കോഴിക്കോട്: ‘നാളെ മാറാട് ബോട്ട് വരും സഹായിക്കണം’ എന്ന ഫോണ് കോള് അബ്ദുള് നാസര് മദനിയ്ക്ക് വന്നുവെന്നും അതിനെ തുടര്ന്നുള്ള ദിവസങ്ങളിലാണ് മാറാട് കലാപമുണ്ടായതെന്നുമുള്ള സംഭവം ഒരിയ്ക്കല് കൂടി ഓര്മ്മിപ്പിച്ച് സാമൂഹ്യ നിരീക്ഷകനും പ്രഭാഷകനുമായ എ.പി. അഹമ്മദ്.
2003ലാണ് എട്ട് ഹിന്ദു മത്സ്യത്തൊഴിലാളികള് കൊലചെയ്യപ്പെട്ട മാറാട് കലാപം ഉണ്ടാകുന്നത്. ഒരു മുസ്ലിമും കലാപത്തില് കൊല്ലപ്പെട്ടു. പക്ഷെ ഇത് യാദൃച്ഛികമല്ലെന്നും കൃത്യമായ ആസൂത്രണം പിന്നിലുണ്ടെന്നുമാണ് എ.പി. അഹമ്മദ് ആരോപിച്ചത്. മാറാട് കലാപത്തിന്റെ ഗൂഢാലോചനയില്, പിഡിപി നേതാവ് അബ്ദുല് നാസര് മദനി അടക്കമുള്ളര്ക്ക് പങ്കെണ്ടെന്നും ഇക്കാര്യവും കലാപത്തിലെ വിദേശ ശക്തികളുടെ പങ്കും വേണ്ട രീതിയില് അന്വേഷിച്ചിട്ടില്ലെന്നും എ പി അഹമ്മദ് പറഞ്ഞു. .മാറാട് കലാപത്തിന്റെ 23-ാം വാര്ഷിക ദിനത്തില് കോഴിക്കോട് വിശ്വഹിന്ദുപരിഷത്ത് നടത്തിയ അനുസ്മരണ പരിപാടിയില് സംസാരിക്കുകയായിരുന്നു എ പി അഹമ്മദ്.
മുസ്ലീം ലീഗ് ആഭ്യന്തരവകുപ്പെടുത്താല് കേരളത്തില് മാറാട് കലാപം ആവര്ത്തിച്ചേക്കുമെന്ന വെള്ളാപ്പള്ളി നടേശന് ഈയിടെ പ്രസ്താവിച്ചതോടെ വീണ്ടും മാറാട് കലാപം കേരളത്തില് ചര്ച്ചയാവുകയാണ്. അതിനിടയിലാണ് എ.പി. അഹമ്മദ് മാറാട് വിഷയം വീണ്ടും തുറന്നിട്ടത്.
പിഡിപിയുടെ സ്ഥാപക സംഘടനാ ജനറല് സെക്രട്ടറിയായിരുന്ന, ചിത്രഭാനുവിന്റെ ആത്മകഥയെ അടിസ്ഥാനമാക്കിയാണ് മാറാട് കലാപത്തിന് പിഡിപി നേതാവ് അബ്ദുള് നാസര് മദനിയ്ക്ക് പങ്കുണ്ടെന്ന് എ.പി. അഹമ്മദ് ആരോപിച്ചത്. “ഒരു ദിവസം താന്, അബ്ദുല് നാസര് മദനിക്കൊപ്പം ഒരു ഹോട്ടലില് താമസിക്കുമ്പോള്, ‘നാളെ മാറാട് ബോട്ട് വരും, സഹായിക്കണം’ എന്ന് പറയുന്ന ഒരു ഫോണ് കോള് അബ്ദുല് നാസര് മദനിക്ക് വന്നതായി സി കെ ചിത്രഭാനു എഴുതിയിട്ടുണ്ട്. അതിനുശേഷം മാറാട് കലാപം ഉണ്ടായതോടെ താന് ആ പാര്ട്ടിയില്നിന്നും വിട്ടുപോന്നുവെന്നാണ് ചിത്രഭാനു എഴൂതിയത്. ” ഈ ആത്മകഥ വായിച്ച് ഞാന് ചിത്രഭാനുവിനെ അങ്ങോട്ട്പോയി കാണുകയായിരുന്നു. അദ്ദേഹം എന്നോടും ഇക്കാര്യം സമ്മതിച്ചിട്ടുണ്ട്. ഒരു നിരന്തര പോരാളിയായിരുന്ന അന്തരിച്ച ചിത്രഭാനു”- എ പി അഹമ്മദ് പറഞ്ഞു.
”അന്നത്തെ മാറാട് എംഎല്എയായ വി കെ സി മമ്മദ്കോയ, മാറാട് എന്തൊക്കെയോ സംഭവിക്കാന്പോകുയാണെന്ന് പറഞ്ഞ് സര്ക്കാറിന് കത്തയച്ചിരുന്നു. എന്നാല് സര്ക്കാര് അവിടെയുള്ള പൊലീസ് എയ്ഡ് പോസ്റ്റുകൂടി ഒഴിവാക്കുകയായിരുന്നു. മാറാട് കലാപത്തില് അന്വേഷണം ഈ വഴിക്കൊന്നും പോയില്ല. ഇതിനുള്ള പണം എവിടെനിന്നു വന്നു?. സംഭവം അന്വേഷിച്ച തോമസ് പി ജോസഫ് കമ്മീഷനും ഇതിന്റെ ഗൂഢാലോചനയെക്കുറിച്ച് അന്വേഷിച്ചില്ല. വിദേശ ശക്തികള് ഒന്നും സംഭവത്തില് ഉള്പ്പെട്ടില്ല എന്നാണ് കമ്മീഷന് പറയുന്നത്. എന്നാല് 2001 മുതല് തുടര്ച്ചയായി ലോകത്തില് ജിഹാദി ആക്രമണങ്ങള് സംഭവിച്ച കാലമായിരുന്നു. വേള്ഡ് ട്രേഡ് സെന്റര് ആക്രമണം, ഇന്ത്യന് പാര്ലിമെന്റ് ആക്രമണം, ഇസ്രയേല് പാര്ലിമെന്റ് ആക്രമണം എന്നിങ്ങനെയുള്ള തുടര്ച്ചയായ ആക്രമണങ്ങള്ക്ക് ശേഷമാണ് മാറാട് കാലാപം ഉണ്ടായത് എന്നത് യാദൃശ്ചികതയല്ല.”- എ പി അഹമ്മദ് പറയുന്നു.
