ഹൈദരാബാദ്: ഉഗാണ്ടന്‍ യുവതിയെ പീഡിപ്പിച്ച സുഡാനീസ് വിദ്യാര്‍ത്ഥികളെ പോലീസ് അറസ്റ്റ് ചെയ്തു. ഹൈദരാബാദ് സിറ്റി കോളജ് വിദ്യാര്‍ഥികളായ അമെര്‍ ഹസന്‍ (26), മുഹമ്മദ് ഫഗീര്‍ (25) എന്നിവരാണ് അറസ്റ്റിലായത്.
പൂനയില്‍ താമസക്കാരിയായ ഇരുപത്തിയൊന്നുകാരിയെയാണ് ഇവർ പീഡിപ്പിച്ചത്. ഹോളി മേരി ഇന്‍സ്റ്റിറ്റ്യൂട്ട് ഓഫ് ടെക്നോളജി ആന്‍ഡ് സയന്‍സ് കോളജിലെ ഫാര്‍മസി വിദ്യാര്‍ഥിയാണ് ഹസന്‍. സെന്‍റ് മേരിസ് കോളജിലെ ബിടെക് വിദ്യാര്‍ഥിയാണ് ഫഗീര്‍. പ്രതികളില്‍ ഒരാളുമായി പെണ്‍കുട്ടി കഴിഞ്ഞ അഞ്ചു മാസമായി പ്രണയത്തിലായിരുന്നു.
മൂന്നു ദിവസം മുമ്പ് സുഹൃത്തുക്കളെ കാണാന്‍ ഇവിടെയെത്തിയ പെൺകുട്ടിയെ കാമുകൻ ഫ്ലാറ്റിലേക്ക് സ്വീകരിക്കുകയായിരുന്നു. തുടർന്ന് പെണ്‍കുട്ടിക്ക് മദ്യം നല്‍കിയ ശേഷം ഇരുവരും മാനഭംഗത്തിനിരയാക്കി. പിന്നീട് പെണ്‍കുട്ടി ഫ്ലാറ്റില്‍നിന്നും രക്ഷപെട്ട് പുറത്തിറങ്ങി പോലീസില്‍ വിവരം അറിയിക്കുകയായിരുന്നു.
