ന്യൂദല്ഹി: സമ്പൂര്ണ്ണ വൈദ്യുതീകരണത്തിനുള്ള പ്രശംസയ്ക്ക് പിന്നാലെ ലോകാരോഗ്യ സംഘടനയും മോദി സര്ക്കാരിനെ പ്രശംസിക്കുന്നു. രാജ്യത്തെ സ്ത്രീ ആരോഗ്യത്തിന് സഹായകമായി, സാമ്പത്തിക പിന്നാക്ക വിഭാഗത്തില്പ്പെട്ടവര്ക്ക് സൗജന്യ പാചകവാതകം ലഭ്യമാക്കിയ പദ്ധതിയുടെ പേരിലാണ് പ്രശംസ. മുന്ന് വര്ഷത്തില് അഞ്ചു കോടി പേര്ക്ക് ലഭ്യമാക്കുമെന്ന് പ്രഖ്യാപിച്ച പദ്ധതി രണ്ടു വര്ഷത്തില് മൂന്നു കോടി എഴുപത് ലക്ഷം പേര്ക്ക് ലഭ്യമാക്കി.
ലോകത്ത് ഒരു രാജ്യത്തും വിഭാവനം ചെയ്യാത്ത പദ്ധതിയായാണ് ഡബ്ലിയു.ടി.ഒ പദ്ധതിയെ വിലയിരുത്തുന്നത്. പൊതുമലിനീകരണം തടയുന്നതിനും വ്യക്തികളുടെ ആരോഗ്യം സംരക്ഷിക്കുന്നതിനും ലക്ഷ്യമിട്ടാണ് പദ്ധതി. ഗ്രാമീണ മേഖലയില് പുക ശ്വസിച്ച് വിവിധ രോഗം ബാധിച്ച വീട്ടമ്മമാരുടെയും സ്ത്രീകളുടെയും ആരോഗ്യസംരക്ഷണത്തിന് പ്രധാനമന്ത്രി മോദി തുടങ്ങിയ പദ്ധതിയാണ് പ്രൈമിനിസ്റ്റേഴ്സ് ഉജ്ജ്വല യോജന (പിഎംഎയുവൈ). “രാജ്യങ്ങള് അന്തരീക്ഷ മലിനീകരണം തടയാന് ഓരോരോ പദ്ധതികള് നടപ്പിലാക്കുന്നു. ഉദാഹരണത്തിന് രണ്ടു വര്ഷത്തിനകം ഇന്ത്യയില്, പ്രധാനമന്ത്രി ഉജ്ജ്വല് യോജന പ്രകാരം, ദാരിദ്ര്യരേഖയ്ക്ക് താഴെക്കഴിയുന്ന 3.7 കോടി സ്ത്രീകള്ക്ക് സൗജന്യ എല്പിജി കണക്ഷന് നല്കി അവരെ വീട്ടാവശ്യത്തിന് ശുദ്ധ ഇന്ധനം ഉപയോഗിക്കാന് സഹായിക്കുന്നു”, ഡബ്ലിയുടിഒ റിപ്പോര്ട്ടില് പറയുന്നു.
രണ്ടു വര്ഷം മുമ്പ് 2016 മെയ് ഒന്നിനാണ് യുപിയിലെ ബലിയ ജില്ലയില് നരേന്ദ്രമോദി ഉജ്ജ്വല പദ്ധതി ഉദ്ഘാടനം ചെയ്തത്. മൂന്നു വര്ഷത്തിനകം അഞ്ചുകോടി ബിപിഎല് കുടുംബങ്ങള്ക്ക് സൗജന്യ പാചക വാതകം ലഭ്യമാക്കുമെന്നായിരുന്നു പ്രഖ്യാപനം. ഒരു കണക്ഷന് 1600 രൂപ വീതം ചെലവും കണക്കാക്കി. പെട്രോളിയം-പ്രകൃതി വാതക മന്ത്രാലയം വഴിയാണ് പദ്ധതി നടപ്പാക്കിയത്.
സര്ക്കാരും ഇതര സംവിധാനങ്ങളും വഴി 12,800 കോടി രൂപ പദ്ധതിക്ക് ലഭ്യമാക്കി. അഞ്ചു കോടി ഗ്യാസ കണക്ഷന് എന്ന ലക്ഷ്യം മൂന്നു വര്ഷത്തിനകം എട്ടുകോടി എന്ന് ഉയര്ത്തി. പട്ടികജാതി-പട്ടികവര്ഗ്ഗ വിഭാഗം, ഏറ്റവും പിന്നാക്ക വിഭാഗം, വനവാസികള്, തോട്ടം മേഖലയില് പാര്ക്കുന്നവര്, ദ്വീപു നിവാസികള് തുടങ്ങിയവരെയാണ് കൂടുതലും പദ്ധതിയില് ചേര്ത്തത്. 24 കോടി വീടുകളില് 10 കോടി വീട്ടുകാര് വിറക്, കരി തുടങ്ങിയ ഇന്ധനങ്ങളാണ് ഉപയോഗിക്കുന്നത്. മണിക്കൂറില് 400 സിഗററ്റ് കത്തിച്ച് പുകയ്ക്കുന്നത്ര പുക മാലിന്യമാണ് ഓരോ വീട്ടുകാരും അടുക്കള വഴി അകത്താക്കിക്കൊണ്ടിരുന്നത്.
2016 ഡിസംബര് ഒന്നു വരെ 11,702,168 ഗ്യാസ് കണക്ഷന് നല്കി. യുപിയില് ഈ കാലത്ത് 3,836,916 വീടുകളിലും മധ്യ പ്രദേശില് 1,651,685 വീടുകളിലും രാജസ്ഥാനില് 1,359,200 വീടുകളിലും ഗ്യാസ് ലഭ്യമാക്കിയതായി രാജ്യസഭയിലെ ചോദ്യോത്തര മറുപടിയില് വ്യക്തമാക്കിയിരുന്നു.
