് അഴഗിരി. കരുണാനിധിയുടെ നിര്യാണത്തോടെ പാര്ട്ടിയിലേക്ക് തിരിച്ചു വരാനുള്ള നീക്കം അഴഗിരി ശക്തമാക്കിയേക്കുമെന്നാണ് സൂചന. അതുകൊണ്ട് തന്നെ പ്രതിബന്ധങ്ങള് മറികടക്കുമെന്ന സ്റ്റാലിന്റെ പ്രസ്താവന അഴഗിരിക്കുള്ള മറുപടിയായാണ് വിലയിരുത്തപ്പെടുന്നത്. 2014ലെ ലോക്സഭാ തിരഞ്ഞെടുപ്പിന് തൊട്ടുമുന്പാണ് അഴഗിരിയെ കരുണാനിധി പുറത്താക്കിയത്.
സ്റ്റാലിനുമായുള്ള അധികാര തര്ക്കത്തെ തുടര്ന്നായിരുന്നു പുറത്താക്കല് നടപടി. കരുണാനിധിയുടെ മരണത്തിന് മുന്പ് തന്നെ പാര്ട്ടിയിലേക്ക് തിരിച്ചു വരാനുള്ള നീക്കങ്ങള് അഴഗിരി തുടങ്ങിയിരുന്നു. തിങ്കളാഴ്ച അഴഗിരിയുടെ പരസ്യപ്രസ്താവനയ്ക്ക് പിന്നാലെ മധുരയിലെങ്ങും അഴഗിരിയുടെ പോസ്റ്ററുകള് പ്രത്യക്ഷപ്പെട്ടിട്ടുണ്ട്. അഴഗിരിയുടെ ശക്തികേന്ദ്രമാണ് മധുര. അതിനിടെ കലൈഞ്ജര് ഡി.എം.കെ എന്ന പേരില് അഴഗിരി പുതിയ പാര്ട്ടി പ്രഖ്യാപിച്ചേക്കുമെന്നും റിപ്പോര്ട്ടുകളുണ്ട്.
