പത്രക്കാര്ക്ക് പ്രിയപ്പെട്ട വാക്കുകളില് പ്രധാനിയാണ് ‘പ്രസ്താവന’ പത്രങ്ങളിലെ ഈ സര്വ്വവ്യാപിയെ മറ്റു പ്രസിദ്ധീകരണങ്ങളില് അങ്ങനെ കാണാറില്ല. പറച്ചിലിന്റെ പകരക്കാരനായ പ്രസ്താവനയ്ക്ക് അന്തസ്സ് കൂടും! തങ്ങള് പറഞ്ഞതെല്ലാം പ്രസ്താവിച്ചതായി പത്രത്തില് വരുമ്പോള് മന്ത്രിമാര്ക്കും നേതാക്കള്ക്കുമുണ്ടാകുന്ന സന്തോഷം പറഞ്ഞറിയിക്കാനാവില്ല.
”അതുകൊണ്ട് ഞാന് വീണ്ടും പ്രസ്താവിക്കുകയാണ്”- ചില മന്ത്രിമാരും രാഷ്ട്രീയ നേതാക്കളും ഇടയ്ക്കിടെ ആവര്ത്തിക്കുന്നതു കേട്ടിട്ടില്ലേ? പത്രങ്ങളില്നിന്നു പകര്ന്ന ‘പ്രസ്താവനജ്വര’മാണിത്.
‘പ്രസ്താവിച്ചു’വിന് മുന്നില് ചിലപ്പോള് ‘അസന്ദിഗ്ധമായി ‘യെ കാണാം. എന്താണു കാരണമെന്ന് എഴുതുന്നവരോടു ചോദിച്ചാലേ അറിയൂ. അതെന്തായാലും പത്രലേഖകര്ക്ക് സംശയമുണ്ടാകാതാരിക്കാന് നാല്ക്കവലകളില് നിന്നും പ്രതസമ്മേളന വേദികളില് ഇരുന്നും ഞാന് അസന്ദിഗ്ധമായി പ്രസ്താവിക്കുകയാണ് എന്ന് തട്ടിവിടുന്നവരുണ്ട്.
”നിയമലംഘനം അനുവദിക്കുകയില്ലെന്ന് മന്ത്രി അസന്ദിഗ്ധമായി പ്രസ്താവിച്ച”ത് വായിച്ചപ്പോള് ഏതാണീ മന്ത്രിയെന്ന് ഒരു വായനക്കാരന് സ്വയം തിരക്കിയത്രെ. എല്ലാം സഹിക്കാം. അസന്ദിഗ്ധം ചിലപ്പോള് അസന്നിഗ്ദ്ദവും അസ്സന്നിക്തവുമാകുന്നത് എങ്ങനെ സഹിക്കും? അസന്ദിഗ്ദത്തോടാണ് ചിലര്ക്ക് പ്രിയം.
പ്രസ്താവനജ്വരം സാധാരണക്കാര്ക്കിടയിലും പടരുന്നുണ്ട്. ”വിദേശ സന്ദര്ശനത്തിന് എന്നെ കൂട്ടുകയില്ലെന്ന് പുള്ളിക്കാരന് ഇന്നലെ രാത്രി അസ്സാന്നിധ്യമായി പ്രസ്താവിച്ചു” എന്നാണ് ഒരു മന്ത്രിയുടെ ഭാര്യ ഈയിടെ കൂട്ടുകാരിയോട് പറഞ്ഞത്.
രാഷ്ട്രീയ നേതാവിന്റെ ഫോണ് സംഭാഷണത്തിനിടെ ഭാര്യ പറഞ്ഞതിങ്ങനെ: ”ശരി. ശരി. ഇനിയെന്തെങ്കിലും പ്രസ്താവിക്കാനുണ്ടോ, എനിക്കടുക്കളയില് ജോലിയുണ്ട്”.
പത്രറിപ്പോര്ട്ടറെ ഫോണില് വിളിച്ച ഒരു വായനക്കാരന് തുടങ്ങിയത്: ”നമസ്കാരം സര്, എനിക്കൊരു കാര്യം പ്രസ്താവിക്കാനുണ്ട്”.
‘പ്രസ്താവന’യില് ‘പറച്ചില്’ അടങ്ങിയിട്ടുണ്ടെങ്കിലും രണ്ടും ചേര്ത്ത് പറഞ്ഞാലേ ചിലര്ക്ക് തൃപ്തിയാകൂ.
”വേതനവര്ധനയുടെ കാര്യം പരിഗണിക്കാമെന്ന് മന്ത്രി പ്രസ്താവനയില് പറഞ്ഞു”- ഇങ്ങനെയാണ് അവരുടെ പ്രയോഗം.
പത്രക്കാരുടെ വിഷമം ആരറിയുന്നു? ഒരു ‘പ്രസ്താവിച്ചുവോ പറഞ്ഞു’ വോ കൊണ്ട് ഒരു റിപ്പോര്ട്ടും തീരില്ല. അപ്പോഴവര് ‘ചൂണ്ടിക്കാട്ടി’യെ ആശ്രയിക്കും. ”വാഹനാപകടങ്ങള് വര്ധിച്ചുവരുകയാണെന്ന് ഗതാഗതമന്ത്രി ചൂണ്ടിക്കാട്ടി” (റോഡിലേയ്ക്കാവാം ചൂണ്ടിക്കാട്ടിയത്!)
