ഇടുക്കി: മഴയൊഴിഞ്ഞതിന് പിന്നാലെ ഇടുക്കി സംഭരണിയിലെ ജലനിരപ്പ് കുറയുന്നു. 2396.36 അടിവരെ എത്തിയ ജലനിരപ്പ് നീരൊഴുക്ക് കുറഞ്ഞതോടെ താഴുകയാണ്. ഇന്നലെ ഉച്ചയ്‌ക്ക് അവസാനം വിവരം ലഭിക്കുമ്പോള്‍ 2396.18 അടിയാണ് ജലനിരപ്പ്. 18 മണിക്കൂറിനിടെ .08 അടി വെള്ളമാണ് കുറഞ്ഞത്.
സംഭരണിയിലാകെ 92.08 ശതമാനമാണ് വെള്ളമാണുള്ളത്. 66440.09 ക്യുബിക് അടി വെള്ളമാണ് സംഭരണിയിലാകെ ഉള്ളത്. 0.32 സെ.മീ. മഴ പദ്ധതി പ്രദേശത്ത് ലഭിച്ചപ്പോള്‍ 12.055 ദശലക്ഷം യൂണിറ്റിനുള്ള വെള്ളം ഒഴുകിയെത്തി. 14.247 ദശലക്ഷം യൂണിറ്റാണ് മൂലമറ്റത്തെ വൈദ്യുതി ഉല്‍പാദനം.
ഇടുക്കിയിലെ ജലനിരപ്പ് താഴുമ്പോള്‍ ഇടമലയാര്‍ സംഭരണിയില്‍ ജലശേഖരം ഉയരുകയാണ്. ഇന്നലെ ഉച്ചയ്‌ക്ക് രണ്ട് മണിക്ക് ലഭിച്ച കണക്ക് പ്രകാരം 151.55 മീറ്ററാണ് ജലശേഖരം. 169 മീറ്ററാണ് പരമാവധി സംഭരണശേഷി. സംസ്ഥാനത്തെ മൊത്തം സംഭരണികളിലെ ജലശേഖരത്തില്‍ കുറവ് വന്നിട്ടുണ്ട്. 93 ശതമാനമായിരുന്ന ജലശേഖരം ഞായറാഴ്ച 92ലെത്തി. 219.487 ദശലക്ഷം യൂണിറ്റിനുള്ള വെള്ളം ഈ മാസം മാത്രം ഒഴുകിയെത്തി. കെഎസ്ഇബിക്ക് കീഴിലുള്ള പ്രധാനപ്പെട്ട 16 സംഭരണികളിലാകെ അവശേഷിക്കുന്നത് 3829.684 ദശലക്ഷം യൂണിറ്റിനുള്ള വെള്ളമാണ്.