‘ചൂണ്ടിക്കാട്ടി’ക്ക് കട്ടി അല്പം കൂടുതലാണെന്നു തോന്നുന്നവര് അതിനെ അടിച്ചുപരത്തി ‘ചൂണ്ടിക്കാണിച്ചു’ വാക്കും പ്രസ്താവനയില് ചൂണ്ടിക്കാട്ടുന്നവരും കുറവല്ല.
പറച്ചിലിന് പകരംവയ്ക്കാന് പത്രക്കാര്ക്ക് വേറെയും പദങ്ങളുണ്ട്. ‘കൂട്ടിച്ചേര്ത്തു’വിനെ പരിചയമില്ലേ? ”അപകടങ്ങള് കുറയ്ക്കാനുള്ള നടപടികള് ഉടന് സ്വീകരിക്കുമെന്ന് മന്ത്രി കൂട്ടിച്ചേര്ത്തു” ആദ്യവാക്യം കഴിഞ്ഞുള്ള ഏതു വാക്യത്തിനൊടുവിലും ഈ വാക്ക് ധൈര്യപൂര്വ്വം കൂട്ടിച്ചേര്ക്കാം. പലപ്പോഴും ഒട്ടും ചേര്ച്ചയില്ലാത്ത സ്ഥലങ്ങളിലാണ് ഈ ‘ചേര്ത്തു’വിനെ കാണാറുള്ളത്.
മറ്റൊരു പതിവുകാരനാണ് ‘വ്യക്തമാക്കി’ ”ഗതാഗതനിയമലംഘകരെ വെറുതെവിടുന്ന പ്രശ്നമില്ലെന്ന് മന്ത്രി വ്യക്തമാക്കി.”
”വിദ്യാര്ത്ഥി രാഷ്ട്രീയം ഇന്നത്തെ സാഹചര്യത്തില് അനഭിലഷണീയമല്ലെന്നു മന്ത്രിവ്യക്തമാക്കി”. ഒരു കാര്യം ഇതില് കൂടുതല് ‘വ്യക്തമാക്കാന്’ ആര്ക്കുകഴിയും? ‘വ്യക്തമാക്കി’യെപ്പോലെ ‘വിശദമാക്കി’യും കടന്നുവരാറുണ്ട്. ‘ചൂണ്ടിക്കാട്ടി’യെ ‘ചൂണ്ടിക്കാണിച്ചു’ വാക്കുന്നതുപോലെ ചിലര് ‘വിശദമാക്കി’യെ ‘വിശദീകരിച്ചു’ വാക്കും.ചിലര് വക്താക്കളെ എടുത്തു പറയിപ്പിച്ചേ അടങ്ങു. ‘കേരളത്തിലെ വാഹനപ്പെരുപ്പം കണ്ടില്ലെന്നു നടിക്കരുതെന്ന് മന്ത്രി എടുത്തു പറഞ്ഞു. (കൊച്ചിനെ എടുത്തുകൊണ്ടാവാം പറഞ്ഞത്!) ‘എടുത്തെടുത്തു പറഞ്ഞു’വെന്നും പ്രയോഗിക്കാവുന്നതാണ്!
‘ഊന്നിപ്പറഞ്ഞു’ വിനും ചിലര് സ്ഥാനം നല്കാറുണ്ട്. (ഊന്നുന്നത് കഴിക്കോലോ വാക്കിങ് സ്റ്റിക്കോ ആകാം!) ‘ഉറപ്പിച്ചു പറഞ്ഞു’വിനെ ഉപേക്ഷിക്കാനൊക്കുമോ? (വലിയ ആണിയടിച്ച് ഉറപ്പിക്കണം!) ചിലര്ക്കു തറപ്പിച്ചുതന്നെ പറയണം. (ഇവരുടെ കൈയില് എപ്പോഴും മുള്ളുകള് കാണും!) ‘സൂചിപ്പിച്ചു’വിനെ എങ്ങനെ കൈവിടും? ചിലര്ക്ക് ‘പിച്ചു’വിനെ ഇഷ്ടമല്ല. അവര്ക്ക് സൂചന നല്കിയാല് മതി.
സംശയം, വിശ്വാസം, പ്രതീക്ഷ എന്നിവ പ്രസ്താവനാ റിപ്പോര്ട്ടുകളില് കടന്നുവരുമ്പോള് പിന്നാലെ ‘പ്രകടനം’ ഉറപ്പാണ്. സംശയം പ്രകടിപ്പിച്ചു, വിശ്വാസം പ്രകടിപ്പിച്ചു, പ്രതീക്ഷ പ്രകടിപ്പിച്ചു- പ്രകടനങ്ങളുടെ കാലത്തിനു പറ്റിയ പ്രയോഗങ്ങള്! സംശയിക്കുന്നവരും വിശ്വസിക്കുന്നവരും പ്രതീക്ഷിക്കുന്നവരും വിരളമായി.
പിന്കുറിപ്പ്;
വിദ്യാര്ത്ഥി: സര്, എനിക്കൊരു സംശയം
അദ്ധ്യാപകന്: പ്രകടിപ്പിച്ചോളൂ.
